马可福音

7 有啲法利赛派嘅人同埋几个抄经士由耶路撒冷嚟到，一齐去耶稣嗰度。 2 佢哋见到耶稣有啲门徒用不洁嘅手，即系冇洗过嘅手*食嘢。 3 （原来法利赛派同埋所有犹太人都紧守前人嘅传统，洗手要洗到手踭，先可以食嘢； 4 佢哋去完市场返嚟，唔用水洁净自己，就唔食嘢。佢哋仲有好多其他传统要守，例如为杯、壶、仲有铜器施行浸礼。） 5 法利赛派同埋抄经士问耶稣：“你啲门徒点解唔遵守前人嘅传统呀，竟然用不洁嘅手食嘢？” 6 耶稣话：“虚伪嘅人啊，关于你哋，以赛亚嘅预言真系讲得一啲都冇错。圣经话：‘呢个民族口口声声话尊敬我，但系就冇将我放喺心入面。 7 佢哋继续崇拜我都系冇用㗎，因为佢哋将人定嘅规条当成教义去教人。’ 8 你哋唔理上帝嘅诫命；但系就死守人嘅传统。”

9 耶稣仲同佢哋讲：“你哋为咗守自己嘅传统，竟然用狡猾嘅方法去逃避，唔遵守上帝嘅诫命。 10 例如摩西话‘要孝敬*父母’，又话‘对父母讲恶毒说话嘅，就要处死’。 11 但系你哋就话，任何人都可以同父母讲，‘我供养唔到你嘞，我有嘅嘢都献咗俾上帝做“科珥班”嘞（“科珥班”即系奉献俾上帝嘅礼物）’， 12 你哋令到人唔再为父母做啲乜嘢。 13 你哋噉样做，等于用自己传俾人嘅传统，令到上帝嘅话语作废。类似嘅事，你哋都做得多嘞。” 14 耶稣又叫民众嚟，同佢哋讲：“你哋所有人要听我讲，要明白意思。 15 玷污人嘅，唔系一个人放入口嘅嘢，而系佢心里面出嚟嘅恶事。” 16 －－－*

17 耶稣离开人群，入咗间屋，门徒就问佢个比喻嘅意思。 18 耶稣同佢哋讲：“你哋都好似佢哋噉样唔明？你哋唔知道，摆入口嘅嘢，唔会玷污人咩？ 19 因为摆落口嘅，唔会入到心，而系落到肚，然后喺厕所排出嚟。”耶稣噉样讲，即系话所有食物都系洁净嘅。 20 佢仲话：“玷污人嘅，系人心里面出嚟嘅恶事。 21 因为从心里面出嚟嘅，有各种邪恶嘅谂法，导致淫乱*、偷窃、凶杀、 22 通奸、贪婪、恶行、欺诈、无耻嘅行为*、眼红人哋、亵渎、高傲、无理。 23 呢一切恶事都系从心里面出嚟，会玷污人㗎。”

24 耶稣离开嗰度，起程去到泰尔、西顿地区。佢入咗间屋，本来唔想俾人知道，不过都系俾人留意到。 25 有个女人，一听到耶稣嘅事，就嚟跪喺佢面前，因为佢年幼嘅女俾邪灵*附身。 26 呢个女人系希腊人，喺叙利亚嘅腓尼基出世。佢不断求耶稣将佢个女身上嘅邪灵赶出去。 27 耶稣同佢讲：“要等仔女食饱先。攞仔女嘅饼比狗仔食系唔啱㗎。” 28 个女人就话：“主啊，你讲得啱，不过枱底下面嘅狗仔，都会食仔女跌落嚟嘅饼碎吖！” 29 耶稣就同佢讲：“因为呢一句说话，你可以返去嘞，邪灵已经喺你个女身上出嚟嘞。” 30 于是佢返屋企，见到个女瞓喺床上面，邪灵真系走咗嘞。

31 耶稣离开泰尔地区，经过西顿，途经德卡波利斯*地区，返番去加利利海一带。 32 有人带咗一个有言语障碍嘅聋人去见耶稣，恳求耶稣将手放喺个聋人身上。 33 耶稣将佢带到远离民众嘅地方，将手指放入佢对耳，又吐口水摸一摸佢条脷， 34 跟住耶稣抬头望天，深深叹咗一口气，同个聋人讲：“厄法塔。”意思系“打开啦”。 35 聋人嘅耳仔就即刻听到嘢，连言语障碍都冇埋，可以正常讲嘢嘞。 36 耶稣吩咐大家唔好讲俾其他人知。不过佢越吩咐佢哋，佢哋就越宣扬出去。 37 宣扬出去嘅人都非常惊讶，佢哋话：“佢做嘅所有嘢都好好呀。佢甚至令聋人听到嘢，连哑嘅都讲到嘢呀。”