马可福音
6 耶稣离开嗰度，返到家乡，门徒都跟住佢。 2 到咗安息日，佢喺会堂入面教导人，听到嘅人大部分都觉得好诧异，佢哋话：“呢啲嘢佢喺边度学返嚟㗎？佢点会咁有智慧，有能力施行呢啲奇迹嘅？ 3 佢唔系嗰个木匠咩？佢系马利亚个仔，系雅各、约瑟、犹大、西门嘅阿哥吖嘛？佢啲细妹都住喺度㗎？”因为噉佢哋唔肯相信耶稣*。 4 耶稣同佢哋讲：“先知通常都受人尊重嘅，但系佢喺自己家乡同埋亲人当中，反而得唔到尊重。” 5 所以佢除咗将手放喺几个病人身上医好佢哋之外，就冇再喺嗰度施行奇迹嘞。 6 佢哋缺乏信心，令耶稣觉得好惊讶。后嚟，佢周游各村，喺唔同地方教导人。
7 耶稣召集十二使徒，开始派佢哋两个两个噉出去传道，又俾权力佢哋制伏邪灵*。 8 佢亦都吩咐佢哋，除咗带手杖之外，唔好带其他嘢上路，唔好带食物，唔好带粮袋，唔好带钱*， 9 亦都唔好额外带多件衫*，净系着好鞋就得嘞。 10 耶稣又同佢哋讲：“无论你哋去到边度，只要有人愿意接待你哋，就住喺佢屋企，直到离开嗰个城镇啦。 11 如果嗰度嘅人唔肯接待你哋，唔听你哋讲，你哋走嘅时候，就要扽走脚上面嘅泥土，噉佢哋就知道上帝警告*过佢哋嘞。” 12 于是佢哋出去传道，劝人悔改， 13 驱逐好多邪灵，又将油搽喺好多病人身上，医好佢哋。
14 周围嘅人都讲起关于耶稣嘅事，希律王都听到。有啲人话：“佢就系复活咗嘅施浸者约翰呀，所以先至施行到呢啲奇迹。” 15 又有啲人话：“佢系以利亚。”仲有啲人话：“佢系个先知，同以前嗰啲先知一样啰。” 16 而希律听到耶稣嘅事，就话：“俾我斩头嘅约翰复活咗呀。” 17 原来希律娶咗佢哥哥腓力嘅太太希罗底。希律为咗令呢个女人开心，就派人逮捕约翰，绑起佢，韫佢入监， 18 因为约翰唔止一次同希律讲：“你娶你哥哥嘅老婆系唔合法㗎。” 19 希罗底就对约翰怀恨在心，好想杀佢，但系又冇办法得逞， 20 因为希律一直保护佢，佢知道约翰系个正义嘅人，崇拜上帝，所以好怕佢。其实佢钟意听约翰讲说话，只不过每次听到约翰嘅话，佢都觉得好难做，唔知点算好。
21 希律生日嗰一日，希罗底揾到机会嘞。希律喺夜晚设宴款待手下嘅高官、将军同埋加利利嘅显要人物。 22 希罗底嘅女入咗嚟跳舞，令到希律同埋啲宾客好开心。王同嗰个女仔讲：“你想要啲咩，即管讲吖，你求嘅我都一定会俾你。” 23 佢甚至向个女仔发誓话：“无论你求我啲乜嘢，我都会俾你，就算系我王国嘅一半，我都一定俾你。” 24 个女仔出去同佢妈妈讲：“我求啲咩好呢？”佢妈妈话：“噉就要施浸者约翰个头啦。” 25 佢就即刻入去见王，请求话：“请王而家就将施浸者约翰嘅头放喺个盘度俾我吖。” 26 王听到之后就好苦恼，但系由于发咗誓，又有宾客在场，就唔想拒绝佢。 27 王即刻吩咐侍卫去攞约翰嘅人头嚟。侍卫就去监狱，斩咗约翰嘅头， 28 然后将人头放喺个盘度，俾个女仔，个女仔再交俾佢妈妈。 29 约翰嘅门徒知道咗，就嚟领约翰嘅遗体，安放喺墓穴入面。
30 使徒返番嚟耶稣嗰度，佢哋话俾耶稣知佢哋做过啲乜嘢，教过人啲乜嘢。 31 由于来来往往嘅人好多，佢哋连食饭都冇时间。耶稣就同佢哋讲：“嚟吖，我哋去一个偏僻嘅地方休息吓。” 32 所以佢哋就上咗船，谂住去一个偏僻地方，远离人群。 33 不过有人见到佢哋离开，结果好多人都知道咗，呢啲民众就喺唔同嘅城出嚟，跑去耶稣同门徒要去嘅地方，仲早过佢哋到添。 34 耶稣一落船，见到一大班人，就非常怜悯佢哋，因为佢哋好似冇牧人嘅绵羊一样。耶稣就教导佢哋好多真理。
35 时候唔早嘞，门徒嚟揾耶稣，同佢讲：“而家咁晏嘞，呢度又咁偏僻， 36 不如叫佢哋走，等佢哋自己去附近嘅乡村买嘢食啦。” 37 耶稣答门徒：“你哋攞啲嘢俾佢哋食吖。”门徒话：“你想我哋去买食物俾咁多人呀？要成200银元*㗎㖞。” 38 耶稣话：“去睇吓你哋有几多个饼吖？”佢哋睇完之后，话：“有五个饼，另外仲有两条鱼。” 39 跟住耶稣吩咐所有人一组一组噉样坐喺草地。 40 佢哋就分组坐低，有啲100人，有啲50人。 41 耶稣拎起五个饼、两条鱼，抬头望天，祷完告，将饼搣开，交俾门徒，门徒再分俾大家。佢又将两条鱼分俾所有人。 42 人人都有得食，而且食饱嘞。 43 佢哋将食净嘅饼收拾好，装满咗12个篮，另外仲有鱼净低添。 44 食饼嘅人，男人有5000个。
45 之后耶稣即刻叫门徒上船，经伯赛大过去对面岸，而自己就留低送民众离开。 46 民众走咗之后，耶稣就上山祷告。 47 到咗夜晚，门徒只船喺海中间，而耶稣就一个人喺山上面。 48 就快天光*嘅时候，耶稣见到门徒逆风航行，撑船撑得好辛苦，佢就喺海面行过去门徒嗰度，不过睇落好似要喺门徒旁边经过噉。 49 门徒一见到佢喺海面度行，就心谂：“系幻觉，唔系真㗎嘛！”跟住佢哋就大声嗌。 50 因为佢哋见到耶稣，都觉得好惊。耶稣就即刻同佢哋讲：“放心！*系我嚟嘅，唔使惊。” 51 于是耶稣上船同佢哋一齐，风就停咗嘞。佢哋都觉得好惊讶， 52 噉系由于佢哋仲未明白之前分饼嗰个奇迹嘅意思，佢哋嘅心仍然理解唔到发生紧嘅事。
53 佢哋去到对面岸嘅革尼撒勒，将架船停喺岸边。 54 佢哋一落船，啲人就认出耶稣。 55 于是民众就走去将呢个消息话俾嗰一带嘅人听，又有人用担架将病人抬去耶稣嗰度。 56 无论耶稣去到村庄、城镇，定系乡郊地方，啲人都会将病人带去市集广场度，求耶稣俾啲病人摸一摸佢外衣嘅穗边。啲病人摸完之后，全部都好返晒。