马可福音

1 关于上帝嘅仔耶稣基督嘅好消息系噉样开始㗎： 2 以赛亚先知噉样写：“睇吓！我要派我嘅使者行喺你前面*，佢会为你预备道路*。 3 喺旷野有人大声话：‘要为耶和华*预备道路，要为佢开路！’” 4 所以，施浸者约翰喺旷野教导人，要通过受浸表明自己悔改，噉上帝就会宽恕佢哋嘅罪。 5 全犹地亚同埋耶路撒冷嘅人都嚟揾佢，喺约旦河接受佢施行嘅浸礼，公开承认自己嘅罪。 6 约翰着住骆驼毛造嘅衫，缆住皮带，食嘅嘢系蝗虫同埋野生蜂蜜。 7 佢教导人话：“喺我之后嚟嘅嗰一位，佢嘅能力比我大，我连弯腰帮佢解开鞋带都唔配呀。 8 我用水为你哋施浸，而佢就会用神圣力量为你哋施浸。”

9 喺嗰段日子，耶稣由加利利嘅拿撒勒去到约旦河。喺嗰度，约翰为佢施浸。 10 耶稣一上返水，就见到个天打开，神圣力量好似鸽一样降喺佢身上。 11 天上有声音话：“你系我嘅仔，我深爱你，你已经得到我嘅认可*嘞。”

12 神圣力量即刻促使耶稣去到旷野。 13 佢喺旷野40日，嗰度有野兽出没，当时佢受到撒但引诱，不过有天使嚟服侍佢。

14 约翰被捕之后，耶稣去咗加利利，传讲上帝嘅好消息， 15 佢话：“指定嘅时候已经到咗，上帝嘅王国就快到嘞。你哋要悔改，对好消息有信心。”

16 耶稣沿住加利利嘅海边一路行嘅时候，见到西门同埋佢嘅兄弟安得烈喺度撒渔网落个海。佢哋系渔夫。 17 耶稣同佢哋讲：“嚟跟从我啦，我会令你哋成为另一种渔夫*。不过，你哋嘅收获唔系鱼，而系人。” 18 佢哋即刻揼低渔网跟从佢。 19 耶稣行前少少，见到两兄弟，佢哋系西庇太嘅仔雅各同埋约翰，佢哋喺船上面补紧渔网。 20 耶稣即刻邀请佢哋跟随佢，佢哋就即刻落船，离开爸爸西庇太同埋啲工人，跟从耶稣。 21 后嚟，佢哋去咗迦百农。

到咗安息日，耶稣就即刻去会堂教导人。 22 啲人对耶稣嘅教导方式觉得好惊讶。因为佢嘅教导系嚟自上帝㗎，唔似得嗰啲抄经士。 23 就喺嗰个时候，会堂入面有一个受邪灵*操纵嘅人大叫话： 24 “拿撒勒人耶稣，你嚟呢度做咩呀？*你嚟消灭我哋呀？我好清楚你系边个，你系上帝嘅圣者吖嘛！” 25 耶稣斥责邪灵话：“收声，喺呢个人身上面出嚟！” 26 邪灵*就大声尖叫，又令嗰个人猛烈抽搐，然后离开佢嘅身体。 27 大家都好惊讶，议论纷纷，佢哋话：“点会噉㗎？佢嘅教导方式真系与众不同呀！*呢个人竟然有权驱逐邪灵*，而邪灵又服从佢㖞。” 28 好快，关于耶稣嘅事传开咗，成个加利利都知道。

29 离开会堂之后，耶稣、雅各仲有约翰就跟住西门同埋安得烈一齐去咗佢哋两个人嘅屋企。 30 西门嘅外母当时瞓喺度，发紧烧，佢哋就即刻话俾耶稣知。 31 耶稣行埋去，捉住佢只手，扶佢起身，佢就退咗烧，然后佢为大家准备食物。

32 到咗傍晚，日落之后，民众开始将病人同埋受邪灵操纵嘅人，都带去耶稣嗰度。 33 全城嘅人都聚集喺嗰间屋嘅门外。 34 耶稣医好咗各种各样嘅病人，又驱逐咗好多邪灵，不过佢唔俾啲邪灵讲关于佢嘅嘢，因为邪灵知道佢就系基督*。

35 一朝早，天仲未光，耶稣起身，去到外面偏僻嘅地方，喺嗰度祷告。 36 西门同其他门徒四周围去揾佢， 37 揾到耶稣之后，就同佢讲：“个个都揾紧你呀。” 38 耶稣就同佢哋讲：“我哋去第二度，去附近啲城镇啦。我要去埋嗰度传道，因为我嚟就系为咗做呢件事。” 39 佢就去匀全个加利利，喺唔同会堂传道，又驱逐邪灵。

40 有一个麻风病人去到耶稣嗰度，跪低恳求佢话：“只要你愿意，就可以令我好返㗎喇*。” 41 耶稣好同情佢，就伸只手出嚟摸佢，话：“我好愿意！你好返啦。” 42 佢嘅麻风即刻消失，完全好返。 43 嗰个人离开之前，耶稣郑重噉吩咐佢， 44 话：“唔好话俾任何人知。不过，要去揾祭司，俾佢哋检查吓，亦都要献上摩西法典规定嘅祭物，证明*你已经好返。” 45 点知，佢走咗之后周围同人讲，将呢件事传开去。结果，耶稣唯有留喺城外面偏僻嘅地方，因为佢入城嘅话会引起好多人关注。但系民众都系继续由唔同地方嚟到揾耶稣。