马太福音

10 耶稣召集12个门徒，赐权力俾佢哋驱逐邪灵*，同埋医好人各种各样嘅病。

2 以下系12个使徒*嘅名：首先系叫做彼得嘅西门同埋佢嘅兄弟安得烈，西庇太嘅仔雅各同埋佢嘅兄弟约翰， 3 腓力同埋巴多罗买，多马同埋收税人马太，亚勒腓嘅仔雅各，仲有达太， 4 热心人西门，同埋加略人犹大。犹大就系后嚟出卖耶稣嘅嗰个人。

5 耶稣派呢12个人出去，仲俾咗啲指示佢哋话：“你哋唔好去外族人嘅地方*，唔好入撒马利亚人嘅城； 6 反而要继续去以色列民族嗰度揾走失嘅绵羊。 7 你哋要一路行一路传道，同人讲：‘天上嘅王国就快到嘞。’ 8 要医好病人，复活死人，令麻风病人洁净，驱逐邪灵。你哋免费噉得到，亦都要不求回报噉施与。 9 你哋唔使放金、银或者铜币落装钱嘅腰带， 10 亦都唔使为旅途准备食物*，因为工人得到食物，系应该㗎。你哋亦都唔使额外带多件衫*、鞋或者手杖。

11 “无论你哋入边一座城、边一条村，都要揾乐意听呢个信息嘅人出嚟，住喺佢哋嗰度，直到离开。 12 你哋入咗边间屋，就要问候嗰家人*。 13 如果佢哋乐意接受呢个信息，噉佢哋就有平安*嘞；如果佢哋唔接受，噉你哋求嘅平安就属于你哋嘞。 14 无论边个唔接待你哋，唔听你哋讲，你哋离开嗰间屋，嗰座城嘅时候，都要扽走脚上面嘅尘土*。 15 我可以好肯定噉同你哋讲，喺审判日，所多玛同埋蛾摩拉经历嘅，都比嗰座城容易呀。

16 “而家我派你哋出去，噉你哋就好似绵羊入咗去狼群当中。所以你哋要好似蛇一样谨慎，好似鸽子一样清白无邪。 17 你哋要警惕*，因为啲人会将你哋交俾地方法庭，仲会喺佢哋嘅会堂鞭打你哋。 18 你哋会因为我被带去总督同埋君王面前，向佢哋仲有呢个世界嘅人作见证。 19 不过佢哋送你哋去受审嗰阵，唔使担心要讲啲乜嘢或者点样讲。到时，你哋就会知道应该讲啲乜嘢*， 20 因为讲说话嘅，其实唔系你哋自己，而系你哋天父嘅神圣力量通过你哋讲说话。 21 兄弟会交兄弟出嚟，爸爸会交仔女出嚟，令到佢哋俾人杀死；仔女会同父母作对，害死佢哋。 22 你哋会因为我嘅名俾所有人憎恨，但系忍耐到底嘅人一定会得救。 23 佢哋喺一座城迫害你哋嘅话，你哋就走去另一座城。我可以好肯定噉同你哋讲，喺人子嚟到之前，你哋一定去唔晒以色列所有城。

24 “啲人对待学生唔会好过老师，对待奴隶唔会好过主人。 25 啲人点样对待老师就会点样对待学生，点样对待主人就会点样对待奴隶*。家主都俾人叫做魔鬼*嘅话，噉更何况佢屋企里面嘅人呢？ 26 所以，唔好惊佢哋。因为隐藏嘅事一定会显露出嚟，秘密亦都一定会俾人知道。 27 我私下话俾你哋听嘅，你哋要公开同人讲；我细细声话俾你哋知嘅，你哋要喺屋顶广传开去。 28 嗰啲可以杀死你，但系阻止唔到你喺将来有返生命*嘅，你哋唔使惊；能够令到你喺欣嫩谷*被毁灭嘅嗰一位，你哋先要惊。 29 两只麻雀唔系卖一个小钱*咩？但系，就算其中一只跌咗落地下*，你哋嘅爸爸都一定知道。 30 其实，佢连你哋嘅头发都全部数过晒。 31 所以唔使惊，比起啲麻雀，你哋贵重好多！

32 “边个公开承认佢系我嘅门徒，我都会喺天父面前承认佢系我嘅门徒。 33 但系边个喺人面前唔认我，我都会喺天父面前唔认佢。 34 唔好以为我嚟系要为大地带嚟和平*；我嚟唔系要带嚟和平，而系要带嚟刀剑。 35 我嚟系要引起分裂：仔要对抗爸爸，女要对抗妈妈，心抱要对抗奶奶。 36 敌人会系自己屋企嘅人。 37 边个对父母同仔女嘅感情深过对我嘅感情，就唔配做我嘅门徒。 38 边个唔愿意背负自己嘅苦刑柱嚟跟随我，就唔配做我嘅门徒。 39 边个想得到生命，就会失去生命；边个为咗我失去生命，就会得到生命。

40 “边个接待你哋，就等于接待我；边个接待我，就即系接待派我嚟嘅嗰一位。 41 上帝会奖赏先知同埋代表上帝嘅人*，边个由于佢哋系上帝嘅仆人而接待佢哋，都会得到同佢哋一样嘅奖赏。 42 我好肯定噉话俾你哋知，边个善待我嘅门徒当中一个平凡嘅人*，就算只系俾一杯清凉嘅水佢饮，呢个人都一定会得到奖赏*。”