马太福音

17 六日之后，耶稣净系带住彼得、雅各同埋雅各嘅兄弟约翰，一齐上咗一座好高嘅山。 2 耶稣喺佢哋面前改变形貌，佢块面好似太阳咁光，件衫亦都好似光咁灿烂*。 3 突然间，摩西同以利亚喺佢哋面前出现，同耶稣讲说话。 4 彼得就同耶稣讲：“主啊，我哋喺度真系好。如果你想嘅话，我就喺呢度搭三个帐幕，一个俾你，一个俾摩西，一个俾以利亚。” 5 佢仲讲紧嘢嘅时候，突然有一嚿好光嘅云笼罩住佢哋，有声音喺云入面发出，话：“呢个系我嘅仔，系我深爱㗎，系我认可*㗎。你哋要听从佢。” 6 门徒听到，就好惊，跪低下拜。 7 跟住耶稣行过嚟，拍一拍佢哋话：“起身啦，唔使惊。” 8 佢哋岳高头，净系见到耶稣，冇见到其他人。 9 佢哋落山嗰阵，耶稣吩咐佢哋：“喺人子死而复生之前，唔好将呢个异象*话俾任何人知。”

10 门徒问耶稣：“点解啲抄经士话以利亚一定会早过基督嚟嘅？” 11 耶稣回答：“以利亚一定会嚟，而且会准备好一切。 12 但系我话俾你哋知，以利亚其实已经嚟咗，只不过啲人认唔出系佢*，反而任意恶待佢。同样，佢哋都会令人子受苦。” 13 噉门徒先至明白，耶稣同佢哋讲紧嘅系施浸者约翰。

14 佢哋行近人群，有个人行去耶稣嗰度，向佢下跪，佢话： 15 “主啊，求你可怜吓我个仔吖！佢患咗癫痫，而且发作嗰阵成日跌落火，或者跌落水。 16 我带过佢去见你嘅门徒，但系佢哋都医唔好佢。” 17 耶稣回答：“呢一代又冇信心又腐败嘅人呀，我要同你哋一齐到几时呢？我要容忍你哋几耐呢？将佢带嚟我呢度啦。” 18 耶稣斥责邪灵，邪灵就喺个男仔里面出嚟，个男仔就喺嗰个时候好返嘞。 19 之后门徒私下去揾耶稣，问佢：“点解我哋赶唔到呢个邪灵出去嘅？” 20 耶稣同佢哋讲：“因为你哋唔够信心。我可以好肯定噉同你哋讲，就算你哋嘅信心，得芥菜种子咁细，你哋吩咐呢座山，‘由呢度移去嗰度’，山都会移开。噉对你哋嚟讲，冇乜嘢系冇可能㗎嘞。” 21 －－－*

22 门徒喺加利利聚集嘅时候，耶稣同佢哋讲：“人子会俾人出卖，落喺敌人嘅手， 23 佢会俾人杀死，喺第三日复活。”门徒听到就好忧愁。

24 佢哋去咗迦百农之后，有啲负责收圣殿税*嘅人嚟揾彼得，问佢：“你嘅老师唔交圣殿税㗎咩？” 25 彼得话：“交嘅。”但系佢一入到屋，耶稣就问佢：“西门，你觉得呢？统治者系向边个征收物品税或者人头税㗎呢？系向仔吖？定系向外人呢？” 26 彼得话：“向外人啰。”耶稣就同佢讲：“噉即系话，仔其实系免税㗎。 27 不过，为咗唔冒犯呢啲人*，你要去海边用鱼钩钓鱼，然后拎起第一条钓到嘅鱼，打开佢嘅口，你就会见到一个银币*。攞去俾佢哋，为我同埋你自己交税啦。”