马太福音

27 到咗朝早，所有祭司长同埋人民嘅长老一齐商量点样处死耶稣。 2 佢哋绑起耶稣，押佢去总督彼拉多嗰度。

3 嗰个时候，出卖耶稣嘅犹大见耶稣被定咗死罪，就觉得后悔，将嗰30块银币俾返祭司长同长老， 4 佢话：“我出卖咗无辜嘅人*，犯咗罪呀。”佢哋话：“噉系你自己嘅事啫！关我哋咩事呀？” 5 犹大就将啲钱揼低喺圣殿，之后就出去上吊自杀。 6 嗰啲祭司长拎走啲银币，话：“唔可以将呢啲钱放入圣殿嘅宝库，因为呢啲钱系沾满咗鲜血㗎*。” 7 佢哋商量之后，就用嗰啲钱买咗一块地，用嚟埋葬外地嚟嘅人。 8 所以嗰块地叫做“血地”，直到今日。 9 呢个实现咗耶利米先知嘅话：“佢哋拎咗30块银币，呢个系为嗰个人定嘅价钱，喺以色列人眼中，佢就系值呢个价嘞。 10 佢哋用嗰笔钱买咗块地，就好似耶和华*吩咐我嘅一样。”

11 耶稣企喺总督面前，总督问佢：“你系咪犹太人嘅王呀？”耶稣回答：“冇错，我系*。” 12 但系佢俾祭司长同长老指控嘅时候，就乜嘢都冇回应。 13 于是彼拉多同佢讲：“佢哋指控你咁多嘢，你听唔到咩？” 14 但系耶稣冇回答，连一句话都冇讲，呢个令总督好意外。

15 每逢逾越节都有个惯例，总督会按照人民嘅意思，释放一个囚犯。 16 当时有个臭名远播嘅囚犯，叫做巴拉巴。 17 民众聚集嘅时候，彼拉多问佢哋：“你哋想我释放边一个呀？系巴拉巴，定系嗰个所谓基督嘅耶稣呀？” 18 其实彼拉多知道，佢哋系出于妒忌先至将耶稣交俾佢。 19 加上佢坐喺审判座嗰阵，佢太太派人嚟同佢讲：“同嗰个正义嘅人有关嘅事，你都系唔好插手喇，我因为佢发咗个恶梦，今日好辛苦呀。” 20 不过祭司长同长老就说服民众去要求释放巴拉巴，处死耶稣。 21 总督回应佢哋，话：“呢两个人，你哋想我释放边个呀？”佢哋话：“巴拉巴。” 22 彼拉多同佢哋讲：“噉嗰个所谓基督嘅耶稣，我点样处置好呀？”佢哋全部都话：“喺木柱度处死佢！” 23 彼拉多话：“点解呀？佢做咗咩坏事呢？”不过，啲民众就嗌得更加大声，话：“喺木柱度处死佢！”

24 彼拉多睇情势见再讲落去都冇用，仲可能会引起骚乱，就喺民众面前用水洗手。佢话：“呢个人嘅死系唔关我事㗎*。你哋要为呢件事负责。” 25 所有人都话：“佢嘅死由我哋同我哋啲子孙负责啦*。” 26 于是彼拉多释放巴拉巴，又叫人鞭打耶稣，然后带走佢，喺木柱度处决佢。

27 嗰个时候，总督嘅士兵将耶稣带入去总督府，又召集全体士兵到耶稣身边。 28 佢哋剥咗佢件衫，攞咗件鲜红色嘅袍搭喺佢身上， 29 用荆棘整咗个王冠戴喺佢头上面，又放一枝芦苇喺佢右手。佢哋跪喺佢面前，嘲笑佢，话：“你好呀，犹太人嘅王*！” 30 佢哋向耶稣吐口水，又攞返枝芦苇嚟打佢嘅头。 31 佢哋嘲笑完，就剥走嗰件鲜红色嘅袍，同佢着返原本嘅外袍，押佢走，准备钉佢喺木柱度。

32 佢哋离开座城嘅时候，见到一个昔兰尼人叫做西门。佢哋迫呢个人，孭起耶稣嘅苦刑柱。 33 佢哋去到一个叫做各各他嘅地方（呢个名嘅意思系“骷髅头”）。 34 佢哋攞沟咗胆汁嘅酒俾耶稣饮。佢试咗试之后，就唔肯饮。 35 佢哋将耶稣钉喺木柱之后，就抽签分佢嘅外袍， 36 又坐喺嗰度看守佢。 37 佢哋仲喺佢头上面嘅地方安咗个牌，写明罪状系“呢个系犹太人嘅王耶稣”。

38 嗰个时候，有两个强盗钉喺佢侧边嘅木柱，一个喺佢右边，一个喺佢左边。 39 路过嘅人拧拧头，羞辱佢， 40 话：“你话要拆毁圣殿，三日之内起返吖嘛，你救吓自己啦！如果你系上帝嘅仔，咪喺苦刑柱度落返嚟啰！” 41 嗰啲祭司长同抄经士，仲有长老都系噉样嘲笑佢，话： 42 “佢救到人哋，但系救唔到自己㖞！佢系以色列嘅王吖嘛，等佢而家喺苦刑柱度落返嚟，我哋咪信佢啰。 43 佢唔系好信赖上帝，仲话：‘我系上帝嘅仔’咩？如果上帝想帮佢，而家就会救佢啦。” 44 连喺佢隔篱木柱上面嘅强盗都系噉样羞辱佢。

45 由中午12点*开始，直到下昼3点*，整个地区都漆黑一片。 46 下昼3点左右，耶稣大声话：“以利，以利，拉马·萨巴克塔尼？”意思即系：“我嘅上帝，我嘅上帝，点解你离弃我呢？” 47 企喺嗰度嘅人有啲听到就话：“呢个人嗌紧以利亚！” 48 有个人即刻跑去攞酸酒浸湿块海绵，绑喺一枝秆度，递俾佢饮。 49 不过其他人话：“唔好理佢啦！咪睇下以利亚会唔会嚟救佢啰。” 50 耶稣再次大嗌，跟住就断咗气。

51 突然间，圣殿嘅帷幔*由上而下裂开两边，大地震动，岩石裂开。 52 墓穴都震开咗，好多已经长眠嘅圣民，佢哋嘅尸体都震埋出嚟， 53 有好多人都见到。（有啲曾经路过墓穴一带嘅人，喺耶稣复活之后，入咗去圣城*。） 54 军官同埋其他一齐看守耶稣嘅人，见到地震同埋发生嘅事，就非常之惊，佢哋话：“佢真系上帝嘅仔呀。”

55 嗰度仲有好多妇女离远睇住呢啲事发生。佢哋系由加利利一路跟住耶稣，服侍佢㗎。 56 当中有末大拉人马利亚，雅各同约西嘅妈妈马利亚，同埋西庇太嘅仔嘅妈妈。

57 到咗傍晚，有个叫做约瑟嘅富翁嚟到，佢系嚟自亚利马太㗎，佢亦都系耶稣嘅门徒。 58 呢个人去见彼拉多，想攞返耶稣嘅遗体。于是彼拉多吩咐人交俾佢。 59 约瑟攞咗遗体，用干净嘅上等细麻布包好， 60 安放喺佢由岩石凿出嚟嘅新墓穴嗰度，呢个墓穴系佢拥有嘅。佢推咗一嚿大石去墓穴嘅门口之后就走咗嘞。 61 而末大拉人马利亚同埋另一个马利亚就继续留喺嗰度，坐喺坟墓前面。

62 第二日，亦即系预备日之后嘅嗰日，祭司长同法利赛派嘅人一齐嚟见彼拉多， 63 话：“大人，我哋醒起嗰个骗子生前讲过：‘三日之后，我会复活。’ 64 所以，求你吩咐人严密看守个墓，直到第三日，费事佢啲门徒嚟偷走佢嘅尸体，然后同啲民众讲：‘佢已经死而复生嘞！’噉到时，最后嘅呢个骗局就仲衰过最初嘅嗰个喇。” 65 彼拉多同佢哋讲：“你哋带守卫去啦。用尽办法，严密噉看守。” 66 佢哋就用印封住墓穴口嘅石头，派守卫严密看守坟墓。