读者来函

关于耶稣早期嘅生活，点解马太同路加嘅记载有出入？

关于耶稣早期嘅生活，马太同路加嘅记载有出入，系因为福音书嘅执笔者讲述嘅角度唔一样。

马太嘅记载主要同约瑟有关。记载提及到约瑟一听到马利亚怀孕嘅反应；天使喺约瑟梦中解释原因；约瑟接受咗呢件事。（马太福音1:19-25）马太继续提到，约瑟梦见天使叫佢尽快逃去埃及；佢带住家人迅速离开；佢又梦见天使叫佢返翻以色列；返到以色列之后，佢决定同家人喺拿撒勒定居。（马太福音2:13,14,19-23）喺马太福音开头嗰几章，约瑟嘅名出现咗12次，而马利亚嘅名只出现咗6次。

另一方面，路加嘅记载更多系同马利亚有关嘅。记载包括天使加百列探访马利亚；马利亚拜访佢嘅亲戚伊利莎白；马利亚对耶和华嘅赞美。（路加福音1:26-56）路加亦都提到西缅向马利亚预告耶稣将来会遭受苦难。甚至喺耶稣12岁嗰年全家人上圣殿嘅记载里面，路加记述嘅系马利亚讲嘅话，而唔系约瑟嘅。路加仲提到呢啲事深深噉影响咗马利亚。（路加福音2:19,34,35,48,51）喺路加福音开头嗰两章，马利亚嘅名出现咗15次，而约瑟嘅名只出现咗4次。所以，马太所描述嘅，更多嘅系约瑟所做所关心嘅事，而路加喺马利亚所担任嘅角色同经历方面，提供更多嘅细节。

同样，福音书嘅两个执笔者所记录嘅家谱有少少区别。马太追溯嘅系约瑟嘅家系，表明耶稣身为约瑟嘅养子，系大卫王权嘅合法继承人。点解噉讲？因为约瑟系大卫王嘅仔所罗门嘅后代。（马太福音1:6,16）不过，路加追溯嘅系马利亚嘅家系，表明“按血统嚟讲”，耶稣系大卫王权血统上嘅继承人。（罗马书1:3）点解噉讲呢？因为马利亚系大卫王嘅仔拿单嘅后代。（路加福音3:31）但系，点解路加喺佢记载嘅家谱里面冇将马利亚列为希里嘅女呢？因为按照惯例，家谱记录嘅都系男子嘅名。所以，路加将约瑟列为希里嘅仔，其实意思系指约瑟系希里嘅女婿。（路加福音3:23）

马太同路加列出嘅家谱证实咗耶稣就系预言所讲嘅弥赛亚。事实上，耶稣家谱嘅真实性广为人知，甚至连法利赛派同撒都该派都唔能够否认。今日，马太同路加记载嘅家谱成为咗我哋信心嘅一个基础，亦提供咗证据表明上帝嘅应许一定会实现。