耶稣基督系边个？

1．耶稣系从边度嚟嘅呢？

耶稣同地上嘅人唔一样，佢系个天使，本来住喺天上，后来降世为人。（约翰福音8:23）耶稣系上帝最先创造嘅，只有佢系上帝亲手创造，其余万物都系耶稣按照上帝嘅吩咐创造出嚟，所以圣经话耶稣系上帝嘅“独生子”；耶稣系上帝嘅首要代言人，所以佢亦都称为“话语”。（约翰福音1:14） 请读箴言8:22,23,30；歌罗西书1:15,16

2．点解耶稣要嚟到地上？

上帝派耶稣嚟到地上，将耶稣嘅生命由天上转移到犹太处女马利亚嘅腹中，使佢降生为人。所以，耶稣嘅爸爸唔系地上嘅任何人。（路加福音1:30-35）耶稣嚟到地上，系要（1）教人认识上帝嘅真理；（2）为我哋立下榜样，就算面对困难，依然遵行上帝嘅旨意；（3）献出完美嘅生命作为“赎价”。 请读马太福音20:28

3．点解我哋需要赎价？

赎价系为咗救人脱离死亡而付出嘅代价。（出埃及记21:29,30）人衰老死亡唔系上帝原本嘅旨意。我哋点知呢？上帝话俾人类嘅始祖亚当知，如果佢犯“罪”，就会死。即系话，如果当初亚当唔犯罪，佢就唔会死。（创世记2:16,17；5:5）圣经话死亡系通过亚当“进入世间”嘅。因为亚当犯咗罪，而罪嘅代价就系死亡，亚当将罪同死遗传俾佢所有后代，所以我哋需要赎价先可以摆脱死亡。 请读罗马书5:12；6:23

边个可以付出赎价，救我哋脱离死亡呢？既然人人都系唔完美，都有罪，所以一个人死，只系为自己嘅罪付出代价，而唔能够为其他人嘅罪付出代价。 请读诗篇49:7-9

4．点解耶稣需要死？

耶稣同人唔一样，佢系完美嘅，从来冇犯过罪，所以唔使为自己嘅罪而死。上帝派佢嘅独生子耶稣嚟到地上，系要为我哋牺牲生命，噉表明上帝好爱我哋。耶稣听天父嘅话，甘愿献出生命，为我哋嘅罪付出赎价，噉表明佢亦都好爱我哋。 请读约翰福音3:16；罗马书5:18,19

请观看短片《点解耶稣要牺牲生命？》

5．耶稣而家做紧乜嘢呢？

耶稣喺地上嗰时，医好有病嘅人，复活死咗嘅人，又帮助受苦嘅人。呢一切表明，将来佢可以点样造益所有服从上帝嘅人。（马太福音15:30,31；约翰福音5:28）耶稣死咗之后，上帝使佢复活，成为大能嘅天使。（彼得前书3:18）之后，佢就坐喺上帝嘅右边，等候上帝赐王权俾佢，统治地球。（希伯来书10:12,13）今日，耶稣已经喺天上作王，而佢嘅门徒就喺世界各地传讲呢个好消息。 请读但以理书7:13,14；马太福音24:14

好快，君王耶稣就会消灭坏人，唔会再有苦难嘞。如果人对耶稣表现信心，服从佢，就可以喺地上嘅乐园里面享受生命。 请读诗篇37:9-11