点样先至能够同上帝做朋友？

1．系咪所有祷告上帝都会听呢？

上帝请所有国家民族嘅人向佢祷告，同佢做朋友。（诗篇65:2）就算一个人做咗好多错嘅事，只要愿意改过，上帝都会听佢嘅祷告。不过，唔系每个祷告佢都会听。譬如话，如果一个丈夫对妻子唔好，上帝就唔会听佢嘅祷告。（彼得前书3:7）另外，如果一个人经常做坏事，唔肯改过，就好似古代嘅以色列人噉，上帝亦唔会听佢嘅祷告。所以，能够向上帝祷告真系一种福分，我哋应该好好珍惜。 请读以赛亚书1:15；55:7

请观看短片《上帝会垂听所有人的祷告吗？》

2．我哋应该点样祷告？

祷告系崇拜嘅一部分。我哋崇拜嘅系创造主耶和华上帝，所以应该只系向佢祷告。（马太福音4:10；6:9）另外，我哋应该通过耶稣嘅名祷告，因为佢为我哋嘅罪献出生命。（约翰福音14:6）上帝钟意我哋祷告嗰阵讲出心里面嘅话，而唔系每次都重重复复讲相同嘅嘢。 请读马太福音6:7；腓立比书4:6,7

我哋喺心里面祷告，就算冇讲出声，上帝都听得到。（撒母耳记上1:12,13）上帝钟意我哋喺咩时候向佢祷告呢？几时都可以，例如朝早起身之后、夜晚瞓觉之前、食饭前或者遇到困难嗰阵。 请读诗篇55:22；马太福音15:36

3．点解我哋要聚集一齐崇拜上帝？

可能你觉得同上帝做朋友并唔容易，因为我哋身边嘅好多人唔相信上帝，亦唔相信佢会为世界带嚟和平，甚至会取笑我哋。（提摩太后书3:1,4；彼得后书3:3,13）所以，我哋要同真基督徒来往，互相鼓励。 请读希伯来书10:24,25

同爱上帝、对上帝有信心嘅人来往，可以帮助我哋成为上帝嘅朋友。你参加耶和华见证人嘅聚会，就可以揾到噉样嘅人，得到鼓励。 请读罗马书1:11,12

4．想同上帝做朋友，就要点样做？

想同上帝做朋友，你就要加深对上帝嘅认识。你仔细思考喺圣经入面学到嘅知识，例如上帝做过嘅事、提出嘅劝告同作出嘅承诺，就会更加明白上帝系几咁有爱心，几咁有智慧。 请读约书亚记1:8；诗篇1:1-3

你对上帝有信心，信赖佢，先至可以同佢建立亲密嘅关系。就好似小朋友要食多啲嘢先至会长大，你都要经常读圣经，谂吓圣经点解值得相信，噉就能够加强你对上帝嘅信心。 请读马太福音4:4；希伯来书11:1,6

5．同上帝做朋友有几重要？

上帝关心所有爱佢嘅人。佢可以保护我哋，使我哋唔会失去信心同永远生活落去嘅希望。（诗篇91:1,2,7-10）上帝提醒我哋边啲事系有害嘅，使我哋可以生活得健康快乐。佢指引我哋过最幸福嘅生活。 请读诗篇73:27,28；雅各书4:4,8