第17章
培训王国传道员
1-3．（甲）耶稣点样扩大传道工作嘅规模？（乙）我哋跟住会解答边啲问题？
耶稣用咗大约两年嘅时间行匀加利利，向人传道。（请读马太福音9:35-38）佢去过好多城镇同乡村，传讲王国嘅好消息，又喺犹太会堂里面教导人。无论佢喺边度传道，都有一大班人围住佢。耶稣话，“庄稼的确好多”，需要多啲工人。
2 耶稣点样扩大传道工作嘅规模呢？佢差12个使徒“去传讲上帝嘅王国”。（路加福音9:1,2）耶稣曾经受到天父训练，而家佢都好乐意训练使徒。耶稣知道使徒可能唔系好清楚要点样传道，所以差使徒出去之前，先培训佢哋。
3 你可能会问：耶稣喺天父嗰度受过乜嘢培训？佢又点样培训使徒呢？作为弥赛亚君王，今日佢有冇培训门徒执行传道工作呢？点样培训？
“我讲嘅呢啲话，同父亲教我嘅一样”
4．天父几时开始教导耶稣？喺边度教呢？
4 耶稣清楚表明自己系受天父教导嘅。佢喺地上传道嗰时曾经讲过：“我讲嘅呢啲话，同父亲教我嘅一样。”（约翰福音8:28）天父几时开始教导耶稣？喺边度教呢？耶稣系上帝嘅头生子，好可能天父创造佢之后冇几耐，就开始教导佢嘞。（歌罗西书1:15）耶稣喺天上同天父相处咗无数岁月，佢嘅爸爸系“伟大导师”，佢一边观察爸爸，一边听爸爸嘅教导。（以赛亚书30:20）耶稣受到无与伦比嘅教育，认识到天父嘅特质、作为同旨意。
5．耶和华俾乜嘢指示佢个仔，教导佢喺地上执行传道工作？
5 耶和华教导耶稣应该点样喺地上执行传道工作。圣经用一个预言描述伟大导师同佢头生子之间嘅关系。（请读以赛亚书50:4,5）预言话，耶和华“每日朝早”都叫醒个仔。就好似一位老师一早叫醒个学生，为咗教导佢。一本圣经参考书话：“耶和华……就好似一位老师喺学校教导学生一样，教导耶稣要传讲乜嘢信息，同埋点样传讲。”喺天上嘅“学校”，耶和华教佢个仔要“讲乜嘢，话乜嘢”。（约翰福音12:49）耶和华仲指示佢个仔应该点样教导其他人。a耶稣喺地上嗰时学以致用，除咗自己传道之外，仲培训门徒，为咗帮佢哋好好执行传道工作。
6,7．（甲）耶稣点样培训使徒？（乙）呢啲培训装备好佢哋执行乜嘢工作？（丙）今日，耶稣确保我哋得到乜嘢培训？
6 本章开头提到，耶稣差使徒去传道之前先培训佢哋。系咩培训呢？马太福音第10章记载，耶稣喺传道方面提出清晰嘅指示，包括：去边度传道（第5,6节）；传讲乜嘢信息（第7节）；要信赖耶和华（第9,10节）；点样对待传道对象（第11-13节）；俾人拒绝嗰时应该点做（第14,15节）；面对迫害嗰时应该点做（第16-23节）。b耶稣具体噉指导佢嘅使徒，装备好佢哋喺1世纪做传道先锋，宣扬上帝王国嘅好消息。
7 今日又点样呢？上帝王国嘅君王耶稣吩咐门徒，将王国嘅好消息“传遍普天下，对所有国族作见证”。（马太福音24:14）噉耶稣有冇培训我哋去执行呢件最重要嘅工作呢？当然有。佢喺天上指引门徒，确保我哋得到训练，帮助我哋知道应该点样喺地区里面传道，亦都知道应该点样喺会众里面履行各种职责。
培训传福音者
8,9．（甲）传道训练班嘅主要目的系乜嘢？（乙）周中聚会点样帮助你更有效噉传道？
8 过去咁多年嚟，耶和华嘅组织一直通过大会同聚会，训练上帝嘅子民执行传道工作，传道工作聚会就系个例子。由上世纪40年代开始，喺总部带头嘅弟兄亦都开始举办各种训练班。
9 传道训练班 正如上一章指出，呢个训练班喺1943年成立。呢个训练班嘅目的系咪只系帮助人喺会众里面提高演讲嘅质素呢？唔系嘅。佢嘅主要目的系训练耶和华嘅子民善用讲话嘅恩赐嚟赞美佢，帮助所有学员有效噉传讲王国嘅好消息。（诗篇150:6）今日，弟兄姊妹都可以从周中聚会得到噉样嘅训练。
10,11．（甲）而家边啲人可以去基列学校？（乙）基列学校课程目的系乜嘢？
10 守望台基列圣经学校 呢个学校喺1943年2月1日星期一开始，本来系培训先驱同其他全时仆人去海外传道。但系，由2011年10月开始，只有参与特别全时服务嘅人，先至可以去基列学校受训，呢啲人包括特别先驱、探访会众嘅监督同埋佢哋嘅妻子、伯特利成员，仲有未去过基列学校嘅特派传道员。
11 基列学校课程有咩目的？一位资深嘅导师回答：“课程会帮学员通过钻研圣经嚟强化信心，帮佢哋培养需要嘅属灵特质，可以应付喺岗位上遇到嘅各种挑战。课程另一个主要目的系令学员更加热心去传福音。”（以弗所书4:11）
12,13．基列学校对全球嘅传道工作有乜嘢贡献？请举例。
12 基列学校对全球嘅传道工作有乜嘢贡献呢？自从1943年以来，超过8500个学员喺基列学校受训，毕业生被派到170几个国家同地区传道。c呢啲特派传道员学以致用，热心传道，仲用自己学到嘅嚟训练其他人。好多特派传道员被派去只有少数传道员甚至冇传道员嘅地区服务。
13 以日本为例。第二次世界大战期间，当地嘅公开传道工作停止咗。直到1949年8月，日本嘅传道员唔够10个。但系，到咗年底，有13个受过基列学校培训嘅特派传道员喺当地努力传道，后来有更多特派传道员去到日本。起初，佢哋集中喺大城市传道，后来仲去埋其他城市。呢啲特派传道员热心鼓励圣经学生同埋其他人做先驱。佢哋嘅努力冇白费，反而得到好好嘅成果。而家，日本有超过21万6000个王国传道员，有将近百分之40嘅人做先驱！d
14．组织举办嘅训练班充分证明咗乜嘢？（另见188页附栏“培训王国传道员嘅各种训练班”）
14 其他训练班 先驱训练班、基督徒夫妇圣经研习班，同埋独身弟兄圣经研习班，曾经帮助学员喺灵性上进步，同埋带头热心传道。e呢啲训练班充分证明，我哋嘅君王的确帮助门徒装备齐全执行任务。（提摩太后书4:5）
培训弟兄执行重任
15．有职责嘅弟兄好想点样效法耶稣？
15 以赛亚嘅预言提到耶稣受上帝教导。耶稣喺天上嘅“学校”学识“用良言回答疲乏嘅人”。（以赛亚书50:4）佢喺地上嗰时，将所学到嘅应用出嚟，使“辛苦劳碌、担子沉重嘅人”重新得力。（马太福音11:28-30）有职责嘅弟兄好想效法耶稣，鼓励弟兄姊妹，使佢哋得到力量。为咗达到呢个目的，组织为嗰啲符合资格嘅弟兄举办唔同嘅训练班，帮助佢哋更有效噉为同工服务。
16,17．王国职务训练班嘅目的系乜嘢？（另见脚注）
16 王国职务训练班 1959年3月9日，第一届王国职务训练班喺纽约南兰星镇举办。探访会众嘅监督同会众仆人（而家叫长老团协调人）可以参加呢个为期一个月嘅课程。起初，王国职务训练班课程净系用英语举行，后来亦都用其他语言举行，世界各地越来越多弟兄都可以受到培训。f
1970年，劳埃德·巴雷弟兄喺日本做王国职务训练班嘅导师
17 《1962耶和华见证人年鉴》（英语）指出王国职务训练班嘅目的，话：“喺呢个忙碌嘅世界里面，耶和华见证人会众嘅监督一定要识得好好安排自己嘅生活，先可以照顾到会众每一个成员，造福佢哋。同时，监督亦都应该思想健全，唔可以因为会众嘅事务而忽略屋企人。世界各地嘅会众仆人聚埋一齐参加王国职务训练班，接受培训，就可以按照圣经嘅要求履行监督嘅职责，呢个真系一个好好嘅机会啊！”（提摩太前书3:1-7；提多书1:5-9）
18．王国职务训练班点样造福上帝嘅所有子民？
18 上帝所有嘅子民都能够从王国职务训练班得益。点解噉讲呢？长老同助理仆人将学到嘅实践出嚟，就可以好似耶稣噉样，使同工得到力量。有冇长老或者助理仆人关心过你，对你讲过暖人心窝嘅话，听你倾诉或者探访你，使你受到鼓励呢？你系咪好感激佢哋呢？（帖撒罗尼迦前书5:11）呢啲符合资格嘅弟兄的确系会众嘅宝贵恩赐。
19．（甲）教导委员会仲督导边啲训练班？（乙）呢啲训练班嘅目的系乜嘢？
19 其他训练班 中央长老团嘅教导委员会仲督导其他训练班，培训组织里面有职责嘅弟兄，包括会众长老、探访会众嘅监督同分部委员会成员。呢啲训练班系要帮助佢哋更有效噉履行各种职责。呢啲以圣经为根据嘅课程，鼓励弟兄要喺灵性上保持强壮，同埋运用圣经原则，去牧养耶和华交俾佢哋照顾嘅宝贵绵羊。（彼得前书5:1-3）
2007年，马拉维嘅第一届组织事务训练班
20．（甲）点解耶稣话我哋所有人都系“受耶和华教导”？（乙）你决心点样做？
20 事实表明，弥赛亚君王确保门徒受到良好嘅培训。耶和华首先培训佢个仔耶稣，耶稣再培训门徒，所以，佢哋得到嘅培训都系从上头嚟嘅。难怪耶稣话我哋所有人都系“受耶和华教导”。（约翰福音6:45；以赛亚书54:13）等我哋一齐下定决心，接受君王嘅培训，从中得益。同时我哋要记得，呢啲训练嘅主要目的系要帮助我哋灵性强壮，使我哋可以彻底执行职务。
a 我哋点知道父亲教导儿子点样传道呢？请谂吓，耶稣教导人嗰时，用咗好多比喻，应验咗一个佢出世之前几百年就已经写好嘅预言。（诗篇78:2；马太福音13:34,35）由此可见，讲出呢个预言嘅耶和华上帝，早就决定要佢个仔用比喻同有含意嘅故事嚟教导人。（提摩太后书3:16,17）
b 几个月之后，耶稣“选立咗七十个人，差佢哋两个两个”出去传道，仲训练佢哋点样传道。（路加福音10:1-16）
c 有啲人去过唔止一次基列学校。
d 关于去过基列学校嘅特派传道员，对全球嘅传道工作有乜嘢贡献，详见《耶和华见证人——上帝王国的宣扬者》第23章。
e 后两个训练班已经俾王国传福音者训练班取代咗。
f 而家，王国职务训练班每隔几年都会举办，课程有长有短，所有长老都可以参加。由1984年开始，助理仆人都可以参加呢个训练班。