上帝想人过点样嘅生活？

1．上帝想人过点样嘅生活？

上帝想人有美好嘅生活。佢创造咗第一对男女亚当同夏娃，俾佢哋生活喺一个好似花园咁靓嘅环境。上帝嘅旨意系要佢哋生儿育女，照顾所有动物，使整个地球成为乐园。（创世记1:28；2:8,9,15）——请睇附注6

2．（甲）我哋点知道上帝会实现佢嘅旨意？（乙）上帝想咩人住喺地上？住几耐呢？

² 可以永远生活喺乐园，你觉得有冇可能呢？耶和华话：“我制定嘅事，一定会执行”。（以赛亚书46:9-11；55:11）冇错，耶和华要做嘅事一定会成功，冇嘢可以阻止佢实现自己嘅旨意。耶和华话佢创造地球系有目的嘅，佢“创造大地，唔系徒劳嘅”。（以赛亚书45:18）佢希望人类遍满大地。上帝想咩人住喺地上？住几耐呢？圣经话：“义人［服从上帝嘅人］必得着大地，永远喺地上安居。”（诗篇37:29；启示录21:3,4）

3．世上有咁多难题，你可能会有乜嘢疑问？

³ 但系今日人会病，会死亡。而且喺好多地方，人会自相残杀。呢啲肯定唔系上帝嘅旨意。噉究竟出咗咩问题呢？只有圣经可以解答。

上帝嘅一个仇敌

4,5．（甲）喺伊甸园，边个通过一条蛇同夏娃讲嘢？（乙）一个老实人点解会变成贼？

⁴ 圣经透露耶和华有一个仇敌“叫做魔鬼，又叫撒但”。撒但喺伊甸园用一条蛇同夏娃讲话。（启示录12:9；创世记3:1）撒但使夏娃误以为系条蛇同佢讲话。——请睇附注7

⁵ 魔鬼撒但系咪耶和华创造出嚟嘅呢？当然唔系！当上帝为亚当夏娃准备家园嘅时候，天使已经存在，其中一个天使后来变成魔鬼。（约伯记38:4,7）点解会噉嘅呢？试谂吓，一个老实人点解会变坏做贼？佢唔系生出嚟就系个贼，不过，如果佢不停谂住要得到一啲唔属于自己嘅嘢，错误嘅欲望就会越来越强烈，于是一有机会佢就采取行动。结果佢就变成个贼。（请读雅各书1:14,15）——请睇附注8

6．一个天使点解会成为上帝嘅仇敌呢？

⁶ 后来成为魔鬼撒但嘅嗰个天使就系噉样变坏嘅。耶和华创造亚当同夏娃之后，吩咐佢哋要生儿育女，“遍满地面”。（创世记1:27,28）呢个天使可能心谂：“所有人都崇拜我而唔系崇拜耶和华就好嘞！”佢越谂就越渴望得到本来只属于耶和华嘅崇拜，所以就讲大话呃咗夏娃。（请读创世记3:1-5）结果，呢个天使就沦为魔鬼撒但，成为上帝嘅仇敌。

7．（甲）点解亚当同夏娃会死？（乙）点解我哋都会衰老死亡？

⁷ 上帝曾经吩咐亚当同夏娃唔可以食伊甸园里面一棵树嘅果，如果食咗就会死。亚当同夏娃冇听从上帝，食咗呢棵树嘅果。（创世记2:17；3:6）佢哋蓄意背叛耶和华，结果正如耶和华所讲，最后佢哋都死去。（创世记3:17-19）因为亚当同夏娃嘅后代都有罪，所以佢哋都会死。（请读罗马书5:12）点解亚当同夏娃嘅后代都系有罪嘅人呢？举个例：如果一个饼模凹咗，噉整出嚟嘅饼都会有相同嘅凹痕。同样，亚当唔服从上帝，成为罪人。由于我哋系亚当嘅后代，我哋所有人都唔完美，都系有罪嘅人，就好似有“凹痕”嘅饼一样。所以，我哋都会衰老死亡。（罗马书3:23）——请睇附注9

8,9．（甲）撒但想亚当同夏娃相信乜嘢？（乙）点解耶和华冇即刻处决叛徒？

⁸ 当撒但诱使亚当夏娃唔服从上帝嘅时候，一场叛乱就开始嘞。撒但想亚当同夏娃以为耶和华讲大话，根本唔为佢哋着想，系一个自私嘅统治者。撒但嘅意思其实系：人唔需要上帝教佢哋点样做，可以自行决定乜嘢系啱乜嘢系错。噉耶和华点做呢？佢当时可以即刻处决呢啲叛徒，终止呢场叛乱。但系，噉样做系咪就可以证明撒但讲大话呢？唔可以。

⁹ 耶和华冇即刻处决叛徒。相反，佢容许人类用一段时间嚟统治自己，噉就可以证明撒但讲大话，亦都显出耶和华先至了解乜嘢对人类系最好嘅。关于呢点，本书第11章会有进一步解释。不过，你点睇亚当夏娃嘅决定呢？佢哋选择相信撒但而反叛上帝，系咪啱嘅呢？佢哋拥有嘅一切，都系嚟自耶和华嘅。耶和华赐俾佢哋完美嘅生命同一个美丽嘅家园，仲有称心如意嘅工作。但系，撒但就乜嘢好事都冇为佢哋做过。如果你系亚当夏娃嘅话，你会点做呢？

10．每个人都要作出乜嘢重要嘅决定呢？

¹⁰ 今日我哋每个人都要作一个决定，而且呢个决定生死攸关。我哋一系就选择服从耶和华嘅统治，出一份力证明撒但讲大话，一系就选择撒但作为我哋嘅统治者。（诗篇73:28；请读箴言27:11）世界上只有少数人服从上帝。事实上，统治紧世界嘅唔系上帝。如果唔系佢，又系边个呢？

边个统治紧世界？

11,12．（甲）从撒但引诱耶稣呢件事，可以睇出乜嘢？（乙）边啲经文表明撒但统治紧世界？

¹¹ 耶稣知道真正统治紧世界嘅系边个。有一次，撒但“将世上嘅万国同万国嘅荣耀都指俾佢睇”。之后，撒但向耶稣承诺：“你暂且俯伏崇拜我，我就将呢一切都俾你”。（马太福音4:8,9；路加福音4:5,6）试谂吓，如果万国唔属于撒但，佢又点可以将万国俾耶稣呢？显然，所有政府都系属于撒但嘅。

¹² 你或者会谂，撒但点可能系呢个世界嘅统治者呢？宇宙唔系全能嘅上帝耶和华创造嘅咩？（启示录4:11）冇错，耶和华的确系宇宙嘅创造者，但系耶稣清楚指出撒但系“统治全世界嘅王”。（约翰福音12:31；14:30；16:11）使徒保罗话魔鬼撒但系“现行制度嘅神”。（哥林多后书4:3,4）使徒约翰亦都话“全世界都受嗰个恶者控制”。（约翰一书5:19）

撒但嘅世界会点样被毁灭？

13．点解我哋需要一个新世界？

¹³ 呢个世界令人越来越冇安全感。好多地方都有战争同暴行，人越来越虚伪同腐败。无论人点努力，都唔能够完全解决所有问题。但系，上帝好快就会喺哈米吉多顿大战将呢个邪恶嘅世界铲除，以一个正义嘅新世界取而代之。（启示录16:14-16）——请睇附注10

14．上帝拣选边个做佢王国嘅君王？关于耶稣，圣经预告乜嘢？

¹⁴ 上帝会点样带嚟正义嘅新世界呢？就系通过佢天上嘅政府，即系上帝嘅王国。耶和华拣选耶稣做呢个王国嘅君王。两千几年前，圣经就预告咗耶稣会系“和平嘅领袖”，而且佢嘅政府会永远长存。（以赛亚书9:6,7）耶稣教导门徒为上帝嘅王国祷告，佢话：“愿你嘅王国来临。愿你嘅旨意喺地上实现，好似喺天上一样。”（马太福音6:10）本书第8章会解释，上帝嘅王国将来会点样成为统治全世界嘅唯一政府。（请读但以理书2:44）之后，上帝嘅王国会使地球成为一个乐园。——请睇附注11

新世界即将来临！

15．“新地”系指乜嘢？

¹⁵ 圣经话：“我哋等待新天新地，有正义住在其中。”。（彼得后书3:13；以赛亚书65:17）有时，圣经提到“地”，系指住喺地上嘅人。（创世记11:1）所以，正义嘅“新地”系指所有服从上帝同蒙佢赐福嘅人。

16．喺新世界，上帝会赐俾人乜嘢奖赏？要得到呢个奖赏，我哋要点做呢？

¹⁶ 耶稣话，生活喺上帝新世界嘅人可以得到“永生”。（马可福音10:30）如果想得到呢个奖赏，我哋要点做呢？请读约翰福音3:16同17:3，你就可以揾到答案。将来地上乐园嘅生活系点样嘅呢？我哋一齐嚟睇吓圣经点讲。

17,18．（甲）我哋点知道将来和平会遍及全球？（乙）点解喺乐园人人都可以得享安全？

¹⁷ 唔再有邪恶、战争、罪恶同暴行。喺新世界唔会再有邪恶嘅人。（诗篇37:10,11）上帝会“平息战争，直到地极”。（诗篇46:9；以赛亚书2:4）地上会遍满爱上帝同崇拜佢嘅人。人类会享有永远嘅和平。（诗篇72:7）

¹⁸ 耶和华嘅子民会有真正安全。喺圣经时代，以色列人服从上帝嘅话，就会得到上帝嘅保护，有真正嘅安全。（利未记25:18,19）喺乐园里面，我哋唔会受到任何伤害，人人都会得享恒久嘅安全！（请读以赛亚书32:18；弥迦书4:4）

19．点解我哋可以肯定，喺新世界人人都会衣食无忧？

¹⁹ 人人都会衣食无忧。“地上必五谷丰登，山顶必出产丰盈”。（诗篇72:16）耶和华“我哋嘅上帝，要赐福俾我哋”，到时“大地必定出产作物”。（诗篇67:6）

20．我哋点知道地球会成为一个乐园？

²⁰ 整个地球会成为乐园。人人都会有美丽嘅房屋同花园。（请读以赛亚书65:21-24；启示录11:18）成个地球都会好似当初上帝所造嘅伊甸园一样咁美好。耶和华会不断供应我哋所需嘅一切。圣经话上帝“张手，就满足众生嘅愿望”。（诗篇145:16）

21．我哋点知道人类同动物会和平共处？

²¹ 人类同动物会和平共处。动物唔会再伤害人。今日对人嚟讲好危险嘅动物，喺乐园里面连小朋友都唔使再惊佢哋。（请读以赛亚书11:6-9；65:25）

22．耶稣将会点样帮助有病嘅人？

²² 人唔会再有病。耶稣喺地上嘅时候，医好咗好多人。（马太福音9:35；马可福音1:40-42；约翰福音5:5-9）作为上帝王国嘅君王，耶稣将会医好每一个人。到时唔会再有人话：“我有病”。（以赛亚书33:24；35:5,6）

23．上帝会点样帮助死去嘅人？

²³ 死去嘅人会复活。上帝承诺会复活千百万死去嘅人。圣经话：“义人同不义嘅人都会复活”。（使徒行传24:15；请读约翰福音5:28,29）

24．对于喺乐园嘅生活，你有乜嘢感觉呢？

²⁴ 每个人都有选择嘅自由。我哋可以选择认识同埋事奉耶和华，又或者净系做自己想做嘅事。如果我哋选择事奉耶和华，前途就会一片光明。有个人喺临死之前，请求耶稣要记住佢，耶稣就同佢讲：“你必定同我一齐喺乐园”。（路加福音23:43）等我哋嚟认识多啲耶稣基督，睇吓佢会点样使上帝嘅美好旨意实现。