附注
1 耶和华
上帝嘅名系耶和华，意思系“成事者”。耶和华系全能嘅上帝，佢创造咗宇宙万物。佢有能力实现自己嘅一切旨意。
喺希伯来语上帝嘅名用四个字母写成，而喺英文就用YHWH或者JHVH嚟代表。上帝嘅名喺《希伯来语经卷》原文出现过差唔多7000次。世界各地嘅人会用自己语言嘅通用读音嚟读耶和华嘅名。
▸ 第1章，15段
2 圣经系“上帝用圣灵启示嘅”
圣经嘅作者系上帝，不过佢运用人嚟写圣经，就好似一个老板叫秘书写一封信传达佢嘅意思噉。同样，上帝用圣灵指引人写低佢嘅谂法。上帝通过圣灵使人从异象或者梦境得到启示，然后将睇到嘅写落嚟。
▸ 第2章，5段
3 原则
圣经原则系指嚟自圣经嘅教导，可以帮助我哋做明智嘅决定。例如，“不良嘅交往破坏有益嘅习惯”。呢个原则教导我哋同点样嘅人来往，就会受到点样嘅影响。（哥林多前书15:33）另外，“人种嘅系乜嘢，收嘅亦都系乜嘢”。呢个原则教导我哋无论做乜嘢都一定会有相应嘅后果。（加拉太书6:7）
▸ 第2章，12段
4 预言
预言系指嚟自上帝嘅信息。预言可能系一个同上帝旨意有关嘅解释、一个道德指引、命令或判决。预言亦可能系预告将来会发生嘅事。好多圣经嘅预言都已经应验咗。
▸ 第2章，13段
5 同弥赛亚有关嘅预言
好多同弥赛亚有关嘅圣经预言都已经应验喺耶稣身上。请睇附栏“关于弥赛亚嘅预言”。
▸ 第2章，17段，脚注
6 耶和华对地球嘅旨意
耶和华创造咗地球，佢嘅旨意系要爱佢嘅人喺地上乐园生活。呢个旨意并冇改变。上帝好快就会铲除邪恶，使佢嘅子民得享永远嘅生命。
▸ 第3章，1段
7 魔鬼撒但
撒但系一个发动叛乱反对上帝嘅天使。圣经称佢为撒但，意思系“敌对者”，因为佢同上帝作对。圣经亦都称佢为魔鬼，意思系“毁谤者”，因为佢诬蔑上帝同欺骗人类。
▸ 第3章，4段
8 天使
喺创造地球之前好耐，耶和华已经创造咗天使。耶和华创造嘅天使数以亿计，佢哋都住喺天上。（但以理书7:10）天使都有自己嘅名同性格，忠贞嘅天使会谦卑噉拒绝人类对佢哋嘅崇拜。天使有唔同嘅级别，佢哋受委派做各种各样嘅工作。呢啲工作包括喺耶和华嘅宝座前为佢服务，传达佢嘅信息，保护同指引上帝地上嘅仆人，执行佢嘅判决，同埋支持传道工作。（诗篇34:7；启示录14:6；22:8,9）喺将来哈米吉多顿大战嘅时候，佢哋会同耶稣并肩作战。（启示录16:14,16；19:14,15）
9 罪
如果我哋嘅思想或者行为违背上帝嘅旨意，就系罪嘞。最初，耶和华创造嘅一切都系完美嘅，但系亚当同夏娃选择反叛耶和华嗰阵就开始有罪，唔再完美，会衰老死亡。由于亚当将罪遗传俾我哋，我哋一出世就唔完美。耶和华知道罪会破坏我哋同佢嘅关系，所以赐律法同原则帮助我哋避免得罪佢。
10 哈米吉多顿
呢场系上帝发动嘅战争，会将撒但嘅世界同所有邪恶铲除。
11 上帝嘅王国
上帝嘅王国系耶和华喺天上设立嘅政府。耶稣基督系呢个政府嘅君王。将来，耶和华会通过呢个王国铲除所有邪恶。上帝嘅王国将会统治全地。
▸ 第3章，14段
12 耶稣基督
喺创造宇宙万物之前，上帝最先创造咗耶稣。耶和华派耶稣嚟到地上为全人类牺牲生命。耶稣牺牲之后，耶和华将佢复活。而家耶稣正喺天上以上帝王国君王嘅身份施行统治。
▸ 第4章，2段
13 同七十个七嘅时期有关嘅预言
圣经预告咗弥赛亚出现嘅时间。经文表明，一段特定嘅时期一结束，弥赛亚就会出现。呢段时期由公元前455年开始到公元29年结束，经过六十九个七嘅时期。
我哋点知道呢段时期喺公元29年结束呢？六十九个七嘅时期系从公元前455年开始嘅，因为尼希米喺呢一年到达耶路撒冷，着手重建呢座城。（但以理书9:25；尼希米记2:1,5-8）译作“七嘅时期”嘅圣经原文有“星期”嘅意思。正如“一打”使人谂到12呢个数字，“星期”就使人谂到数字7。不过预言所讲嘅星期唔系指7日，而系7年，呢个同圣经“一日算一年”嘅计算方法一致。（民数记14:34；以西结书4:6）按呢个方法计算，1个“七嘅时期”相当于7年嘅时间，69个“七嘅时期”一共就系483年（69×7）。由公元前455年计起，经过483年之后，就系公元29年。耶稣就喺呢一年受浸成为弥赛亚！（路加福音3:1,2,21,22）
同一个预言仲讲到另一个“七嘅时期”，即系另外嘅7年。喺呢7年期间发生嘅事包括：公元33年弥赛亚被处决；由公元36年开始，王国嘅好消息唔单止传俾犹太人，亦都传俾所有国族。（但以理书9:24-27）
▸ 第4章，7段
14 父亲、儿子、圣灵
圣经话耶和华上帝系创造主，而且佢最先创造嘅系耶稣。（歌罗西书1:15,16）耶稣唔系全能嘅上帝，佢从来都冇话过自己同上帝平起平坐。事实上，佢话：“父亲系比我大嘅”。（约翰福音14:28；哥林多前书15:28）但系有啲宗教主张三位一体嘅教义，话上帝系由父亲、儿子同圣灵三个个体组成嘅。“三位一体”嘅教义并冇圣经根据，系错误嘅。
圣灵系上帝发出嘅动力。上帝会运用呢种无形嘅力量嚟达成自己嘅旨意。圣经提到，早期嘅基督徒“充满圣灵”。耶和华亦都话：“我要将我嘅灵分俾人，倾注喺各样嘅人身上”。（使徒行传2:1-4,17）经文表明圣灵唔系一个个体。
15 十字架
点解真基督徒唔应该使用十字架？
错误宗教使用十字架已经有好长嘅历史。喺古代，大自然崇拜同淫荡嘅异教仪式都会用到十字架。耶稣死后嘅头三百年基督徒都冇使用十字架。后来，罗马皇帝君士坦丁将十字架作为基督教嘅标志，目的系要使更多人归信基督教。但系，十字架同耶稣基督毫无关系。《新天主教百科全书》（英语）话：“喺基督教时代之前嘅文化同非基督教文化当中，都可以揾到十字架嘅踪影。”
耶稣唔系死喺十字架上。译做“十字架”嘅希腊语名词基本系指“一条直立嘅柱”，“一条木”或者“一棵树”。《导读圣经》（英语）指出：“喺［《新约》嘅］希腊语原文里面，就连任何暗示有两条木嘅意思都冇。”耶稣系死喺一条直立嘅柱上。
耶和华唔想我哋用偶像或者象征物嚟崇拜佢。（出埃及记20:4,5；哥林多前书10:14）
▸ 第5章，12段
16 耶稣受难纪念聚会
耶稣吩咐门徒要记念佢嘅死亡。每年尼散月十四日，即系以色列人庆祝逾越节嘅嗰一日，基督徒都会按耶稣嘅吩咐去做。喺受难纪念聚会期间，象征耶稣身体嘅饼同象征佢宝血嘅酒会传递俾出席嘅每一个人。有希望同耶稣喺天上一齐统治嘅人，会领食饼同酒。而有希望喺地上永远生活落去嘅人，就会以尊重嘅方式出席，但系就唔会领食。
▸ 第5章，21段
17 有冇鬼魂呢？
好多人相信人死后会变成鬼或者化为神灵，但系圣经唔系噉讲。关于人死后嘅情况，圣经话：“死咗嘅人就毫无知觉”。（传道书9:5）我哋嘅身体同思想都系受脑部控制嘅。人死后，脑就停止运作。所以，我哋嘅记忆、感觉就会全部消失，身体亦都唔可以继续运作。正如诗篇146:4话：“人一断气，就归回尘土；佢嘅思想，当日就消逝。”所以，一个人死咗之后唔可能有灵魂继续生存。但系如果有人话佢哋见过神灵或者鬼魂，噉又点解释呢？圣经指出佢哋见到嘅可能系一个邪恶嘅天使，而唔系死者嘅灵魂。你可以喺第10章学到更多资料。
18 前世所造嘅业同投胎转世
好多人相信佢哋一生中所发生嘅每一件事，都系同佢哋前世所做嘅事（业）有关。呢个并唔符合圣经嘅真理，点解噉讲呢？圣经话上帝系一位既仁爱又公平嘅造物主。（约翰一书4:8；申命记32:4）试谂吓，一个人前世做咗啲坏事，今世已经唔记得晒。但系，上帝按照佢前世所做过嘅坏事而惩罚佢，噉合唔合理呢？我哋目前嘅生活唔系前世做嘅事所带嚟嘅结果，不过，我哋而家所做嘅事会对我哋有影响。呢个同圣经喺加拉太书6:7所讲嘅一致，经文话：“人种嘅系乜嘢，收嘅亦都系乜嘢”。
投胎转世又点呢？好多人相信如果我哋今生做坏事，来世就会投胎做动物。按呢种讲法，如果我哋想下一世投胎做人，今生就要做善事。呢种讲法合唔合理呢？试谂吓，动物识唔识得做善事呢？当然唔识，只有人先至识得做善事。如果我哋投胎做咗动物，又点可以做善事，喺来世做翻人呢？事实上，当第一个人亚当犯罪而上帝宣判佢会死嘅时候，上帝冇话亚当会投胎成为动物或者另一个人。相反，上帝话亚当既然系尘土之身，就要归回尘土。（创世记3:19）所以，投胎转世并唔符合圣经嘅真理。
19 欣嫩谷
欣嫩谷位于耶路撒冷附近，系用嚟焚化废物嘅地方。有啲译本将欣嫩谷误译成“地狱”或者“地狱嘅火刑”。不过冇证据显示，喺耶稣嘅时代有动物或者人被放入欣嫩谷活生生噉焚烧折磨。所以，欣嫩谷唔系象征一个用嚟焚烧同永远折磨死去嘅人嘅地方。当耶稣提到嗰啲被掟入欣嫩谷嘅人嗰阵，意思系佢哋会被彻底毁灭。（马太福音5:22；10:28）
▸ 第7章，20段
20 主祷文
呢个系耶稣所作嘅一个祷告，又称为天主经或模范祷告。耶稣通过噉样做嚟教导门徒点样向上帝祷告。例如，耶稣教导我哋噉样祷告：
“愿你嘅名彰显为圣”
我哋祈求耶和华采取行动使佢嘅名或名声唔会再受到诬蔑。到时，天上嘅所有天使同地上嘅每一个人都会荣耀同尊崇上帝嘅名。
“愿你嘅王国来临”
我哋祈求上帝嘅王国政府毁灭撒但嘅邪恶世界，然后统治整个地球，使地球成为乐园。
“愿你嘅旨意喺地上实现”
我哋祈求上帝对地球嘅旨意完全实现，服从上帝嘅人，可以享有完美嘅身心喺乐园永远生活，正如耶和华最初创造人类嘅旨意一样。
▸ 第8章，2段
21 赎价
赎价系耶和华为咗拯救人类摆脱罪同死亡而付出嘅代价。上帝提供赎价，用嚟赎翻第一个人亚当失去嘅完美生命，同埋修复人类同自己已经受损嘅关系。上帝差派耶稣嚟到地上为所有罪人牺牲生命。由于耶稣嘅牺牲，所有人都有机会恢复完美并永远生活落去。
22 点解1914年系一个重要嘅年份？
但以理书第4章嘅预言透露，上帝会喺1914年建立佢嘅王国。
预言：耶和华使尼布甲尼撒王喺梦中睇见一个异象。喺梦中，有一棵大树被斩落嚟，树嘅残干俾铁圈铜圈箍住，唔能够生长。经过“七期”之后，呢棵树先会再次生长。（但以理书4:1,10-16）
预言对我哋嘅意义：呢棵树代表上帝嘅统治权。有好多年嘅时间，耶和华通过耶路撒冷嘅君王统治成个以色列国族。（历代志上29:23）但系，整体嚟讲，呢啲君王唔再忠于耶和华，佢哋嘅统治权被中断。公元前607年，耶路撒冷遭受毁灭。呢个就系“七期”嘅开始。（列王纪下25:1,8-10；以西结书21:25-27）耶稣话：“耶路撒冷必被列国践踏，直到列国嘅既定时期满咗”。佢讲嘅“既定时期”就系指“七期”。（路加福音21:24）由此可见，耶稣喺地上嘅时候“七期”仲未结束。耶和华承诺，喺“七期”结束时会有一位新嘅君王施行统治。君王耶稣嘅统治会为上帝地上嘅子民带嚟永恒嘅福乐。（路加福音1:30-33）
“七期”嘅长度：“七期”长达2520年。如果我哋由公元前607年开始计算，过咗2520年，就系1914年。就喺呢一年，应许嘅弥赛亚耶稣喺天上成为上帝王国嘅君王。
我哋点样得出2520呢个数字？圣经话三期半相当于1260日。（启示录12:6,14）“七期”系三期半嘅两倍，即系2520日。根据圣经“一日算一年”嘅方法计算，“七期”就相当于2520年。（民数记14:34；以西结书4:6）
▸ 第8章，23段
23 天使长米迦勒
圣经只系提到一位天使长，佢个名叫米迦勒。（但以理书12:1；犹大书9）
米迦勒统领上帝忠心嘅天使大军。启示录12:7话“米迦勒”同“佢嘅天使”与“龙同佢嘅天使”争战。启示录亦都表明系耶稣统领上帝天上嘅军队，所以，米迦勒系耶稣嘅另一个名。（启示录19:14-16）
▸ 第9章，4段
24 最后嘅日子
呢个系指上帝嘅王国毁灭撒但世界之前嘅一段时期。喺呢段时期，地上会有一啲重大嘅事发生。圣经用 “制度嘅末期”同 “人子临在嘅时候”嚟指同一段时期。（马太福音24:3,27,37）上帝嘅王国喺1914年开始统治，“最后嘅日子”就开始嘞，到撒但嘅世界喺哈米吉多顿大战被毁灭，呢个时期就结束。（提摩太后书3:1；彼得后书3:3）
▸ 第9章，5段
25 复活
复活系指上帝使死去嘅人重获生命。圣经记载咗九个复活嘅事例，例如以利亚、以利沙、耶稣、彼得同保罗都复活过死去嘅人。佢哋施行奇迹嘅能力都系嚟自上帝嘅。耶和华承诺“义人同不义嘅人”都会喺地上复活。（使徒行传24:15）圣经仲提到另一种复活，就系蒙上帝拣选嘅人会被复活到天上，同耶稣一齐作王。（约翰福音5:28,29；11:25；腓立比书3:11；启示录20:5,6
▸ 第9章，13段
26 邪灵崇拜（通灵术）
呢个系指用直接或者间接嘅方式同邪灵沟通，例如通过神婆同邪灵打交道。人使用通灵术系因为佢哋相信，人死后会化成能力强大嘅鬼魂呢种错误主张。邪灵亦都尝试影响人，使佢哋唔服从上帝。邪灵崇拜包括占星术、占卜、魔法、迷信同玄秘术等等。好多书籍、杂志、星座运程、电影、海报同歌曲，都令人误以为邪灵、魔法同玄秘术无伤大雅，而且仲好吸引。好多丧礼习俗，例如拜祭死人、葬礼后宴饮狂欢、纪念忌辰、守灵仪式同遵从某啲丧偶嘅人要守嘅传统，都同通灵术有关。喺有啲地方，人通灵嘅时候仲会使用药物。（加拉太书5:20；启示录21:8）
27 耶和华嘅至高统治权
耶和华上帝系全能嘅，佢创造咗宇宙万物。（启示录15:3）既然万物都系上帝创造嘅，佢自然有最高嘅权力统治一切。（诗篇24:1；以赛亚书40:21-23；启示录4:11）耶和华有权为所有受造物定下法则，亦都有权委任受造物代表佢施行统治。我哋爱上帝同服从佢就系支持佢嘅至高统治权。（历代志上29:11）
▸ 第11章，10段
28 堕胎
堕胎系指故意使胎儿死亡，而唔系因为意外或者身体问题导致流产。从受孕嗰一刻开始，胎儿就唔系母体内嘅细胞组织，而系一个独立嘅生命。
▸ 第13章，5段
29 输血
输血系一种医疗方法。输血包括输入其他人嘅血液，或者输入保存落嚟嘅自体血液。输入嘅可能系全血，或者系血嘅四种主要成分之一。血嘅四种主要成分系红血球、白血球、血浆同血小板。
▸ 第13章，13段
30 管教
喺圣经里面，“管教”唔完全系责罚嘅意思。当我哋受到管教嘅时候，意味住我哋受到指引、教导同纠正。耶和华绝对唔会用残忍嘅方式施行管教。（箴言4:1,2）耶和华为父母立下优良嘅榜样。佢管教嘅方式非常有效，甚至令人喜爱管教。（箴言12:1）耶和华爱佢嘅子民，训练佢哋，帮助佢哋改变错误嘅思想，学识用上帝悦纳嘅方式思考同行事。同样，父母要管教儿女，帮助佢哋明白点解要服从，仲要培养佢哋对耶和华同圣经嘅爱，以及帮助佢哋了解圣经嘅原则。
▸ 第14章，13段
31 邪灵
邪灵系我哋肉眼睇唔到嘅灵体，拥有超乎凡人嘅能力。佢哋系上帝所造嘅天使，后来变得邪恶反叛上帝，成为上帝嘅仇敌。（创世记6:2；犹大书6）佢哋加入撒但嘅阵营对抗耶和华。（申命记32:17；路加福音8:30；使徒行传16:16；雅各书2:19）
▸ 第16章，4段