同灵性成熟嘅人一齐工作系我嘅福分

20世纪30年代中期，我爸爸詹姆斯·辛克莱同妈妈洁西搬到纽约市嘅布朗克斯区。佢哋嘅一位新朋友叫做威利·史奈顿，同样都嚟自苏格兰。啱啱认识冇几分钟，佢哋三个就开始提到自己嘅屋企人。呢件事就发生喺我出世嘅前几年。

妈妈同威利讲，喺第一次世界大战爆发之前冇几耐，佢嘅爸爸同哥哥因为渔船喺北海撞到水雷而葬身大海。威利就对妈妈讲：“你爸爸而家喺地狱！”威利系一位耶和华见证人，而妈妈就系通过呢种令人惊讶嘅方式接触真理嘅。

威利所讲嘅令妈妈好唔开心，因为妈妈知道自己嘅爸爸系一个好人。但系，威利跟住话：“如果我同你讲，耶稣都去过地狱，噉你嘅心会唔会觉得舒服啲呢？”妈妈记得教会嘅信条话，耶稣落咗去地狱，之后喺第三日复活。于是佢心谂：“如果地狱系一个烈火熊熊、折磨坏人嘅地方，点解耶稣会去嗰度嘅？”呢个激发咗妈妈对圣经真理嘅兴趣。好快，佢就开始参加布朗克斯会众嘅聚会，之后喺1940年受浸。

嗰时，基督徒父母并冇受到特别嘅鼓励去同仔女学习圣经。妈妈去参加周末嘅聚会同传道工作嘅时候，就由爸爸嚟负责照顾啱啱识行路嘅我。几年之后，我哋一家三口开始一齐参加聚会。妈妈好热心噉传讲好消息，仲同几个对真理感兴趣嘅人讨论圣经。有啲圣经学生住得好近，所以有一段时间，妈妈会同佢哋几个一齐讨论。学校放假嗰时，我会同妈妈一齐传道。因为噉，我学到好多圣经知识，仲学识点样教导人。

好可惜，我好细个嗰阵对真理冇咩体会，亦都冇重视学到嘅圣经知识。但系从12岁开始，我就成为王国传道员，经常参与传道工作。我16岁嗰年献身俾耶和华，喺1954年7月24日嘅加拿大多伦多大会受浸。

喺伯特利服务

喺会众里面，一啲曾经系伯特利家庭成员嘅弟兄俾咗我好大嘅影响。佢哋讲解圣经真理嘅技巧令我印象深刻。虽然学校嘅老师鼓励我读大学，不过我嘅目标系去伯特利服务。于是喺多伦多嘅大会，我递交咗伯特利申请表。喺1955年纽约市洋基体育场（杨基运动场）嘅大会，我再一次递交申请表。冇几耐之后，喺1955年9月19日，我就受到邀请，开始喺布鲁克林嘅伯特利工作，当时我17岁。喺伯特利嘅第二日，我就开始喺亚当士街117号嘅装订部工作。我要操作配页机，将啲书页按照每32页一份噉嚟准备好，然后等另一部机器去装订成书。

由于我识得打字，喺装订部工作咗大概一个月之后，就被分配到杂志部。嗰时，有好多人订阅《守望台》同《警醒！》杂志。弟兄姊妹会将呢啲人嘅名同地址输入一部机器，再通过机器打喺金属片上面。几个月后，我又去咗装运部工作。克劳斯·延森系装运部嘅监督，佢问我愿唔愿意协助货车司机，将嗰啲供应俾全世界嘅书刊从总部运去码头。我亦都要将一袋袋嘅杂志送到邮局，寄去美国各地嘅会众。延森弟兄认为呢啲体力工作对我有益。嗰时我骨瘦如柴，体重只有57公斤（125磅）。既要去码头又要跑邮局，噉样使我嘅体质增强咗好多。延森弟兄的确知道乜嘢对我系最好嘅！

杂志部亦都负责提供足够嘅杂志俾各地会众。我喺呢个部门工作嘅时候了解到，由布鲁克林印刷同运送去世界各地嘅杂志有好多种语言。呢啲语言，大部分我连听都未听过，但系我好开心知道，成千上万嘅杂志被分发到遥远嘅地方。当时我唔知道，自己将来会有荣幸探访呢啲地区。

1961年，我被委派到司库办事处工作，当时格兰特·苏特系呢个部门嘅监督。喺呢个部门工作咗几年之后，有一日，负责督导全球工作嘅内森·诺尔叫我去佢嘅办公室。佢同我讲，佢办公室嘅一个弟兄喺一个月内会参加王国职务训练班，之后要调去传道部工作。于是我接手呢个弟兄嘅职务，同唐·亚当斯一齐工作。原来唐就系1955年大会接收我份伯特利申请表嘅嗰个弟兄。喺同一个办公室工作嘅仲有另外两个弟兄，佢哋就系罗伯特·沃伦同查尔斯·莫洛汉。我哋四个一齐工作嘅时间超过50年。我真系好开心可以同呢啲咁忠心咁属灵嘅弟兄一齐工作！（诗篇133:1）

从1970年开始，每年或者每两年，有几个星期我都会受到委派去探访守望台社嘅唔同分部，当时叫做海外特访。呢个工作包括探访世界各地嘅伯特利家庭同特派传道员，提供属灵鼓励，同埋查阅分部嘅记录。有机会认识早期嘅基列学校毕业生，睇到佢哋依然忠心噉坚守岗位，我真系好开心！我好荣幸去过90几个国家探访，呢个工作带俾我好大嘅喜乐。

揾到忠心伴侣

所有喺布鲁克林嘅伯特利家庭成员，都被委派到纽约市嘅各群会众。我被委派嘅会众属于布朗克斯区。呢个区嘅第一个会众不断发展，后来分成咗好多个。我参加嘅就系最初嘅会众，叫做上布朗克斯会众。

60年代中期，一个拉脱维亚家庭搬咗嚟我嘅会众，佢哋系喺布朗克斯南接受真理嘅。利维娅系呢个家庭嘅大女，佢高中一毕业就做正规先驱。几个月之后，佢就搬去需要更多王国传道员嘅马萨诸塞州。我开始写信俾佢，同佢倾吓会众最近发生嘅事，而佢就会回信同我讲翻喺波士顿嘅传道成果。

几年后，利维娅被委派做特别先驱。佢好想继续扩展服务，尽力为耶和华做更多，于是申请去伯特利，而且喺1971年受到邀请。我觉得呢个就系耶和华俾我嘅提示！1973年10月27日，我哋结婚当日，好荣幸由诺尔弟兄为我哋发表婚礼演讲。箴言18:22话：“揾到贤妻嘅人，就系揾到美福，又得蒙耶和华嘅美意。”我同利维娅好荣幸一齐喺伯特利服务咗超过40年。而家我哋继续支持布朗克斯嘅一个会众。

同基督嘅弟兄并肩工作

同诺尔弟兄一齐工作的确系一个好大嘅福分。佢一直竭尽全力为真理服务，亦都好感激全球特派传道员所付出嘅努力。好多特派传道员喺自己受委派嘅地区系第一批见证人。令人伤心嘅系，诺尔弟兄喺1976年患上癌症。有一次，佢瞓喺病床上，叫我将一啲准备要印刷嘅资料读俾佢听。佢请我叫埋弗德烈克·法兰兹过嚟一齐听。之后我先知道法兰兹弟兄嘅视力越来越差，所以诺尔弟兄会用好多时间嚟读资料俾佢听。

诺尔弟兄喺1977年去世。嗰啲认识同爱戴佢嘅弟兄姊妹，知道佢忠心完成地上嘅人生旅程，都深感安慰。（启示录2:10）之后，由法兰兹弟兄嚟督导全球嘅工作。

喺嗰时，我系米尔顿·韩素尔嘅秘书。佢同诺尔弟兄一齐工作咗几十年。韩素尔弟兄同我讲，而家我喺伯特利最重要嘅工作，就系尽力协助法兰兹弟兄。我经常将一啲准备要印刷嘅资料读俾法兰兹弟兄听。法兰兹弟兄有惊人嘅记忆力，而且佢能够将自己嘅专注力完全集中喺听到嘅资料上。1992年12月，法兰兹弟兄去世。可以一直协助佢直到佢完成地上嘅旅程，真系俾咗我好大嘅喜乐！

我喺伯特利嘅61年过得好快。我嘅父母直到去世都一直对耶和华保持忠心。我好期待将来可以喺新世界迎接佢哋。（约翰福音5:28,29）呢个旧嘅事物制度所提供嘅任何嘢，点都比唔上可以同忠心嘅弟兄姊妹一齐，为上帝全球子民服务嘅殊荣。从事咗咁多年嘅全时服务，利维娅同我都可以衷心噉讲，“耶和华所赐嘅喜乐，就系［我哋］嘅力量”。（尼希米记8:10）

喺上帝嘅组织入面，冇人系必不可少嘅。无论如何，传讲王国真理嘅工作都会继续进行落去。多年来，同咁多信心坚定嘅忠心弟兄姊妹并肩工作，系好大嘅喜乐同殊荣。大多数并肩工作过嘅受膏基督徒都已经唔喺地上嘞，但系我好感激耶和华俾机会我，可以成为呢啲灵性成熟嘅人嘅同工。