“慷慨嘅人必然蒙福”

献祭一直系正确崇拜重要嘅一环。以色列人用动物献祭，而基督徒就“以赞美为祭”，呢个系众所周知嘅。但系，仲有其他献祭嘅方式系上帝好钟意嘅。（希伯来书13:15,16）呢啲献祭嘅方式会带嚟喜乐同奖赏。请睇吓以下嘅例子。

古代有一个忠仆叫哈拿，佢好想有个仔，不过一直怀唔到孕。佢向耶和华祷告，话如果佢可以生一个仔，就会“将佢一生献俾耶和华”。（撒母耳记上1:10,11）哈拿后来有咗，生咗个仔起名叫撒母耳。等撒母耳断奶之后，哈拿就按照誓愿将佢送去圣殿。由于哈拿嘅自我牺牲精神，耶和华奖赏佢。后来哈拿生咗五个仔女，而撒母耳成为咗先知同圣经执笔者。（撒母耳记上2:21）

今日嘅基督徒都好似哈拿同撒母耳一样，有殊荣可以献出自己嘅一生事奉造物主。耶稣保证，我哋为咗事奉耶和华所作出嘅任何牺牲，都会为我哋带嚟丰盛嘅奖赏。（马可福音10:28-30）

公元一世纪，有个基督徒妇女叫多加，佢为人“乐善好施”，有牺牲精神。但系，可惜“佢患病死咗”，成个会众都因为呢件事好伤心。当门徒听到彼得喺附近，就去恳求佢，希望佢可以即刻过嚟。请想象一下，当彼得嚟到复活多加嗰时，佢哋几咁开心！呢次系圣经第一次提到使徒复活死人。（使徒行传9:36-41）通过多加嘅例子我哋可以睇出，上帝冇忘记多加所作出嘅牺牲。（希伯来书6:10）仲将佢嘅慷慨行为记载喺圣经里面，作为我哋效法嘅榜样。

使徒保罗系另一个慷慨嘅榜样，佢好乐意为弟兄姊妹付出时间同精力。佢写信俾哥林多会众话：“就我而言，我为咗你哋嘅性命，绝对乐意牺牲，甚至牺牲一切。”（哥林多后书12:15）保罗通过自己嘅个人经历学到，献出自己为其他人服务，唔单止令自己有满足感，更重要嘅系可以得到耶和华嘅悦纳同奖赏。（使徒行传20:24,35）

通过呢啲例子我哋可以知道，耶和华睇到我哋用自己嘅时间同精力嚟促进王国嘅工作以及帮助信徒同工，佢一定好开心。噉我哋有冇其他方法可以支持王国嘅传道工作呢？当然有！除咗传道之外，我哋仲可以通过自愿捐款嚟荣耀上帝。呢啲捐款会用嚟推广全球传道工作，包括支持特派传道员同特别全时仆人，仲会用嚟制作同翻译书刊以及影片，赈灾，建造王国聚会所。呢一切都系通过自愿捐款嚟支持嘅。我哋可以肯定，“慷慨嘅人必然蒙福”。而且，我哋将自己最好嘅献俾耶和华，就会为佢带嚟荣耀。（箴言3:9；22:9）