耶和华凡事都可能

从天光做到天黑

1937年，我喺吉尔吉斯斯坦托克马克镇附近嘅一个集体农庄出世。我嘅家族都系吉尔吉斯人，我哋都讲吉尔吉斯语。我父母都系农庄嘅工人，佢哋喺集体农庄由朝到晚都要工作。农庄会定期分配食物俾工人，不过一年就只发一次工资。妈妈除咗工作仲要照顾我同妹妹，真系非常唔容易。我只系读咗5年书，之后都要全日喺农庄工作。

我住嘅地方非常贫穷，要好辛苦工作先可以维持生活。我年轻嗰时，冇点谂过人生有乜嘢意义或者未来会点样。我从来都冇谂过耶和华上帝同佢美好嘅旨意会改变我嘅一生。圣经嘅好消息点样传到吉尔吉斯斯坦？后来又点样喺本地传讲开去？呢个系一个振奋人心嘅故事，而一切都系从我家乡吉尔吉斯斯坦嘅北部开始嘅。

曾经被放逐嘅人将真理带到吉尔吉斯斯坦

20世纪50年代，关于耶和华上帝嘅真理开始喺吉尔吉斯斯坦扎根。但系如果要将真理传开去，首先要帮人消除一种根深蒂固嘅思想。点解？嗰时嘅吉尔吉斯斯坦系苏联嘅一个成员国，而全苏联嘅耶和华见证人喺政治上都保持中立。（约翰福音18:36）所以，佢哋被视为共产主义嘅敌人而遭受迫害。但系，任何思想观念都唔能够阻止上帝嘅话语打动诚心正意嘅人嘅心。冇错，喺我漫长嘅一生当中，我学到最有价值嘅一课就系，耶和华“凡事都可能”。（马可福音10:27）

耶和华见证人受到嘅迫害，反而使好消息喺吉尔吉斯斯坦得以扩展。点解会噉？被视为国家敌人嘅人会被放逐到苏联嘅西伯利亚。呢啲人被释放之后，好多都会嚟吉尔吉斯斯坦，当中有啲人认识圣经真理。其中一个就系埃米尔·扬岑，1919年佢喺吉尔吉斯斯坦出世。后来，埃米尔被韫喺劳动营，喺嗰度认识见证人。佢接受咗真理，喺1956年返翻自己家乡。埃米尔喺索库卢克附近住落嚟，呢个地方就喺我家乡附近。1958年，吉尔吉斯斯坦第一个会众就喺索库卢克成立。

大约一年之后，维克托·温特尔搬到索库卢克。呢位忠心嘅弟兄遭受咗一次又一次嘅迫害。佢因为严守中立，两次被判监三年，然后又坐多十年监，之后再被流放五年。不过，迫害并冇阻止正确崇拜嘅扩展。

真理传到家乡

1963年，吉尔吉斯斯坦大约有160个见证人。佢哋大多数都嚟自德国、乌克兰同俄罗斯。其中一位叫做爱德华·瓦尔特，佢1924年喺德国受浸。20世纪40年代，纳粹党将佢关喺集中营。几年之后，苏联政府又将佢放逐。1961年，呢个忠心嘅弟兄搬咗去离我家乡好近嘅坎特镇。

伊利莎白·福特呢个忠心嘅姊妹都住喺坎特。佢靠同人做衫嚟维持生活。由于佢手工精细，连医生、教师呢啲专业人士都揾佢做衫。伊利莎白有个客人叫阿克萨迈·苏丹阿利耶娃，佢先生系检察院嘅一个官员。有一日阿克萨迈嚟揾伊利莎白做衫，倾开计嘅时候，佢问咗伊利莎白好多问题，关于人生意义同人死后嘅情况。伊利莎白用圣经回答咗佢所有问题。后来，阿克萨迈亦都热心向人传讲圣经嘅好消息。

大约喺呢个时候，嚟自摩尔多瓦嘅尼古拉·坎波耶什被委派做分区监督，一做就做咗差唔多30年。尼古拉除咗探访会众之外，仲要安排书刊嘅印制同分派工作。结果，当局开始留意佢。所以，爱德华·瓦尔特就鼓励尼古拉话：“如果国安会嘅人审问你，你就望实佢，直接话俾佢哋知，我哋嘅刊物系布鲁克林总部提供嘅。你唔使惊佢哋㗎。”（马太福音10:19）

之后冇几耐，国安会真系传召尼古拉去佢哋喺坎特嘅总部。佢描述跟住落嚟发生嘅事，话：“国安会嘅人问我，啲书刊系点嚟嘅。我话俾佢知，系从布鲁克林嚟嘅。佢见我咁坦白，都唔知点回应好。佢只系叫我离开，之后就再冇传召过我。”呢啲勇敢无畏嘅见证人，喺我家乡吉尔吉斯斯坦嘅北部继续小心谨慎噉将好消息传讲开去。喺20世纪80年代，我嘅家人终于有机会听到耶和华宝贵嘅真理，第一个听到嘅就系我太太米琳卜布。

太太好快就睇出呢个系真理

米琳卜布系吉尔吉斯斯坦嘅纳伦州人。1974年8月，有一日，佢去探我妹妹。喺妹妹屋企，我哋第一次见面。我对米琳卜布一见钟情，就喺当日同佢结咗婚。

1981年1月，米琳卜布坐巴士去当地市场嗰时，无意中听到文章开头嘅嗰句话。我太太想知多啲，就问嗰个女子叫咩名同住喺边。佢话自己叫亚普，不过就冇讲自己住边度。喺20世纪80年代，见证人仲系受到禁制，所以佢要小心谨慎。于是，佢问我太太住喺边。我太太返到屋企嗰时好兴奋。

米琳卜布话：“我听到一啲好奇妙嘅事。一个女子话俾我知，人好快就唔使再面对死亡，连野兽都会变得好温驯。”对我嚟讲，呢番话听起嚟就好似天方夜谭噉。不过，我同太太讲：“不如佢过嚟嗰时，我哋再听吓佢点讲。”

三个月之后，亚普嚟探访我哋。喺之后嘅几次探访当中，我哋有机会认识一啲吉尔吉斯族早期嘅见证人。呢啲姊妹帮助我哋认识耶和华同埋佢对人类嘅旨意。佢哋又向我哋读出《从乐园嘅失落到乐园嘅复得》呢本书嘅内容。a不过，由于呢本书喺托克马克镇只得一本，于是我哋就为自己手抄咗一个副本。

我哋首先学到嘅就系创世记3:15嘅预言。上帝嘅弥赛亚君王耶稣会实现呢个预言。人人都需要听见呢个重要信息，所以我哋真系应该要热心宣扬圣经嘅好消息！（马太福音24:14）圣经真理好快就改变咗我哋嘅人生。

喺禁制下聚会同受浸

托克马克嘅一个弟兄邀请我哋去参加一场婚礼。我同太太好快就发现见证人嘅行为同其他人好唔一样。婚礼整个过程都好有秩序，宴席上冇提供酒，同我哋参加过嘅其他婚礼真系好唔同。喺嗰啲婚礼，客人经常饮醉酒，又闹事，仲讲粗口。

我哋又参加咗托克马克会众嘅基督徒聚会。天气好嘅时候，聚会会喺树林里面举行。由于弟兄姊妹知道警察会监视我哋，所以弟兄会安排人负责把风。到咗冬天，我哋就会喺室内举行聚会。有几次，警察嚟到聚会嘅地方查问我哋喺度做乜嘢。所以，当1982年7月我同太太米琳卜布一齐喺楚河受浸嗰时，大家都要好小心。（马太福音10:16）弟兄几个几个噉分批到达树林，聚集之后，大家就一齐唱王国诗歌，听浸礼演讲。

把握机会扩大服务

1987年，有个弟兄叫我去巴雷克奇镇探访一位对圣经感兴趣嘅人。从我住嘅地方出发，要坐四个钟头火车先可以去到嗰度。之后我哋又去咗几次巴雷克奇做传道，发现嗰度有好多人对真理感兴趣。我哋睇出，呢个系扩大服务嘅好机会。

我同米琳卜布经常去巴雷克奇。通常，我哋周末都会留喺嗰度做传道同埋举行基督徒聚会。越来越多当地人想睇我哋嘅书刊，于是出版物嘅需求量激增。我哋将书刊放入用嚟装薯仔嘅麻包袋，从托克马克带过去。每个月带两大袋书刊过去都满足唔到佢哋嘅需求。喺坐火车去巴雷克奇同埋返屋企嘅路上，我哋都可以同其他乘客作见证。

我哋探访巴雷克奇8年之后，1995年，当地成立咗第一个会众。咁多年来，喺托克马克同巴雷克奇走嚟走去，我哋用咗唔少钱。我哋经济能力有限，点会有咁多钱呢？其实，有个弟兄经常资助我哋，弥补我哋嘅不足。耶和华睇见我哋想扩大传道工作，于是佢为我哋“打开天上嘅水闸”。（玛拉基书3:10）冇错，耶和华的确凡事都可能！

忙于照顾家人同传道工作

1992年，我受到委任，成为国内第一个吉尔吉斯族嘅长老。喺我家乡托克马克会众，有一道新嘅传道大门打开咗。我哋向当地学校嘅吉尔吉斯族学生作见证，结果好多年轻人都跟我哋学习圣经。其中一个圣经学生而家做咗分部委员会成员，另外仲有两个而家系特别先驱。同时，我哋都尽力帮助参加聚会嘅人。喺20世纪90年代初，我哋只有俄罗斯语嘅出版物，聚会都系用俄罗斯语举行嘅。不过，母语系吉尔吉斯语嘅会众成员越来越多。所以，我就喺聚会做传译，帮助大家更容易明白圣经真理。

我哋嘅仔女越来越多，所以我同米琳卜布都要忙于照顾家人，带佢哋去传道同埋参加聚会。啲仔女都钟意熟记经文。我哋嘅女古尔萨拉12岁就好钟意做街头见证，向路人传讲圣经嘅信息。由于自细就养成呢啲好习惯，所以而家，我哋嘅仔女同埋孙仔孙女都积极参与会众活动。而家我仲有9个仔女同11个孙仔孙女在生，其中16个有啲已经事奉耶和华，有啲就跟紧父母参加聚会。

惊人嘅增长

20世纪50年代，有啲弟兄姊妹嚟到我哋嘅地区开展传道工作。如果佢哋见到呢度嘅改变一定会好惊讶。例如，自从20世纪90年代以来，我哋喺宣扬好消息，以及举行聚会同大会方面享有更多自由。

1991年，我同太太去哈萨克斯坦嘅阿拉木图，第一次参加区域大会。1993年，吉尔吉斯斯坦嘅弟兄喺比什凯克嘅斯巴达克运动场举行第一次区域大会。大会之前，传道员用咗一个星期嚟做清洁。运动场嘅负责人深受感动，于是将场地免费提供俾我哋使用。

1994年，本地嘅属灵发展达到一个新嘅里程碑——我哋嘅刊物首次以吉尔吉斯语嚟发行。而家比什凯克分部有一个翻译小组将刊物翻译成吉尔吉斯语。1998年，吉尔吉斯斯坦嘅耶和华见证人获得法律认可，成为合法嘅宗教团体。我哋嘅传道员不断增多，而家人数已经超过5000。今日，我哋总共有83群会众，仲有25个分别系汉语、英语、吉尔吉斯语、俄罗斯语、俄罗斯手语、土耳其语、维吾尔语同乌兹别克语嘅小组。呢啲亲爱嘅弟兄姊妹虽然背景唔同，但系都团结一致事奉耶和华。呢啲惊人嘅增长都系耶和华成就嘅，佢的确凡事都可能。

耶和华亦都改变咗我嘅一生。我喺一个卑微嘅农村家庭长大，只系读过5年书。不过，耶和华俾我有机会做长老，又可以教导嗰啲读书比我多嘅人圣经真理。无论几咁不可思议嘅事，耶和华都可以成就。的确，耶和华“凡事都可能”。我所经历嘅一切，推动我继续忠贞噉为佢作见证。（马太福音19:26）