每日同耶和华一齐工作

1． 喺边啲方面我哋可以同耶和华一齐工作？

耶和华系人类嘅创造主，佢希望完美嘅人类可以同佢合作，一齐实现佢对地球嘅旨意。虽然人类而家都唔完美，但忠于上帝嘅人仍然能够每日同耶和华一齐工作。例如，我哋做“上帝嘅同工”，传讲上帝王国嘅好消息，并帮助人成为基督嘅门徒。（哥林多前书3:5-9）试谂吓，我哋可以同宇宙全能嘅创造主合作，完成呢项伟大嘅工作，系几咁大嘅殊荣！不过，传讲好消息同帮助人成为基督徒唔系我哋同耶和华一齐做嘅唯一一项工作。呢篇课文会分析，喺帮助家人同弟兄姊妹、表现好客精神、参与志愿建筑工程同埋扩大神圣服务呢几个方面，我哋可以点样同耶和华一齐工作。（歌罗西书3:23）

2． 点解喺事奉耶和华方面，我哋唔应该同人比较？

² 讨论呢篇课文嘅时候请谨记，每个人嘅年龄、健康、环境同能力都唔一样。所以，喺事奉耶和华方面，千祈唔好同其他人比较。使徒保罗受圣灵启示话：“每个人都应该察验自己所做嘅事。噉样，人高兴系因为自己嘅成就，唔系因为同人比较。”（加拉太书6:4）

帮助家人同弟兄姊妹

3． 点解话，照顾家人就系同耶和华合作？

³ 耶和华希望佢嘅仆人照顾自己嘅家人。例如：有啲弟兄姊妹要工作养家；有啲姊妹要留喺屋企照顾年幼嘅儿女；有啲成年嘅子女要照顾体弱多病嘅父母。呢啲都系必须要做嘅事。圣经话：“人唔照顾亲属，尤其系唔照顾自己嘅家人，其实就等于否认信仰，比不信嘅人更加唔好。”（提摩太前书5:8）如果你有呢啲家庭责任，可能会觉得，自己好难抽出时间为耶和华做更多服务。请唔好灰心！你照顾好家人，耶和华都会感到开心。（哥林多前书10:31）

4． 基督徒父母可以点样表明自己将王国放喺首位？噉样做有乜嘢美好结果？

⁴ 基督徒父母帮助儿女定立目标事奉耶和华，就系同耶和华合作。好多儿女自细受到父母良好嘅教导，后来都投身全时服务，甚至去到好远嘅地方为耶和华工作。佢哋有啲做特派传道员，有啲做先驱去需求更大嘅地区帮手，有啲就从事伯特利工作。虽然儿女远离家乡，父母唔能够经常同佢哋喺一齐，不过，有自我牺牲精神嘅父母会鼓励儿女继续执行佢哋嘅委派。点解？佢哋知道儿女将王国放喺生活首位，就感到非常喜乐同满足。（约翰三书4）哈拿认为，自己嘅仔撒母耳系“借俾”耶和华嘅。可能好多基督徒父母都同哈拿有一样嘅谂法。佢哋有正确嘅观点，觉得同耶和华合作系好大嘅殊荣。（撒母耳记上1:28）

5． 你可以点样为信徒同工提供实际嘅帮助？（请睇吓课文开头嘅图片）

⁵ 如果你嘅家庭责任唔系咁多，噉你可唔可以帮助嗰啲年纪老迈、体弱多病，或者其他有需要嘅信徒同工？你可以细心留意吓自己嘅会众，睇吓边啲人需要帮助。你或者可以花一啲时间帮助一个基督徒姊妹照顾佢年老嘅父母，噉佢就可以抽身处理其他事。你亦都可以接送一啲有需要嘅弟兄姊妹参加聚会，帮佢哋购买食物或生活用品，或者陪佢哋去医院探望亲友。可能耶和华就系通过你向呢啲同工伸出援手，回应佢哋嘅祷告。（请读哥林多前书10:24）

表现好客精神

6． 表现好客意味住乜嘢？

⁶ 我哋身为上帝嘅同工，都应该有慷慨好客嘅精神。喺圣经原文，翻译为“好客”嘅希腊语词，意思系“仁慈噉对待陌生人”。（希伯来书13:2）圣经入面嘅好多记载都教导我哋用噉样嘅方式表现爱心。（创世记18:1-5）我哋能够，亦都应该经常揾机会帮助其他人，无论对方系咪我哋嘅信徒同工。（加拉太书6:10）

7． 慷慨接待全时仆人点样使自己得益？

⁷ 作为耶和华嘅同工，你愿唔愿意慷慨款待到访嘅全时仆人？（请读约翰三书5,8）我哋噉样做，就可以同弟兄姊妹“互相鼓励”。（罗马书1:11,12）请睇吓奥拉夫嘅经历。几十年前，一个独身嘅分区监督探访奥拉夫嘅会众，不过冇人能够接待佢。年轻嘅奥拉夫就问不信嘅父母，可唔可以俾分区监督住喺屋企。父母同意咗，不过奥拉夫就要自己瞓梳化。呢个牺牲系好值得嘅。奥拉夫回忆话：“嗰个星期过得真系开心！分区监督同我每日一早就起身，一边食早餐一边讨论各种有意思嘅话题。我得到好多鼓励，好想投身全时服务。”奥拉夫后来成为特派传道员，40年来喺唔同嘅国家服务。

8． 就算传道对象反应唔系咁好，点解我哋仲系应该表现仁慈？请举例。

⁸ 我哋可以喺好多方面向陌生人表现爱心。即使一开始对方唔接受我哋嘅好意，我哋都应该噉样做。请睇吓以下嘅例子。一个西班牙嘅姊妹帮助嚟自厄瓜多尔嘅耶茜卡学习圣经。有一次，佢哋讨论嘅时候，耶茜卡一直系噉喊，于是姊妹问佢发生咩事。耶茜卡话，佢喺搬嚟西班牙之前，生活好贫穷。有一日佢冇钱买食物，净系可以俾啲水个女饮。佢一边氹个女瞓觉，一边向上帝祷告。冇几耐，就有两个姊妹嚟探访佢。不过，耶茜卡对佢哋一啲都唔客气，仲撕烂咗佢哋送俾佢嘅杂志。佢话：“唔通呢啲杂志可以喂饱我个女咩？”两个姊妹尝试安慰佢，不过冇咩用。之后，两个姊妹将一篮食物放喺佢门口。耶茜卡被姊妹嘅仁慈举动深深打动。佢亦都感到自责，因为自己居然冇留意到上帝回应咗自己嘅祷告。而家，耶茜卡决心事奉耶和华。呢啲姊妹嘅慷慨精神，带嚟几咁美好嘅结果！（传道书11:1,6）

参与志愿服务

9,10． （甲）古代嘅以色列人通过乜嘢机会参与志愿服务？（乙）今日，基督徒男子可以喺边啲方面为会众服务？

⁹ 喺古代，以色列人有好多机会可以参与志愿服务。（出埃及记36:2；历代志上29:5；尼希米记11:2）今日，你亦都可以通过唔同方式献出自己嘅时间、资财同技能为弟兄姊妹服务。噉样做会令你得到好多喜乐同福分。

¹⁰ 上帝嘅话语鼓励会众嘅男子尽力追求善工同监督嘅职分，呢个都系同上帝一齐工作嘅一个方式。（提摩太前书3:1,8,9；彼得前书5:2,3）基督徒男子噉样做，就系想喺属灵上同实际上帮助其他人。（使徒行传6:1-4）长老有冇曾经委派你做招待员，或者请你协助管理书籍同传道地区、保养王国聚会所或者其他事情呢？好多弟兄喺呢啲方面为会众服务，从中得到好大嘅喜乐。

11． 一个姊妹参与志愿建筑工程嗰时结交咗好多朋友，佢点样从中得益？

¹¹ 参与志愿工程嘅人可以结识好多新朋友。一个叫玛吉嘅姊妹有18年嘅时间一直参与王国聚会所建筑工程。喺唔同嘅工程中，佢都关心同培训年轻嘅姊妹。佢觉得参与志愿建筑工程可以同其他弟兄姊妹互相鼓励。（罗马书1:12）每当佢喺生活上遇到困难，喺参与建筑工程嗰时结识嘅好多朋友都会俾佢好大嘅支持同帮助。你有冇曾经参与过类似嘅志愿建筑工程呢？无论你有冇特别嘅技能，都可以参与。

12． 发生灾难嘅时候，我哋可以点样帮助受灾嘅弟兄姊妹？

¹² 发生灾难嘅时候，我哋为受灾嘅弟兄姊妹提供实际嘅帮助，从而有机会同上帝一齐工作。例如，我哋可以喺经济上援助同工。（约翰福音13:34,35；使徒行传11:27-30）另一个方法就系，协助灾后嘅清理同重建工作。喺波兰，有个姊妹叫做加芙列拉，佢间屋俾洪水摧毁咗。佢好开心见到附近会众嘅弟兄姊妹过嚟帮助佢。佢回忆话：“我唔想讲自己失去咗啲乜嘢，因为嗰啲只不过系物质上嘅。反而我好想大家知道，我得到咗更多。呢次经历使我感受到，身为基督徒会众嘅一分子系好大嘅殊荣，亦都使我得到好大嘅喜乐。”好多灾后接受过帮助嘅弟兄姊妹都有同样嘅感觉。而嗰啲同耶和华一齐工作，帮助同工嘅弟兄姊妹都感到非常喜乐同满足。（请读使徒行传20:35；哥林多后书9:6,7）

13． 志愿服务点样强化我哋同耶和华嘅关系？请举例。

¹³ 有啲见证人因为自己嘅地区发生战争，就逃到美国避难。斯蒂芬妮同其他同工向呢啲逃难嘅弟兄姊妹伸出援手，帮助佢哋揾屋同预备家私。斯蒂芬妮话：“佢哋因为感受到世界弟兄团体嘅关爱就好喜乐，亦都满怀感激。我哋见到佢哋噉样都好感动。”佢又话：“呢啲家庭觉得我哋帮咗佢哋好多，其实我哋从佢哋嗰度得到更多。我哋大家都喺呢个过程中体验到爱心、团结、信心同埋对耶和华嘅仰赖，呢个使我哋更加爱耶和华，亦都使我哋更加珍视从上帝组织所得到嘅一切。”

扩大服务

14,15． （甲）以赛亚先知有点样嘅精神？（乙）今日嘅王国传道员可以点样效法以赛亚？

¹⁴ 你系咪想为耶和华做更多服务？你愿唔愿意搬去一个需要更多传道员嘅地区？当然，我哋事奉耶和华唔一定要离乡别井，不过好多弟兄姊妹因为情况允许，就愿意搬到其他地方扩大服务。当耶和华问“我可以差遣边个呢？边个肯为我哋去呢？”嘅时候，佢哋就表现出同以赛亚先知一样嘅精神，回答话：“我喺呢度！请差遣我！”（以赛亚书6:8）你有冇意愿扩大服务？你嘅情况允唔允许？你仲可以喺边啲方面提供帮助？

¹⁵ 关于传讲好消息同帮助人成为基督徒嘅工作，耶稣话：“庄稼的确好多，工人实在太少。所以，你哋要恳求庄稼嘅主人，差工人出去收割佢嘅庄稼。”（马太福音9:37,38）你可唔可以做先驱，或者搬去需求更大嘅地区服务，又或者你可唔可以帮助其他人噉样做？好多弟兄姊妹都觉得，向耶和华同其他人表现爱心嘅最好方式，就系投身先驱服务，去需求更大嘅地区参与收割属灵庄稼嘅工作。可能你仲有其他方法可以扩大服务，只要你尽力去做，就一定会满心喜乐。

16,17． 如果你想为耶和华扩大服务，可以把握乜嘢机会？

¹⁶ 你愿唔愿意投身伯特利服务或者协助建筑工程？无论作为临时成员抑或通勤人员，你系咪都愿意献出自己？有啲弟兄姊妹愿意为耶和华去任何地方，接受任何委派。佢哋可能掌握某啲技能，喺某方面亦都好有经验，但如果组织有特别嘅需要，佢哋都乐意接受唔同嘅委派。上帝嘅组织一直都需要呢啲甘心乐意献出自己嘅弟兄姊妹。耶和华亦都好赏识佢哋所表现嘅自我牺牲精神。（诗篇110:3）

¹⁷ 你愿唔愿意接受更多训练，从而装备好自己，使自己更有效噉为耶和华服务？如果你愿意，就可以立下目标，努力符合资格参加王国传福音者训练班。嗰啲从事全时服务、有属灵思想嘅弟兄姊妹，通过呢个训练班得到好好嘅训练，可以为上帝嘅组织做更多嘅工作。申请参加呢个训练班嘅传道员，愿意喺毕业之后接受组织嘅任何委派。你系咪都好想把握呢个机会，尽力做更多嘅服务？（哥林多前书9:23）

18． 我哋每日同耶和华一齐工作，可以得到乜嘢益处？

¹⁸ 我哋待人慷慨，就表明我哋有良善、仁慈、爱心呢啲美好嘅特质。我哋作为耶和华嘅子民，每日都应该表现慷慨嘅精神，关心其他人。噉样，我哋就可以得到喜乐、和平同幸福。（加拉太书5:22,23）无论个人情况系点，你都能够效法耶和华，向人表现慷慨，成为佢宝贵嘅同工！（箴言3:9,10）