先去同弟兄讲和——应该点做？

想象吓，如果你生活喺耶稣时代嘅加利利。你需要长途跋涉去耶路撒冷庆祝住棚节。喺嗰个节期，耶路撒冷逼满咗好多远道而嚟嘅同工。你想将祭物献俾耶和华，所以你带住只羊，穿过挤拥嘅巷仔，向住圣殿嘅方向行。几经辛苦，你最终嚟到圣殿，发现嗰度逼满晒向耶和华献祭嘅人。等咗好耐，终于轮到你可以献祭嘞。点知就喺嗰个时候，你谂翻起有个弟兄对你不满，佢好可能就喺人群当中。耶稣解释俾我哋知喺呢个时候应该点做。（请读马太福音5:24）你同嗰个弟兄应该点做，先至系听从耶稣嘅指引追求和睦呢？请喺以下列出嘅选项中，拣选你认为啱嘅答案。

你会……

• 睇吓佢系咪有正当理由对你不满，如果唔系，就绝对唔会同佢讲和

• 尝试纠正你弟兄嘅睇法，因为你觉得佢过度敏感，或者想推卸责任

• 耐心听佢讲，即使你唔系完全了解弟兄嘅谂法。可能系佢觉得受到伤害，又或者你嘅无心之失真系伤害咗佢，无论系点，你都向佢诚恳道歉

你嘅弟兄会……

• 将你得罪咗佢嘅事话俾会众其他人知，希望得到佢哋嘅支持

• 怪责你，翻旧帐，将你得罪佢嘅每个细节都翻出嚟讲，要求你承认错误

• 欣赏你主动讲和所表现嘅谦卑同勇气，衷心宽恕你

今日我哋嘅崇拜唔会献上实际嘅祭牲。但系我哋从耶稣嘅教导可以睇出，保持弟兄之间嘅和睦，同我哋嘅崇拜蒙耶和华悦纳有乜嘢关系呢？