点样培养爱上帝同爱邻人嘅心？

虽然我哋唔需要遵守摩西律法，不过耶和华对基督徒嘅要求，可以用律法嘅两大诫命去概括，就系要爱耶和华同爱邻人。（太22:37-39）呢种爱唔系与生俱来嘅，而系需要努力培养嘅。点样培养呢？其中一个重要方法就系每日都阅读圣经。我哋沉思圣经关于上帝品格唔同方面嘅记载，就会留意到“耶和华可喜嘅恩德”。（诗27:4）噉样，我哋对上帝嘅爱就会与日俱增，亦会越来越接近佢嘅思想。呢种爱推动我哋服从上帝嘅诫命，包括对其他人表现自我牺牲嘅爱。（约13:34,35；约一5:3）以下有三个令圣经研读更有趣嘅方法：

• 善用想象力，令记载活现眼前。谂吓自己置身其中，会睇到乜嘢？听到乜嘢？闻到乜嘢？感觉到啲乜嘢？

  

• 运用唔同嘅方法。以下有一啲建议：你可以边睇经文，边听录音，或者读出经文。你唔一定要跟住每章嘅顺序去读，可以选择阅读某一章，某个部分。例如，阅读关于耶稣嘅记载嗰阵，可以运用《圣经参考手册》第4单元或者第16单元，又可以阅读《天天考查圣经》当日经文嘅嗰一章，亦可以根据圣经经卷成书时间嘅顺序去读。

  

• 理解所读嘅内容。即使每日只系睇一章经文，不过边读边沉思，细嚼慢咽嘅话，都总好过走马观花、匆匆而过噉睇好多章经文。阅读圣经嗰阵，要谂吓记载嘅背景，分析经文嘅细节，善用图表同埋参考经文。最少深入研究其中一个你唔明嘅地方。你用几多时间阅读经文，亦都应该抽几多时间沉思。