喺语言繁多嘅地区传道，要互相合作

当人听到用自己母语传达嘅王国信息，往往会有较好嘅反应。好可能因为呢个原因，喺公元33年五旬节，即使当时嘅犹太人以希伯来语或者希腊语作为通用语言，但系耶和华特意安排“天下各国虔诚嘅犹太人”，可以用佢哋“生来所用嘅语言”听见好消息。（徒2:5,8）今日，有啲地方住咗好多讲唔同语言嘅人，所以喺同一个社区可能有唔同语言嘅会众，噉呢啲会众可以点样互相合作，向地区嘅所有人作见证，而同时又避免重复探访，以至令住户反感呢？

• 

  商量（箴15:22）：各会众嘅传道监督应该一齐商量，制定一个大家都接受嘅方案，以有系统嘅方式作见证。如果一个外语会众嘅传道地区唔系好大，就可能唔想你嘅会众探访佢哋地区嘅住户。不过，如果情况相反，外语会众嘅地区好大，住户亦分得好散，唔一定可以经常探访所有住户。佢哋就可能想请你嘅会众照常探访所有住户，只系当揾到感兴趣嘅外语人士嗰阵，就通知佢哋。（《组织》93页37段）可能外语会众亦会请你嘅会众帮手揾出外语人士，然后将外语人士嘅地址转交俾佢哋。（《月报》2012/7刊5页附栏）要记住，住喺同一间屋嘅人，佢哋嘅母语亦有可能会唔同。另外，传道安排亦应该要符合当地嘅个人资料私隐条例。

• 

  合作（弗4:16）：要仔细听从传道监督嘅任何指示。你有冇主持紧一啲圣经课程，而呢啲学生最熟悉嘅语言其实唔系你会众嘅语言呢？如果你将学生转交俾附近讲嗰种语言嘅会众或者小组，话唔定佢会进步得更加快。

• 

  准备（箴15:28；16:1）：如果你传道嗰阵，咁啱遇到个讲外语嘅住户，就要把握机会向佢作见证。你可以预先谂吓传道嗰阵会遇到讲乜嘢语言嘅人，然后做好准备，下载定嗰啲语言嘅圣经同影片。你亦可以运用JW Language应用程式学习用呢啲外语同人打招呼。