喺乜嘢意义上嚟讲，使徒保罗“被接到三重天”同埋“被接到乐园”？（哥林多后书12:2-4）

喺哥林多后书12:2,3，保罗话某个人“被接到三重天”。呢个人系边个？保罗喺写俾哥林多会众嘅信入面强调，上帝正任用佢做使徒。（哥林多后书11:5,23）接住，佢就提到“主所赐嘅异象同启示”。因为保罗喺上下文并冇提及到其他弟兄，按理嚟讲，佢系得到异象同启示嘅人。（哥林多后书12:1,5）

所以，好可能保罗就系嗰个“被接到三重天”同埋“被接到乐园”嘅人。（哥林多后书12:2-4）佢用“启示”呢个词，表明上帝透露咗将来会发生嘅事。

保罗所讲嘅“三重天”系指乜嘢？

喺圣经入面，“天”可以指实际嘅天空。（创世记11:4；27:28；马太福音6:26）但系“天”亦都有其他意思。有时可以指人类嘅统治权。（但以理书4:20-22）有时亦都可以指上帝嘅统治权，例如上帝通过佢嘅王国所施行嘅统治。（启示录21:1）

保罗睇见嘅“三重天”，系乜嘢意思呢？喺圣经入面，某啲说话或字眼重复三次系表示深度或强度，目的系要达到强调嘅效果。（以赛亚书6:3；以西结书21:27；启示录4:8）所以，睇嚟保罗系用“三重天”嚟强调一种至高无上嘅统治形式，就系耶稣基督同14万4000个受膏君王一齐统治嘅弥赛亚王国。（请睇《洞悉圣经》（下册）390,396页）正如使徒彼得所写嘅，我哋正按照上帝嘅应许等待“新天”。（彼得后书3:13）

哥林多后书12:2提到嘅“三重天”，睇嚟系指耶稣基督同14万4000人统治嘅弥赛亚王国，即系“新天”。（彼得后书3:13）

上帝王国称为“三重天”，系要强调王国系一种至高无上嘅统治形式。