世界系咪好快会终结？

1．有咩方法可以预知未来会发生嘅事？

你睇新闻嘅时候，有冇谂过：“点解呢个世界会变成噉嘅？”有啲人睇到咁多天灾人祸，可能会谂：“世界系咪好快会终结呢？”有冇方法预知未来会发生嘅事？的确有。虽然人唔可以预知未来，但系耶和华上帝可以。上帝通过圣经话俾我哋知，人类同地球嘅未来会系点嘅。（以赛亚书46:10；雅各书4:14）

2,3．耶稣嘅门徒想知道乜嘢？耶稣点样回答？

² 圣经话呢个世界会终结，不过终结唔系指地球会被毁灭，而系指唔会再有坏人坏事。耶稣亦指出上帝嘅王国会统治整个地球。（路加福音4:43）门徒想知道上帝嘅王国几时嚟到，于是问耶稣：“几时会有呢啲事呢？你嘅临在同呢个制度嘅末期，有咩征象呢？”（马太福音24:3）耶稣并冇讲终结会几时嚟到，不过，佢就话俾门徒知世界终结之前会有乜嘢事发生。耶稣嘅预言正喺今日应验。

³ 呢一章会提出一啲证据，表明世界好快就会终结。不过，要明白点解今日世上会有咁多坏事，就要先了解天上爆发嘅一场战争。

天上嘅战争

4,5．（甲）耶稣登基作王之后，天上发生乜嘢事？（乙）根据启示录12:12，撒但被驱逐之后地上有乜嘢事发生？

⁴ 我哋喺第8章学到，1914年耶稣喺天上登基作王。（但以理书7:13,14）启示录透露当时有乜嘢事发生，经文话：“天上爆发战争，米迦勒［耶稣］、佢嘅天使同龙［撒但］争战，龙同佢嘅天使都嚟争战”。a撒但同佢手下嘅邪灵打败仗，被驱逐到地上。忠贞嘅天使一定好开心！噉地上嘅情况又点呢？圣经话世人会经历重重苦难。点解呢？因为“魔鬼知道自己时日无多，就非常愤怒，落到你哋嗰度”。（启示录12:7,9,12）

⁵ 而家魔鬼愤怒若狂，用尽一切手段喺地上制造祸患，因为佢知道上帝好快就会将佢除去。等我哋睇吓，耶稣预告最后嘅日子会有乜嘢事发生。——请睇附注24

最后嘅日子

6,7．关于战争同饥荒，你留意到啲乜嘢？

⁶ 战争 耶稣预言：“民族会攻打民族，王国会攻打王国”。（马太福音24:7）喺我哋嘅时代，死于战乱嘅人比历史上任何时候都要多。世界观察研究所嘅一份报告显示，自从1914年以来，就有超过一亿人喺战争中被杀。1900年至2000年嘅一百年间，死于战争嘅人数系之前19个世纪嘅三倍有多。战争实在为亿万人带嚟难以想象嘅伤痛！

⁷ 饥荒 耶稣预言会“有粮荒”。（马太福音24:7）即使今日粮食嘅产量比以往任何时候都多，不过，好多人一直都冇足够嘅食物。点解？因为佢哋买唔起食物，或者冇田地可以耕种。超过十亿人每日嘅生活费连1蚊美金都唔够。世界卫生组织话，每年有数以百万计嘅儿童死亡，主要原因系缺乏食物。

8,9．耶稣预言会有地震同疾病，事实点样表明呢啲预言已经应验？

⁸ 地震 耶稣预言“必有大地震”。（路加福音21:11）而家每年都会发生破坏力强大嘅地震。自1900年以来，超过二百万人因为地震而丧生。虽然监测地震嘅科技比以前进步，不过仲系有好多人死于地震。

⁹ 疾病 耶稣预告会有“瘟疫”。危险嘅疾病会快速传播，将好多人杀死。（路加福音21:11）即使现代医学已经有好大进步，仲系有好多病系医生都束手无策嘅。一份报导指出，每年有数以百万计嘅人死于肺结核、疟疾同霍乱等。唔单止噉，过去40年来，医生仲发现咗超过30种新嘅疾病，其中有啲直到而家都揾唔到治疗嘅方法。

最后日子世人嘅行为态度

10．提摩太后书3:1-5点样喺今日应验？

¹⁰ 提摩太后书3:1-5指出：“到咗最后嘅日子，必定有难以应付嘅非常时期”。使徒保罗描述好多人喺最后嘅日子会有点样嘅行为态度。佢话人会

• 自私

• 贪钱

• 忤逆父母

• 唔忠贞

• 冇亲情

• 冇自制

• 残暴同好斗

• 爱享乐多过爱上帝

• 表面爱上帝，不过就唔服从佢

11．根据诗篇92:7，邪恶嘅人会有乜嘢下场？

¹¹ 喺你居住嘅社区系咪好多人都表现出呢啲态度呢？的确，今日世上有好多噉嘅人。不过，上帝好快就会采取行动。佢承诺：“邪恶嘅人如杂草丛生，作恶嘅人如花木繁茂，到头来必永远灭绝。”（诗篇92:7）

最后嘅日子会有乜嘢美好嘅事发生？

12,13．喺最后嘅日子，耶和华帮助我哋明白乜嘢？

¹² 圣经预告喺最后嘅日子，世上会充满苦难。不过，圣经亦都预言会有美好嘅事发生。

¹³ 对圣经嘅理解 关于最后嘅日子，但以理先知写低以下嘅话：“真确嘅知识……会丰富起嚟”。（但以理书12:4）特别自1914年以来，耶和华使佢嘅子民对圣经有更清晰嘅理解。例如，我哋明白点解上帝嘅名咁重要、上帝对地球有乜嘢旨意、有关赎价嘅真理、人死后嘅情况同埋复活嘅希望。我哋学到只有上帝嘅王国先至可以解决所有难题，亦都学到点样嘅生活既快乐又可以令上帝喜悦。上帝嘅仆人得到真确嘅知识之后点样做呢？请睇吓另一个预言。——请睇附注21同25

14．今日，边啲人正传讲王国嘅好消息？达到乜嘢规模？

¹⁴ 全球嘅传道工作 关于最后嘅日子，耶稣话：“呢个王国嘅好消息会传遍普天下”。（马太福音24:3,14）今日，嚟自“所有国族、部族”嘅耶和华见证人喺240个国家同地区，以超过900种语言将王国好消息传讲开去。佢哋免费帮助人认识上帝嘅王国，同埋呢个王国会点样造益人类。（启示录7:9）耶稣预言佢嘅门徒会被人憎恨，甚至受到迫害，不过冇任何事能够阻止呢项普世嘅传道工作。（路加福音21:17）

你会采取乜嘢行动？

15．（甲）你认为我哋系咪正生活喺最后嘅日子呢？请解释。（乙）服从同对抗耶和华嘅人分别有乜嘢唔同嘅结局？

¹⁵ 你认为我哋系咪正生活喺最后嘅日子呢？圣经有好多关于最后日子嘅预言正喺今日应验。传讲好消息嘅工作一旦进展到某个程度，耶和华就会决定停止，到时“终结”就会嚟到。（马太福音24:14）终结系乜嘢？就系上帝会通过哈米吉多顿大战，将所有坏人坏事除去。耶和华会任用耶稣同大能嘅天使毁灭所有拒绝服从上帝同佢爱子嘅人。（帖撒罗尼迦后书1:6-9）之后，撒但同佢手下嘅邪灵就唔能够再误导人。所有决心服从上帝同支持佢王国统治嘅人，将会睇到上帝所有嘅承诺完全实现。（启示录20:1-3；21:3-5）

16．既然终结好快就会嚟到，你需要点做？

¹⁶ 受撒但控制嘅世界好快就会结束。既然系噉，我哋要问自己一个重要嘅问题：“我需要点做？”耶和华好想你加深对圣经嘅认识，所以你要努力学习圣经。（约翰福音17:3）每个星期，耶和华见证人都会举行聚会帮助人明白圣经，所以你要尽力经常参加聚会。（请读希伯来书10:24,25）学习圣经可能会使你睇出需要调整。不过唔使怕，只要你乐意作出改变，就会加深你同耶和华嘅友谊。（雅各书4:8）

17．点解终结嚟到嘅时候，大多数人都估唔到？

¹⁷ 使徒保罗话，毁灭会喺大多数人都估唔到嘅时候嚟到，“就好似贼喺夜晚嚟到一样”。（帖撒罗尼迦前书5:2）耶稣预言好多人会无视证据，唔肯相信而家系最后嘅日子。佢话：“挪亚嘅日子点样，人子临在嘅时候［或最后嘅日子］亦会点样。洪水以前嘅日子，人又饮又食，又娶又嫁，直到挪亚入方舟嗰一日。佢哋毫不理会，直到洪水嚟到，将佢哋全部冲走，人子临在嘅时候亦会系噉。”（马太福音24:37-39）

18．耶稣向我哋提出乜嘢警告？

¹⁸ 耶稣警告我哋千祈唔好因“滥食、纵酒同生活嘅忧虑”而分心。佢指出终结会“好似网罗一样”突然临到，而呢个日子“必定临到全地所有居民身上”。然后佢仲话：“你哋要时刻警醒，不断恳切祈求［或真诚祷告］，使你哋能够逃过呢一切要发生嘅事，可以企喺人子面前。”（路加福音21:34-36）点解听从耶稣嘅警告咁重要？因为撒但嘅邪恶世界好快就会被毁灭。只有嗰啲得到耶和华同耶稣悦纳嘅人先可以得救，永远生活喺新世界。（约翰福音3:16；彼得后书3:13）