“义人要因耶和华而欢喜”

迪安娜已经八十几岁嘞。佢先生患咗阿尔茨海默症（脑退化症），去世前嘅几年都住喺疗养院。迪安娜亦都要承受两个仔死去嘅悲痛，佢自己仲要同乳癌搏斗。不过，会众嘅弟兄姊妹都留意到，迪安娜参加聚会同传道嗰时一直都保持喜乐。

约翰从事探访会众嘅工作超过43年。佢好钟意自己所作嘅服务，甚至视之为自己嘅生命！不过，佢因为要照顾一个患病嘅亲人，唔能够继续做探访工作，而家喺一个会众服务。以前认识约翰嘅人喺大会堂见到佢嗰阵，觉得佢一啲都冇变，依然咁喜乐。

点解迪安娜同约翰能够保持喜乐呢？一个人身心饱受煎熬嘅时候，点样先可以保持喜乐？一个人失去自己珍视嘅服务机会，可以点样继续保持快乐？我哋可以喺圣经入面揾到秘诀：“义人要因耶和华而欢喜”。（诗篇64:10）如果我哋分清楚边啲事可以使我哋内心喜乐，边啲唔可以，噉我哋就能够更全面噉理解呢个宝贵真理。

一时嘅欢喜

你肯定知道某啲事系能够为你带嚟喜乐嘅。请谂吓，一对相爱嘅情侣准备结婚，BB出世，或者得到一个服务机会，呢啲嚟自耶和华嘅恩赐都可以带俾人喜乐。耶和华创立咗婚姻，使人能够生儿育女，亦都通过基督徒会众俾我哋工作委派。（创世记2:18,22；诗篇127:3；提摩太前书3:1）

不过，有啲事所带嚟嘅喜乐可能只系暂时嘅，因为配偶有可能会不忠或者死去；（以西结书24:18；何西阿书3:1）儿女可能唔服从父母同耶和华，甚至被开除。撒母耳嘅仔行事不蒙耶和华悦纳，大卫嘅行为令自己嘅家庭遭受灾祸。（撒母耳记上8:1-3；撒母耳记下12:11）呢啲事带嚟嘅只系悲伤同痛苦，唔会带嚟喜乐。

同样，因为健康状况恶化、家庭嘅责任或者组织嘅调整，我哋为弟兄姊妹服务嘅机会都可能有一日会终止。好多经历过呢种改变嘅人都承认，佢哋好怀念以前嘅工作为佢哋带嚟嘅满足感。

我哋好容易睇得出，呢啲喜乐喺某程度上只系相对或者暂时嘅。既然系噉，有冇一种喺逆境之下都唔会失去嘅喜乐呢？一定有，因为撒母耳、大卫同其他忠仆喺经历患难嘅时候都能够保持喜乐。

持久嘅喜乐

耶稣知道乜嘢系真正嘅喜乐。佢降生为人之前住喺天上，“时时喺［耶和华］面前欢喜”。（箴言8:30）虽然耶稣喺地上有时要面对困难，不过佢仲系好开心噉执行天父嘅旨意。（约翰福音4:34）后来，佢遭受极大嘅痛苦嗰时又点样呢？圣经话：“佢因为摆喺前头嘅喜乐，就轻视羞辱，喺苦刑柱上忍耐”。（希伯来书12:2）所以，耶稣对真正嘅喜乐所作嘅两个评论，的确值得我哋去讨论。

有一次，70个门徒完成传道委派之后返嚟见耶稣。佢哋因为自己所做嘅工作，甚至因为自己驱逐过邪灵，而感到喜乐。之后，耶稣同佢哋讲：“唔好因邪灵顺服你哋而欢喜，要因你哋嘅名已经记录喺天上而欢喜。”（路加福音10:1-9,17,20）冇错，得到耶和华嘅悦纳比享有某种特别嘅服务机会更加重要。耶和华赞许并记住佢忠贞嘅子民，呢个系得到更大喜乐嘅原因。

喺另一个场合，耶稣同一大群人讲话嘅时候，一个犹太妇人好欣赏耶稣出色嘅教导，就话耶稣嘅妈妈一定好有福。不过耶稣纠正佢话：“唔系。凡听见上帝嘅话语又遵守嘅人，先至有真正嘅幸福！”（路加福音11:27,28）儿女做咗啲令父母感到自豪嘅事，父母当然会好开心。不过，如果父母服从耶和华，同佢有亲密嘅关系，就会更加喜乐。

的确，我哋知道自己得蒙耶和华悦纳，内心可以享有好大嘅喜乐。虽然遭遇患难嘅时候我哋会唔开心，但系患难唔能够使我哋失去呢种喜乐。事实上，我哋喺艰难时期继续保持忠贞，得到嘅喜乐就更大。（罗马书5:3-5）另外，耶和华会将圣灵赐俾嗰啲对佢有信心嘅人，而圣灵果实嘅其中一种特质就系喜乐。（加拉太书5:22）呢一点可以帮助我哋明白，点解诗篇64:10话“义人要因耶和华而欢喜”。

呢一点亦都解释咗，文章开头提到嘅迪安娜同约翰喺唔容易应付嘅情况下，点解可以享有持久嘅喜乐。迪安娜话：“我好似一个想得到父母保护嘅小朋友噉，向耶和华寻求庇护。”佢点知道自己得蒙上帝悦纳呢？迪安娜又话：“我感受到佢俾我嘅祝福，使我能够经常面带微笑噉传道。”系乜嘢帮助约翰喺结束探访会众嘅工作之后继续积极传道呢？佢话：“自从1998年我被委派做组织事务训练班嘅导师以来，我比以前更加勤力做个人研读。”佢同太太都话：“咁多年来，无论耶和华叫我哋做乜嘢，我哋都愿意去做。我哋一直都以呢种态度嚟事奉耶和华，所以比较容易作出调整。我哋从来都冇后悔过。”

另外，有好多人都亲身体验到诗篇64:10讲得好啱。有一对夫妇喺美国伯特利服务咗超过30年，后来被委派到地区做特别先驱。佢哋话：“当你失去一啲自己好钟意嘅嘢嗰时，伤心系好自然嘅。”佢哋又话：“但系你唔能够一直伤心。”佢哋马上投入新委派，同会众嘅弟兄姊妹一齐传道。呢对夫妇亦都话：“我哋为一啲事好具体噉祷告，之后就睇到耶和华点样回应我哋嘅祷告。我哋大受鼓励，亦都感到好喜乐。我哋嚟到呢度之后冇几耐，会众有啲人就开始做先驱。耶和华亦都俾咗我哋两个进步良好嘅圣经学生。”

“永远欢欣喜乐”

当然，一直保持喜乐并唔容易，我哋都会有情绪起伏嘅时候。不过，耶和华通过诗篇64:10嘅经文安慰我哋。就算有时会灰心，不过我哋相信，只要喺任何情况下都保持忠贞，我哋就会“因耶和华而欢喜”。我哋仲可以期待耶和华“新天新地”嘅应许实现。到时，一切都会恢复完美。上帝嘅所有子民会因为耶和华所创造、所提供嘅而“永远欢欣喜乐”。（以赛亚书65:17,18）

呢个意味住乜嘢？就系可以享有完美嘅健康，充满活力噉开始每一日。无论人以往喺感情上受过几大嘅创伤，痛苦嘅回忆都唔会再浮现喺眼前。我哋可以肯定，“从前嘅事唔再有人回想，亦都唔再涌上心头”。好多人都复活过嚟，我哋可以同死去嘅亲友团聚。耶稣曾经复活咗一个12岁嘅女仔，将来无数人都会好似呢个女仔嘅父母噉“兴奋莫名，非常激动”。（马可福音5:42）最终，地上每一个人都系真正嘅“义人”，永远“因耶和华而欢喜”。