关于天使嘅真相

1．点解我哋应该认识天使？

耶和华想我哋认识佢嘅家庭。天使系上帝大家庭嘅成员，圣经称佢哋为“上帝嘅众子”。（约伯记38:7）天使有乜嘢职责？佢哋以往点样帮助人？今日佢哋可以点样帮我哋？——请睇附注8

2．天使系点嚟嘅？佢哋嘅数目有几多？

² 要认识天使，就先要知道佢哋系点嚟嘅。歌罗西书1:16话，耶和华创造咗耶稣之后，仲创造咗“天上嘅、地上嘅”一切，其中包括天使。天使嘅数目有几多呢？圣经话数以亿计。（诗篇103:20；启示录5:11）

3．关于天使，我哋从约伯记38:4-7学到乜嘢？

³ 圣经亦都话，耶和华创造地球之前已经创造咗天使。天使睇到上帝创造地球嘅时候，佢哋有咩反应呢？约伯记话佢哋好开心。当时所有天使都属于一个大家庭，彼此亲密无间，团结一致噉事奉耶和华。（约伯记38:4-7）

天使帮助上帝嘅子民

4．我哋点知道天使好关心人？

⁴ 天使一直都好关心人类，仲好想知道上帝对地球嘅旨意会点样实现。（箴言8:30,31；彼得前书1:11,12）天使见到亚当同夏娃反叛上帝，一定好难过。佢哋见到今日大多数人都唔服从耶和华，一定更加难过。但系，当佢哋见到有人回头归向上帝，就会好开心。（路加福音15:10）天使特别关心事奉上帝嘅人。难怪耶和华任用天使去帮助同保护佢地上嘅仆人。（希伯来书1:7,14）等我哋嚟睇吓一啲例子。

5．以往天使点样帮助上帝嘅仆人？

⁵ 所多玛同蛾摩拉呢两个城市被毁灭嘅时候，耶和华派两个天使去救罗得同佢嘅家人。（创世记19:15,16）好多个世纪之后，先知但以理俾人掟入狮子坑，不过一啲都冇受到伤害，因为“上帝差天使封住狮子嘅口”。（但以理书6:22）仲有一次，耶和华派一个天使帮助使徒彼得离开监狱，重获自由。（使徒行传12:6-11）耶稣喺地上嘅时候，天使亦都帮助过佢。例如，耶稣受浸之后，“有天使服事佢”。（马可福音1:13）耶稣即将被处决之前，有一个天使“加添佢嘅力量”。（路加福音22:43）

6．（甲）我哋点知道天使会帮助上帝现代嘅子民？（乙）我哋会解答边啲问题？

⁶ 虽然今日天使唔会再向人显现，但系上帝仲系任用天使去帮助佢嘅仆人。圣经话：“耶和华嘅天使喺敬畏佢嘅人四周安营，搭救佢哋。”（诗篇34:7）点解我哋需要受到保护？因为有强大嘅仇敌想伤害我哋。佢哋系边个？嚟自边度？佢哋试图点样伤害我哋？要解答呢啲问题，我哋就要睇吓亚当夏娃被造之后所发生嘅事。

隐形嘅仇敌

7．撒但欺骗人有几成功？

⁷ 我哋喺第3章学到，有个天使反叛上帝，仲想统治人类。圣经将佢称为魔鬼撒但。（启示录12:9）撒但想其他人同佢一样反叛上帝。佢欺骗夏娃之后，亦都成功令到好多人离弃耶和华。不过，世上仲系有人忠于耶和华，譬如亚伯、以诺同挪亚。（希伯来书11:4,5,7）

8．（甲）有啲天使点样成为邪灵？（乙）大洪水嘅时候邪灵为咗保住性命点样做？

⁸ 喺挪亚嘅日子，有啲天使反叛上帝离开天上嘅家园，然后化身为人嚟到地上。点解？圣经话佢哋想娶地上嘅女人做妻子。（请读创世记6:2）不过，天使噉样做系错嘅。（犹大书6）当时，大多数人同嗰啲邪恶嘅天使一样，变得道德堕落同凶恶残暴。耶和华决定降一场大洪水淹没全地，将作恶嘅人通通除灭，只系保存佢忠贞仆人嘅性命。（创世记7:17,23）邪恶嘅天使为咗保住性命，就返翻天上，而圣经就将佢哋称为邪灵。佢哋选择跟随撒但反叛上帝，于是魔鬼就成为佢哋嘅统治者。（马太福音9:34）

9．（甲）邪灵返翻天上之后有乜嘢遭遇？（乙）跟住落嚟，我哋会了解吓乜嘢？

⁹ 由于邪灵嘅反叛，耶和华唔再接纳佢哋作为家庭嘅一分子。（彼得后书2:4）邪灵唔可以再化身为人，但系佢哋会继续“迷惑……普天下嘅人”。（启示录12:9；约翰一书5:19）等我哋了解一下，邪灵点解可以误导同欺骗咁多人。（请读哥林多后书2:11）

邪灵点样欺骗人

10．邪灵点样欺骗人？

¹⁰ 邪灵会用各种唔同嘅方法使人中计。无论人直接抑或通过灵媒同邪灵沟通，例如通过神婆同邪灵打交道，噉样其实就系行通灵术。圣经吩咐我哋要远避任何同邪灵有关嘅事物。（加拉太书5:19-21）点解？就好似猎人为咗要捕捉猎物，会使用陷阱。邪灵为咗要控制人，亦会设下圈套使人中计。——请睇附注26

11．乜嘢系占卜？点解唔应该占卜？

¹¹ 占卜系邪灵用嘅其中一种手段。占卜系指运用超自然嘅力量预卜未来或者探知未知嘅事。占卜嘅形式包括观星、观兆、纸牌算命、用水晶球占卜或者睇掌相。好多人以为做呢啲事冇害，其实噉系好危险嘅。圣经透露邪灵同占卜算命嘅人系同一阵线嘅。使徒行传16:16-18记载咗“占卜嘅邪灵”使一个女仔有能力“行预卜之术”。当使徒保罗将佢身上嘅邪灵驱逐之后，嗰个女仔就即刻冇咗占卜嘅能力。

12．（甲）试图同死去嘅人沟通点解好危险？（乙）点解上帝嘅仆人要同邪灵有关嘅习俗划清界线？

¹² 邪灵仲会用另一种手段使人中计。佢哋使人相信有方法可以同死去嘅人沟通，令人误以为死去嘅人会喺某个地方继续生存，可以帮我哋或者害我哋。例如，一个人嘅亲友去世之后，佢可能会去揾灵媒，因为灵媒声称可以同死者沟通。邪灵使灵媒知道一啲有关死者嘅事，甚至可以模仿死者嘅声音。（撒母耳记上28:3-19）好多丧礼习俗，例如拜祭死人、葬礼后宴饮狂欢、纪念忌辰、守灵仪式同遵从某啲丧偶嘅人要守嘅传统，都同通灵术有关。人做呢啲事系因为佢哋相信死者喺某个地方继续生存。基督徒拒绝参与呢啲习俗，就可能会俾家人或者周围嘅人批评、侮辱或者排斥。虽然系噉，基督徒知道人死后就唔再存在。同死者沟通根本系冇可能嘅，佢哋亦都唔能够伤害我哋。（诗篇115:17）我哋要小心，千祈唔好试图同死者沟通或者同邪灵打交道，要同邪灵有关嘅习俗划清界线。（请读申命记18:10,11；以赛亚书8:19）

13．好多人曾经惧怕邪灵，而家点样？

¹³ 邪灵唔单止迷惑人，仲会吓人。今日，撒但同邪灵知道自己“时日无多”，好快就唔可以再为祸人间，所以佢哋比以前更加凶狠残暴。（启示录12:12,17）好多人曾经惧怕邪灵，但后来都可以摆脱对邪灵嘅恐惧。点解佢哋做得到呢？

点样抵抗邪灵

14．我哋唔想受到邪灵嘅影响，就要效法1世纪嘅基督徒点样做？

¹⁴ 我哋点样做先至可以抵抗邪灵嘅影响呢？喺古代嘅以弗所城，有啲人认识真理之前曾经同邪灵沟通。后来佢哋点样摆脱邪灵嘅控制？圣经话：“好多惯行魔法嘅人将书带嚟，堆喺一齐，当众烧毁”。（使徒行传19:19）由于佢哋想成为基督徒，所以就将同魔法有关嘅书全部烧毁。今日，我哋都需要采取同样嘅行动。一个人如果想事奉耶和华，就必须除去所有同邪灵有关嘅物品，包括鼓吹通灵术嘅书刊、杂志、电影、音乐、游戏同以魔法灵异题材吸引人嘅宣传海报，仲有星座运程、护身符一类嘅驱邪物品或饰物。（哥林多前书10:21）

15．要抵抗撒但同邪灵，我哋仲要采取乜嘢行动？

¹⁵ 以弗所嘅基督徒烧毁魔法书之后好多年，使徒保罗指出佢哋依然有一场“角斗”，要同“邪灵”对抗。（以弗所书6:12）由此可见，佢哋烧毁魔法书之后，邪灵并冇就此罢休。佢哋仲要采取乜嘢行动呢？保罗话：“要用信心当做大盾牌，使你哋能够熄灭［或者阻挡］恶者嘅一切火箭”。（以弗所书6:16）信心可以保护我哋，就好似大盾牌能够喺战场上保护士兵一样。如果我哋对耶和华嘅保护有十足嘅信心，就可以抵抗撒但同邪灵。（马太福音17:20）

16．我哋可以点样加强对耶和华嘅信心？

¹⁶ 我哋可以点样加强对耶和华嘅信心？要每日阅读圣经，学识信赖耶和华，相信佢会保护我哋。如果我哋对耶和华有坚强嘅信心，撒但同邪灵就伤害唔到我哋。（约翰一书5:5）

17．如果唔想受撒但嘅影响，我哋仲需要点样做？

¹⁷ 以弗所嘅基督徒仲需要点样做？由于以弗所周围都有人崇拜邪灵，保罗劝勉佢哋要“随时祷告”。（以弗所书6:18）佢哋需要经常寻求耶和华嘅保护。我哋又点呢？今日，我哋生活喺一个深受邪灵影响嘅世界，同样必须寻求耶和华嘅保护，而且要喺祷告中使用上帝嘅名。（请读箴言18:10）我哋不断祈求耶和华帮助我哋抵抗撒但嘅攻击，佢一定会垂听。（诗篇145:19；马太福音6:13）

18,19．（甲）我哋点先可以战胜撒但同邪灵？（乙）下一章会解答乜嘢问题？

¹⁸ 我哋将所有同邪灵崇拜有关嘅物品除去，依靠耶和华嘅保护，就能够抵抗撒但同邪灵，唔需要惧怕佢哋。（请读雅各书4:7,8）耶和华嘅力量比邪灵强好多。邪灵喺挪亚嘅日子已经被惩罚，最终仲会被上帝处决。（犹大书6）要记住，我哋并唔系孤军作战，因为耶和华正任用佢嘅天使保护我哋。（列王纪下6:15-17）我哋确信喺耶和华嘅帮助之下，一定可以战胜撒但同邪灵。（彼得前书5:6,7；彼得后书2:9）

¹⁹ 既然撒但同邪灵造成咁多苦难，点解上帝仲未毁灭佢哋呢？下一章会解答呢个问题。