追求真正嘅财富

1,2．喺呢个事物制度之下，点解一直都有穷人？

今日嘅经济制度又残酷又唔公平。好多年轻人揾极都揾唔到工。好多人冒住生命危险都要搬到更富裕嘅地区。就算喺富裕嘅地区，贫穷都系随处可见嘅。有钱人同穷人之间嘅差距越来越大。最近嘅统计显示，世界上最富裕嗰百分之一嘅人所拥有嘅财富，相当于另外百分之九十九嘅人嘅总和。虽然好难证实呢啲数字，不过无可否认嘅系，世上有数以亿计嘅人极度贫穷，而有啲人就钱多到几代人都使唔晒。耶稣体会到呢个残酷嘅现实，话：“你哋身边经常有穷人”。（马可福音14:7）点解呢个世界咁唔公平呢？

² 撒但嘅世界系由政治、宗教同商业制度所构成嘅。耶稣知道，上帝王国嚟到之前，撒但统治下嘅经济制度系唔会改变嘅。启示录18:3将贪婪嘅商业制度称为“商旅”。虽然，上帝嘅子民可以同世界嘅政治、错误宗教彻底划清界限，但就冇办法同撒但世界嘅商业制度完全分离。

3．我哋会讨论边啲问题？

³ 身为基督徒，我哋需要审察一下自己对商业制度有乜嘢睇法，可以问吓自己：“我点样运用物质财富，就可以表明自己对上帝有信心？我哋可以点样减少受唯利是图嘅商业世界影响，追求简单嘅生活？喺呢个动荡不安嘅世界，有乜嘢例子表明上帝嘅子民完全信赖佢？”

不义管家嘅比喻

4,5．（甲）喺耶稣所讲嘅比喻里面，管家陷入乜嘢困境？（乙）耶稣俾佢嘅门徒乜嘢劝告？

⁴ 请读路加福音16:1-9。耶稣呢个关于不义管家嘅比喻发人深省。管家俾人指控浪费资财之后，就即刻用“实用嘅智慧”，去结交嗰啲喺佢失业之后可以帮到自己嘅朋友。a耶稣当然唔系鼓励佢嘅门徒，用唔正当嘅手段喺呢个世界生存。管家嘅做法系“今世之子”所为，亦即系呢个世界嘅人会做嘅。其实，耶稣只系想通过呢个比喻讲明一个要点。

⁵ 耶稣清楚知道，同嗰个陷入困境嘅管家一样，大多数基督徒要喺呢个唔公平嘅商业世界谋生系好艰难嘅。所以耶稣劝勉门徒：“要用不义嘅钱财结交朋友。噉样，到你哋无财可用嘅时候，佢哋［耶和华同耶稣］就接你哋去永恒嘅居所。”我哋从呢个劝告学到乜嘢？

6．我哋点知道，人类从事商业活动追求物质财富唔系上帝原定嘅旨意？

⁶ 耶稣冇解释点解钱财系“不义”嘅，但系圣经帮助我哋清楚睇出，按照上帝原定嘅旨意，人类唔需要从事商业活动追求物质财富。喺伊甸园，耶和华俾亚当夏娃充足嘅供应。（创世记2:15,16）后来，到咗公元一世纪，圣灵喺受膏基督徒会众发挥作用嘅时候，“冇人话自己嘅财物系自己嘅，大家凡物共享”。（使徒行传4:32）先知以赛亚指出，终有一日，全人类都可以尽情享用地球嘅物质资源。（以赛亚书25:6-9；65:21,22）但系而家，耶稣嘅门徒就需要有“实用嘅智慧”，用“不义嘅钱财”喺现今呢个世界度谋生，同时仲要努力取悦上帝。

明智使用不义嘅钱财

7．路加福音16:10-13提出乜嘢劝告？

⁷ 请读路加福音16:10-13。喺耶稣所讲嘅比喻里面，管家为咗个人利益而结交朋友。但系，耶稣提醒佢嘅门徒，唔应该为咗自私嘅目的而结交天上嘅朋友。讲完管家嘅比喻之后，耶稣将点样运用“不义嘅钱财”同忠于上帝联系埋一齐。佢想我哋明白，我哋适当运用“不义嘅钱财”，就可以证明自己对耶和华忠心。可以点样做呢？

8,9．请举例说明，有啲人点样用不义嘅钱财嚟表现忠心。

⁸ 表明我哋忠心嘅一个最简单直接嘅方法系，用我哋嘅物质资财嚟捐助耶稣所预告嘅全球传道工作。（马太福音24:14）一个印度嘅细路女，将啲银仔慢慢储起嚟，放入自己嘅钱罂，甚至放弃买玩具都要噉做。钱罂满咗之后，佢就将啲钱捐晒出嚟支持传道工作。喺印度，一个拥有椰子园嘅弟兄，捐咗好多椰子俾马拉雅拉姆语远程翻译处。佢觉得，反正远程翻译处都需要买椰子，与其捐钱，不如直接提供椰子俾佢哋仲更加实际。呢个就系实用嘅智慧嘞。喺希腊都有类似嘅情况，弟兄姊妹经常捐橄榄油、芝士同其他食物俾伯特利家庭。

⁹ 一个住喺外国嘅斯里兰卡弟兄，将佢家乡间屋提供出嚟，作为聚会同大会嘅场地，又提供俾全时服务嘅人住。对呢个弟兄嚟讲，噉样做喺经济上会有损失，但系就大大帮助咗经济条件唔系咁好嘅传道员。喺传道工作受限制嘅地区，有啲弟兄提供自己嘅屋企作为当地嘅聚会所，使先驱同其他经济困难嘅人可以有一个聚会嘅地方，而唔需要承受经济压力。

10．我哋慷慨施与就会得到乜嘢福份？

¹⁰ 我哋从以上嘅例子睇到，上帝嘅子民清楚知道属灵嘅财富先至有真正嘅价值，所以佢哋善用物质嘅财富，“喺最小嘅事上忠心”。（路加福音16:10）上帝嘅朋友对自己作出嘅牺牲有咩睇法？佢哋明白到，表现慷慨大方，可以帮助自己获得“真正嘅财富”。（路加福音16:11）一个姊妹经常捐款支持王国工作，佢讲到自己得到嘅福分话：“我经常喺物质上表现慷慨，结果内心发生咗好大嘅改变，连自己都意想唔到。我发觉自己喺物质上越慷慨，喺态度同谂法上就越大方。我变得更加乐意宽恕人，容易对人表现耐心，亦都更容易接受劝告同面对挫折。”好多人因为表现慷慨而得到好多属灵嘅财富。（诗篇112:5；箴言22:9）

11．（甲）我哋慷慨捐款点样显出“实用嘅智慧”？（乙）上帝嘅子民点样互相弥补不足？（请睇吓课文开头嘅图片）

¹¹ 另外，运用“实用嘅智慧”嘅另一个方法系，用物质资财嚟支持王国事务。我哋可以充分考虑自己嘅环境同情况，把握机会去帮助其他人。有啲人喺物质方面比较富裕，但系就冇办法参与全时工作或者搬到需求更大嘅地区，不过佢哋仲系可以通过资助其他人嘅服务而深感满足。（箴言19:17）有啲地区喺物质方面非常贫乏，而属灵方面就好富裕，因为有好多人接受真理。自愿捐款就可以为呢啲地区供应书刊，亦都为当地嘅传道工作带嚟好大嘅支持。多年以来，有啲国家，例如刚果、马达加斯加同卢旺达，当地嘅弟兄通常要用成个星期甚至成个月嘅人工先至买得起一本圣经。所以，佢哋好多时都要面对一个抉择，到底系买食物俾屋企人，抑或系买圣经。而家，耶和华嘅组织资助翻译同分发圣经嘅工作，为呢啲家庭嘅成员同进步良好嘅圣经学生，免费提供圣经。呢啲地区嘅“不足”，由于好多慷慨嘅捐款，而家可以得到“弥补”。（请读哥林多后书8:13-15）无论系乐于施与嘅，抑或系欣然接受嘅，耶和华都好开心同佢哋做朋友。

追求简单嘅生活

12．亚伯拉罕点样表现出佢信赖耶和华？

¹² 同耶和华做朋友嘅另一个方法系尽量同商业世界减少来往，而且根据自己嘅情况，尽力追求“真正嘅”财富。古代嘅忠仆亚伯拉罕，为咗巩固同耶和华之间嘅友谊，听从上帝嘅指引，离开富裕嘅吾珥城住喺帐篷入面。（希伯来书11:8-10）佢一直都认为真正嘅财富嚟自耶和华，所以佢信赖耶和华而唔系物质所带嚟嘅益处。（创世记14:22,23）耶稣鼓励我哋要培养噉样嘅信心，佢同一个有钱嘅年轻人讲：“如果你想达到完美嘅地步，就要卖咗啲财物，分俾穷人。噉样，你就有财宝喺天上。你仲要嚟跟随我。”（马太福音19:21）呢个年轻人睇嚟缺乏亚伯拉罕噉样嘅信心，不过同佢唔一样嘅系，有好多人都全心全意信赖上帝。

13．（甲）保罗俾咗提摩太乜嘢劝勉？（乙）今日我哋点样应用保罗嘅劝勉？

¹³ 提摩太系个有信心嘅人。保罗话提摩太系“基督耶稣嘅精兵”，仲劝勉佢话：“凡系当兵嘅，都唔应该商务缠身，为求取悦召佢当兵嘅人。”（提摩太后书2:3,4）今日，超过一百万人投身全时传道工作。佢哋同其他跟从耶稣嘅人会根据自己嘅情况，尽力将保罗嘅劝勉应用出嚟。为咗抵抗呢个贪婪世界嘅广告诱惑，基督徒经常提醒自己：“欠债嘅系债主嘅仆人。”（箴言22:7）撒但好想我哋用晒所有嘅时间同精力，为呢个商业世界做奴隶。有啲决定可能会令我哋喺经济上长时间受到束缚。巨额嘅房贷、高昂嘅学费、名贵嘅汽车、奢华嘅婚礼，都会令我哋面对巨大嘅经济压力。我哋运用实用嘅智慧，简化生活，减少开支同债务，就可以好自由噉为上帝效劳，而唔使再做当今商业制度嘅奴隶。（提摩太前书6:10）

14．我哋需要点样嘅决心？请举例。

¹⁴ 我哋想保持过简单嘅生活，就要分清楚乜嘢系最优先嘅。有一对夫妇有一盘好赚钱嘅生意，但佢哋好想再次参与全时服务。呢个渴望，推动佢哋转让咗盘生意，卖咗部船同其他物质财产。跟住，佢哋就去参加纽约沃威克总部嘅志愿建筑工程。因为噉，佢哋得到特别嘅祝福，可以同佢哋嘅女仲有女婿喺伯特利服务。甚至有几个星期，佢哋父母都嚟埋，一齐参与总部嘅建筑工程。一个嚟自美国科罗拉多州嘅先驱姊妹，喺银行揾咗份兼职。上司好满意佢嘅工作，想用三倍人工请佢转做全职。但系，姊妹考虑过之后，觉得噉样自己就唔可以全心投入传道工作，所以拒绝咗呢个咁有吸引力嘅机会。耶和华嘅忠仆为咗追求王国作出咗好多牺牲，呢啲只不过系其中嘅一啲例子。属灵财富嘅价值，远远超过今日嘅商业制度俾到我哋嘅。如果我哋决心将王国放喺生活嘅首位，就可以表明我哋重视同上帝嘅友谊，追求真正嘅财富。

当物质财富帮唔到我哋

15．我哋喺边方面富足就可以得到莫大嘅满足感？

¹⁵ 我哋喺物质上富有，唔等于系上帝祝福紧我哋。耶和华会祝福嗰啲“喺善事上富足”嘅人。（请读提摩太前书6:17-19）例如，露西娅b知道阿尔巴尼亚有好大嘅传道需要，就好想去嗰度服务。虽然佢唔知道有咩方法维持以后嘅生活，但仲系全心信赖耶和华，于是喺1993年就离开意大利搬去嗰度。佢精通阿尔巴尼亚语，帮助咗超过60个人献身俾耶和华。虽然唔系每一个传道地区都有咁丰富嘅收获，但我哋为咗帮助人得到永生所做嘅任何事，都会系我哋一生嘅珍宝。（马太福音6:20）

16．（甲）今日嘅商业制度将会有乜嘢结局？（乙）我哋知道呢一点，点样影响我哋对物质财富嘅睇法？

¹⁶ 喺路加福音16:9，耶稣讲嘅系“到……无财［不义嘅钱财］可用嘅时候”，而唔系“如果无财可用”。喺最后嘅日子会发生银行同经济崩溃，但比起不久嘅将来喺全球发生嘅事，简直系微不足道。撒但嘅成个制度——政治、宗教同商业——注定会彻底失败。先知以西结同西番雅都预告，黄金、白银呢啲商业世界嘅重要商品，到时都会变得一文不值。（以西结书7:19；西番雅书1:18）如果我哋到咗生命嘅尽头，意识到自己因为大量积存呢个世界“不义嘅钱财”而放弃咗真正嘅财富，会有点样嘅感觉呢？情形就好似，一个人成世搏命揾钱，到最后先发现啲钱系假嘅噉。（箴言18:11）呢啲噉样嘅财富最终将会变得毫无价值，所以千祈唔好错过同耶和华、耶稣“结交朋友”嘅机会。我哋为咗促进耶和华王国事务所做嘅一切，都可以使我哋积存更多嘅属灵财富。

17,18．上帝嘅朋友会有点样嘅未来？

¹⁷ 当上帝嘅王国统治地球嘅时候，我哋唔再需要交租或供楼，唔使钱就可以得到丰富嘅食物，亦都唔使再去睇病食药。耶和华喺地上嘅大家庭将会享受到呢个地球最好嘅出产。金、银、各种宝石都会用嚟做装饰，而唔系用嚟投资，或者俾少数人独占。我哋可以自由噉使用优质嘅木材、石头同金属嚟建造美观嘅房屋。朋友帮助你，纯粹系因为佢哋乐意噉做，而唔系为咗钱。到时，我哋人人都可以享用大地嘅美物，呢一切安排将会带俾我哋全新嘅生活方式。

¹⁸ 结交天上嘅朋友会为我哋带嚟无价嘅财富，以上提到嘅只系其中一部分。耶和华嘅子民将会享有永无穷尽嘅喜乐，佢哋会听见耶稣话：“蒙我父亲赐福嘅人，嚟承受从世界奠基以来为你哋预备好嘅王国啦。”（马太福音25:34）