“上帝嘅话语……系有力量嘅”

1．点解我哋确信上帝嘅话语系有力量嘅？（请睇吓课文开头嘅图片）

身为耶和华嘅子民，我哋确信上帝话语带俾人嘅信息“系活嘅，系有力量嘅”。（希伯来书4:12）我哋自己嘅人生就系一个有力嘅证据，证明圣经有力量改变人嘅一生。有啲弟兄姊妹曾经偷过嘢，吸过毒，或者有过性不道德嘅生活。另外有啲人虽然喺呢个制度有名有利，不过佢哋总系会觉得生活有所欠缺。（传道书2:3-11）好多感到迷惘同绝望嘅人，因为圣经嘅力量而揾到人生嘅意义。你可能读过《守望台》“圣经真理改变人的一生”嘅专栏文章，好钟意里面嘅人物经历。你可以从中睇出，就算接受真理之后，基督徒都要继续通过圣经嘅帮助喺属灵上进步。

2．上帝嘅话语点样对公元1世纪嘅基督徒发挥作用？

² 今日，有好多人因为学咗圣经而作出好大嘅改变。我哋会唔会因为呢件事而觉得惊讶？当然唔会！公元1世纪嘅受膏基督徒就有过类似嘅经历。（请读哥林多前书6:9-11）保罗提出有边啲行为嘅人唔可以承受上帝嘅王国，之后又话：“你哋有啲人以前都做过噉样嘅事”。由于有圣灵同圣经嘅帮助，最后佢哋都能够改变过嚟。虽然有啲基督徒已经接受咗真理，但系佢哋仍然要克服严重嘅属灵难题。例如圣经提到，公元1世纪有个受膏基督徒俾会众开除咗，之后佢作出改变，重新被会众接纳。（哥林多前书5:1-5；哥林多后书2:5-8）见到同工运用上帝嘅话语去面对同克服各种难题，真系俾咗我哋好大嘅鼓励！

3．喺呢篇课文，我哋会讨论乜嘢？

³ 上帝嘅话语系一个强而有力嘅工具，所以我哋真系要充分善用。（提摩太后书2:15）喺呢篇课文，我哋会讨论吓可以点样更有效噉发挥上帝话语嘅力量（1）喺生活上；（2）喺传道工作上；（3）喺台上教导嗰时。噉样做就可以帮助我哋对仁爱嘅天父表现爱同感激之心，因为佢嘅教导使我哋得益。（以赛亚书48:17）

喺我哋嘅生活上

4．（甲）如果想上帝嘅话语喺我哋身上发挥作用，我哋就要点样做？（乙）你自己点样拨出时间研读圣经？

⁴ 如果想上帝嘅话语喺我哋身上发挥作用，我哋就要拨出时间每日阅读圣经。（约书亚记1:8）当然，大多数人嘅生活都好忙碌。虽然系噉，我哋都唔应该俾任何事，甚至系一啲必须嘅责任，破坏我哋研读圣经嘅习惯。（请读以弗所书5:15,16）耶和华嘅好多子民都用唔同嘅方法喺一日当中尽力揾出时间嚟做个人研读。佢哋同诗篇执笔者有同样嘅感觉：“我真系好爱你嘅律法！日夜不停噉沉思。”（诗篇119:97）

5,6．（甲）点解沉思好重要？（乙）我哋可以点样更有效噉沉思？（丙）你自己点样从研读同沉思上帝嘅话语得益？

⁵ 除咗阅读圣经之外，我哋都要沉思读过嘅内容。（诗篇1:1-3）我哋噉样做，先至可以将呢啲实用又唔会过时嘅智慧喺生活上应用出嚟。无论我哋读嘅系印刷版定系电子版圣经，目标都应该系，将圣经嘅内容深深刻喺我哋嘅心上。

⁶ 点样沉思先至系有效嘅？好多人读完一段经文之后就会停落嚟，谂吓以下嘅问题：“我从呢段经文睇出耶和华系一位点样嘅上帝？呢段经文嘅边啲原则我已经应用喺生活上？仲有边啲方面我需要改善？”我哋祷告，而且沉思上帝嘅话语，就会受到推动将所读嘅更充分噉应用出嚟。噉样做，我哋就可以喺自己嘅生活上大大发挥上帝话语嘅力量。（哥林多后书10:4,5）

喺传道工作上

7．点解喺传道工作上我哋应该善用上帝嘅话语？

⁷ 喺传道嘅时候，乜嘢能够帮助我哋善用上帝嘅话语？其中一个方法就系，喺传道同教导嘅时候经常使用圣经。一个弟兄话：“如果你同耶和华一齐逐家逐户传道，向住户分享好消息，你会自己一个人讲晒，定系会请耶和华嚟讲？”呢个弟兄嘅意思系，我哋传道嗰时直接读出经文，就系俾耶和华同住户交谈嘞。一节适当嘅经文比我哋讲嘅任何嘢都更加有力。（帖撒罗尼迦前书2:13）请问吓自己：“我有冇利用每个机会同人分享上帝嘅话语呢？”

8．喺传道嘅时候，除咗读出经文，我哋仲需要点做？

⁸ 当然，只系向人读出经文系唔够嘅。点解呢？因为好多人对圣经嘅认识唔多，甚至完全冇概念。公元1世纪系噉，今日亦都系噉。（罗马书10:2）所以我哋唔应该认为，只系听我哋读出经文，住户就会理解经文嘅意思。我哋需要花啲时间分析经文嘅唔同部分，重复读出一啲关键词，然后解释经文嘅意思。噉样做就可以善用上帝嘅话语打动听者嘅心。（请读路加福音24:32）

9．我哋用乜嘢方法嚟介绍经文，就会使住户更加尊重圣经？请举例。

⁹ 我哋有技巧噉介绍经文，就会使住户更加尊重圣经。例如，我哋可以话：“等我哋睇吓造物主对呢件事有咩睇法。”如果对方冇基督教背景，我哋可以话：“请你留意呢本世界名著点讲。”又或者传道对象对宗教信仰冇兴趣，我哋可以问：“你有冇听过呢句俗语？”冇错，我哋要先考虑住户嘅个别情况，然后按佢哋嘅需要运用唔同嘅介绍词。（哥林多前书9:22,23）

10．（甲）请讲吓一位弟兄嘅传道经历。（乙）你喺传道工作上点样睇出上帝嘅话语系有力量嘅？

¹⁰ 好多人发现，喺传道嘅时候使用上帝嘅话语能够对住户产生深刻嘅影响。请睇吓一个例子。一个弟兄续访一位读咗我哋杂志好多年嘅老人家。弟兄唔单止留低最新嘅守望台杂志，仲喺文章入面拣咗一节经文读出嚟。佢翻开圣经，读出哥林多后书1:3,4：“佢系慈悲嘅父亲，亦系赐一切安慰嘅上帝。我哋遭遇各样患难嘅时候，上帝都安慰我哋”。老人家俾呢段经文深深打动，佢叫弟兄再读多一次。呢位老人家表示佢同太太都好需要安慰，佢亦都开始对圣经嘅信息产生兴趣。你同唔同意，喺传道嘅时候运用上帝嘅话语的确可以发挥强大嘅力量呢？（使徒行传19:20）

喺台上教导嗰时

11．喺台上教导嘅弟兄有责任点样做？

¹¹ 我哋所有人都好钟意参加基督徒聚会、分区大会同区域大会。呢啲聚会系崇拜嘅一个重要部分。喺聚会得到嘅属灵指引亦都俾咗我哋好大嘅益处。弟兄有机会喺呢啲场合发表演讲系一个好大嘅殊荣。同时，佢哋应该睇出自己责任重大。（雅各书3:1）佢哋需要确保所教嘅完全基于上帝嘅话语。如果你受到委派喺台上教导，你可以点样喺自己嘅节目当中发挥圣经嘅力量呢？

12．台上嘅讲者可以点样确保经文系演讲嘅主干？

¹² 要确保经文系你演讲嘅主干。（约翰福音7:16）呢个牵涉到乜嘢？首先，你喺演讲嗰阵唔好俾一啲经历、比喻，又或者你个人嘅表达方式，分散听众对经文嘅注意力。其次要记住，读出好多经文，唔等于就系用圣经嚟教导。其实，使用太多经文，到头嚟听众可能连一节经文都记唔住。所以，你要谨慎选择嗰啲主要嘅经文，然后用充足嘅时间朗读、解释同举例说明，仲要指出点样应用经文所蕴含嘅原则。（尼希米记8:8）如果演讲以组织提供嘅大纲为基础，就要先研究大纲嘅参考资料同相关经文，再搞清楚参考经文同大纲要点之间嘅关系，然后用已经拣好嘅经文将大纲嘅要点发挥出嚟。（你可以喺《神圣教育使你得益——传道训练班课本》第21至23课揾到实用嘅建议。）最重要嘅系，要祷告求耶和华帮你将圣经嘅宝贵真理表达出嚟。（请读以斯拉记7:10；箴言3:13,14）

13．（甲）一个姊妹点样深受聚会嗰时听到嘅经文所打动？（乙）你点样从聚会嘅圣经教导得益？

¹³ 一个住喺澳大利亚嘅姊妹，深受聚会嗰时听到嘅经文所打动。虽然佢有悲惨嘅童年，但仲系响应真理，将自己嘅一生献俾耶和华。即使系噉，佢始终好难接受耶和华对佢嘅爱。乜嘢改变咗佢嘅谂法呢？一个转捩点就系，佢将聚会嗰阵听到嘅一节经文同其他经文联系埋一齐沉思。慢慢，佢就相信上帝系爱佢嘅。a你有冇试过喺聚会或者大会嗰时俾上帝嘅话语打动呢？（尼希米记8:12）

14．点样表明我哋珍视上帝嘅话语？

¹⁴ 我哋真系好感激耶和华赐俾我哋圣经！佢唔单止仁爱噉将圣经提供俾人类，仲实现自己嘅应许，使圣经得以保存落嚟。（彼得前书1:24,25）所以，我哋应该经常阅读上帝嘅话语，将圣经嘅原则应用喺生活上，亦都要用圣经帮助其他人。噉样做，就表明我哋珍视圣经嘅宝贵价值，更重要嘅系，表明我哋爱圣经嘅作者耶和华上帝。