读者来函

喺古代嘅以色列，弥赛亚嘅所有祖先系咪一定要系头生子？

之前我哋根据希伯来书12:16作出咗一啲解释。呢节经文话以扫“唔重视圣物”，“为咗一啲食物，就出卖自己嘅长子权［俾雅各］”。噉样睇嚟，好似系因为雅各得到“长子权”，先可以成为弥赛亚嘅祖先。（马太福音1:2,16；路加福音3:23,34）

不过，其他经文表明弥赛亚嘅祖先唔一定都系头生子。请考虑吓以下嘅证据：

雅各（以色列）嘅头生子系利亚所生嘅吕便。之后，雅各最钟意嘅妻子拉结生咗佢第一个仔约瑟。吕便犯咗性不道德之后，雅各就将长子权交咗俾约瑟。（创世记29:31-35；30:22-25；35:22-26；49:22-26；历代志上5:1,2）但系，弥赛亚嘅家系并唔系出自吕便或者约瑟，而系出自雅各第四个仔，由利亚所生嘅犹大。（创世记49:10）

路加福音3:32列出弥赛亚嘅其中五个祖先。每一个睇嚟都系头生子。波阿斯生俄备得，俄备得生耶西。（路得记4:17,20-22；历代志上2:10-12）

虽然大卫唔系耶西嘅头生子，而系耶西八个仔当中最细嘅，不过弥赛亚就系出自大卫嘅家系。（撒母耳记上16:10,11；17:12；马太福音1:5,6）同样，所罗门系弥赛亚嘅祖先，不过佢都唔系大卫嘅头生子。（撒母耳记下3:2-5）

呢个并唔系话做头生子唔重要。头生子享有尊贵嘅地位，亦都会成为下一位家主，又可以得到双倍嘅产业。（创世记43:33；申命记21:17；约书亚记17:1）

但系，长子权系可以转让嘅。亚伯拉罕遣走以实玛利，将长子权俾咗以撒。（创世记21:14-21；22:2）以上亦都提到，吕便嘅长子权被转交俾约瑟。

而家我哋再睇翻希伯来书12:16，经文话：“免得有人淫乱，唔重视圣物，好似以扫一样。佢竟然为咗一啲食物，就出卖自己嘅长子权。”呢度想强调乜嘢呢？

使徒保罗唔系想讨论弥赛亚嘅家系，其实佢系想劝勉基督徒要“修平［佢哋］所走嘅道路”，以免犯下淫乱而“失去上帝嘅分外恩典”。（希伯来书12:12-16）如果佢哋唔听从保罗嘅劝告，就会好似以扫一样“唔重视圣物”。

以扫生活喺族长时期，可能佢都有机会为家人献过祭。（创世记8:20,21；12:7,8；约伯记1:4,5）不过，为咗满足肉体嘅需要，以扫宁愿放弃佢嘅长子权去换取一碗红羹。上帝曾经预告亚伯拉罕嘅后代会经历苦难，可能以扫唔想承受呢啲痛苦。（创世记15:13）后来，以扫娶咗两个异教女子，令佢父母好痛心，进一步表明佢唔重视圣物。（创世记26:34,35）雅各就完全唔同，佢下定决心要娶一个崇拜耶和华嘅女子为妻。（创世记28:6,7；29:10-12,18）

所以有关弥赛亚耶稣嘅祖先，我哋可以得出乜嘢结论？弥赛亚嘅祖先的确有啲系头生子，但唔系所有都系。犹太人都承认基督系出自耶西嘅细仔大卫嘅，由此睇出佢哋并冇否认呢一点。（马太福音22:42）