“愿人赞赏你明白事理”

呢句话系古代以色列人大卫讲嘅，当时佢称赞紧一个女子。嗰个女子叫做亚比该。大卫点解称赞佢？我哋又可以从亚比该身上学到乜嘢呢？

大卫喺逃避扫罗王嘅追捕嗰时遇到亚比该。当时，亚比该已经系拿八嘅妻子。拿八系一个有钱人，佢将所有嘅牲畜都放养喺犹大南部嘅山区。大卫同佢嘅手下“好似围墙一样”保护拿八嘅羊群同仆人。后来，大卫派人见拿八，求佢“手头有乜嘢多出嚟嘅”就俾佢哋做食物。（撒母耳记上25:8,15,16，英语《圣经新世界译本》）大卫同佢嘅手下咁用心保护拿八嘅财物，噉嘅要求一啲都唔过分。

拿八嘅名，意思系“无知”或者“蠢才”，佢真系人如其名。拿八粗暴无礼噉拒绝大卫嘅请求。佢毫不讲理，令大卫觉得受到冒犯，所以大卫准备去对付佢。拿八同佢嘅屋企人会因为佢嘅愚蠢而付出代价。（撒母耳记上25:2-13,21,22）

亚比该睇出，拿八行事鲁莽会带嚟好严重嘅后果，所以佢果断采取行动。亚比该恭敬噉恳求大卫考虑佢自己同上帝嘅关系。然后，亚比该为呢位以色列嘅下一任君王大卫同佢手下提供充足嘅食物。另一方面，大卫睇出耶和华通过亚比该嚟阻止自己，免得自己做出一啲得罪上帝嘅事。大卫同亚比该讲：“愿人赞赏你明白事理，又愿你蒙福，因为你今日阻止我流血害命”。（撒母耳记上25:18,19,23-35）

拿八对大卫一啲感激之心都冇，我哋肯定唔想好似佢噉样对待嗰啲帮助过我哋嘅人。再加上，如果我哋知道有啲唔好嘅事即将会发生，我哋就应该尽己所能去化解。的确，我哋同诗篇执笔者有同感，佢同上帝讲：“求你教我行善明理，求取知识”。（诗篇119:66）

如果其他人通过我哋嘅行为，睇出我哋明白事理、有智慧，无论佢哋有冇讲出嚟，佢哋嘅感受都可能会同大卫一样：“愿人赞赏你明白事理”！