第9课
你嘅家庭点样先至能够快乐呢？
1．点解婚姻要合法，家庭先至会快乐？
好消息嚟自快乐嘅上帝耶和华，佢希望每个家庭都幸福快乐。（提摩太前书1:11）耶和华创立咗婚姻。家庭要幸福快乐，合法嘅婚姻系好重要嘅，噉样大人同小朋友都可以感受到爱、有安全感。所有愿意服从上帝嘅人都应该尊重法律，登记结婚。 请读路加福音2:1,4,5
上帝对婚姻有咩睇法？佢希望丈夫同妻子一齐生活，谨守一生一世嘅婚誓。耶和华希望丈夫对妻子忠心，妻子亦都对丈夫忠心。（希伯来书13:4）佢讨厌人离婚。（玛拉基书2:16）但系，丈夫同妻子当中如果有一个通奸，上帝就容许清白嘅一方离婚，同埋再婚。 请读马太福音19:3-6,9
2．丈夫同妻子应该点样彼此相待？
耶和华创造男人同女人，等佢哋结婚之后，可以互为补足。（创世记2:18）上帝俾丈夫做一家之主，所以丈夫应该负起养家嘅责任，带头教导家人认识耶和华。丈夫要爱妻子，甚至愿意为妻子作出牺牲。丈夫同妻子应该彼此相爱，互相尊重。人人都系唔完美嘅，所以婚姻幸福嘅秘诀系，丈夫同妻子都要学识宽恕。 请读以弗所书4:31,32；5:22-25,33；彼得前书3:7
3．婚姻生活唔快乐嘅话，应唔应该放弃呢？
如果婚姻出现难题，夫妻双方都需要付出努力用爱心相待。（哥林多前书13:4,5）圣经唔鼓励夫妻一遇到婚姻问题，就用分居呢个方法解决。 请读哥林多前书7:10-13
4．做仔女嘅，上帝希望你有点样嘅人生呢？
耶和华上帝希望你快乐。佢俾最好嘅指引你，使你知道点样先至能够享受你嘅青春。佢希望你从父母嘅智慧同经验得益。（歌罗西书3:20）创造主耶和华希望你听从佢同耶稣嘅话，从中体验快乐。 请读传道书11:9－12:1；马太福音19:13-15；21:15,16
5．做父母嘅，你点样做先至能够使仔女快乐呢？
你要努力工作，为仔女提供住嘅、食嘅同着嘅。（提摩太前书5:8）想仔女快乐，你仲要教佢哋爱上帝、向上帝学习。（以弗所书6:4）你爱上帝，为仔女立下好榜样，就能够深深打动佢哋嘅心。你按照圣经教导仔女，佢哋就能够养成正确嘅态度，有良好嘅行为。 请读申命记6:4-7；箴言22:6
你鼓励同称赞仔女，可以使佢哋得益。你亦需要管教同纠正仔女，噉佢哋就受到保护，唔会因为做错事而失去快乐。（箴言22:15）不过，管教嗰时唔应该太严厉同苛刻。 请读歌罗西书3:21