按圣经嘅话去做有乜嘢益处？

1．点解我哋需要指引？

创造主比我哋更加有智慧。佢系仁爱嘅父亲，好关心我哋。佢希望我哋听佢嘅话，而唔系自己想做乜嘢就做乜嘢。（耶利米书10:23）正如小朋友需要父母嘅指导，我哋亦都需要上帝嘅指导。（以赛亚书48:17,18）圣经系上帝俾我哋嘅礼物，可以喺生活上指导我哋。 请读提摩太后书3:16

圣经嘅原则能够俾我哋最好嘅指导，使我哋知道今日点样过快乐嘅生活，将来点样先至能够永远生活落去。我哋系上帝创造嘅，所以应该乐意听佢嘅话，接受佢嘅指引。 请读诗篇19:7,11；启示录4:11

2．圣经原则系乜嘢呢？

圣经原则系基本嘅真理，适合用喺唔同嘅情况。而律法可能就只适合用喺某啲特定嘅情况。（申命记22:8）我哋要善用思考力，谂吓点样喺唔同嘅情况运用圣经原则。（箴言2:10-12）例如，圣经话俾我哋知，生命系嚟自上帝嘅恩赐。明白呢个圣经原则，我哋喺工作嘅地方、屋企同使用交通工具嗰阵都会注意安全。 请读使徒行传17:28

3．边两个圣经原则系最重要嘅？

耶稣提到两个圣经原则系最重要嘅。第一，要认识上帝，爱佢，忠心噉事奉佢，我哋应该以呢个为人生目标。无论我哋做乜嘢决定，都要考虑呢个原则。（箴言3:6）我哋听从呢个原则，就可以同上帝做朋友，得到真正嘅快乐，而且有希望永远生活落去。 请读马太福音22:36-38

第二个原则可以指引我哋同其他人和睦相处。（哥林多前书13:4-7）要做到呢点，我哋就要效法上帝嘅方式对待其他人。 请读马太福音7:12；22:39,40

4．按圣经嘅原则去做有乜嘢益处？

一家人都按照圣经嘅原则去做，就会相亲相爱，和和气气。（歌罗西书3:12-14）丈夫同妻子听从上帝嘅吩咐一齐生活，谨守一生一世嘅婚誓，家庭就会快乐。 请读创世记2:24

我哋按照圣经嘅原则去做，就能够减少生活上嘅烦恼，而且能够对金钱有正确嘅睇法。譬如，我哋听从上帝嘅吩咐，为人诚实、勤力做嘢，就比较容易揾到工作，因为老板通常都钟意噉样嘅员工。（箴言10:4,26；希伯来书13:18）另外我哋亦都学会，拥有生活所需就知足，明白同上帝做朋友比拥有物质财富更加重要。 请读马太福音6:24,25,33；提摩太前书6:8-10

我哋按照圣经嘅原则去生活，身心都会更加健康。（箴言14:30；22:24,25）譬如，上帝话我哋可以饮酒，但系唔应该饮醉酒。（诗篇104:15；哥林多前书6:10）我哋唔过量饮酒，就冇咁容易患上重病或者遇到意外。（箴言23:20）圣经嘅原则唔单止指引我哋嘅思想，亦都引导我哋嘅行为。（诗篇119:97-100）不过，基督徒听从上帝嘅吩咐，唔单止系为咗自己嘅益处，更重要嘅系为咗荣耀上帝。 请读马太福音5:14-16