点解呢个世界会变成噉？
无论报纸、电视、电台定系互联网，经常都会报道好多同罪恶、战争或者恐怖袭击有关嘅事。而你亦可能因为自己患病或者亲友去世，觉得好痛苦。
请问吓自己：
点解会有咁多坏事发生？
我嘅难题点先可以得到解决？
会唔会有真正嘅和平呢？
对于呢啲问题，圣经可以俾到你满意嘅答案。
圣经话俾我哋知，上帝会完全改变地球嘅情况。
人唔会再有痛苦、衰老、死亡。——启示录21:4
“跛脚嘅要跳跃如鹿”。——以赛亚书35:6
“盲人嘅眼睛必张开”。——以赛亚书35:5
死去嘅人会重获生命。——约翰福音5:28,29
人唔会有病。——以赛亚书33:24
人人都会衣食无忧。——诗篇72:16
从圣经真理得益
你睇过呢本书开头嗰几页之后，可能会觉得圣经嘅应许根本冇可能发生。不过，上帝承诺好快就会实现呢一切，圣经亦都解释上帝会点样实现佢嘅承诺。
圣经仲提供方法，使我哋而家就可以得到真正嘅快乐，过有意义嘅生活。目前有乜嘢事会令你烦恼或者忧伤？可能系金钱、家庭、健康或者亲友去世。圣经唔单止可以帮助你应付目前嘅困难，仲可以帮助你揾到以下人生问题嘅答案：
点解我哋会受苦？
我哋嘅难题点先可以得到解决？
家庭点样先可以幸福快乐？
人死咗之后会点样？
我哋会唔会同死去嘅亲友重聚？
我哋点知道上帝一定会实现佢嘅承诺？
你而家睇紧呢本书，表明你都好想知道呢啲人生问题嘅答案。呢本书嘅段落附上一啲问题，可以帮助你明白圣经。今日千百万人都好钟意用问答嘅方式同耶和华见证人讨论圣经。我哋希望你都会钟意。明白圣经嘅道理一定可以使你得益不浅！