爱心——一种宝贵嘅特质

使徒保罗喺上帝嘅启示下写道，由圣灵产生嘅果实有九种特质。（加拉太书5:22,23）佢将呢啲美好嘅特质睇成一个整体，称为“圣灵嘅果实”。a呢个果实就系我哋要培养嘅“新品格”。（歌罗西书3:10）一棵树得到悉心照顾就会结出果实，同样，圣灵喺一个人嘅生活上发挥作用，呢个人就会表现出圣灵嘅果实。（诗篇1:1-3）

保罗提及圣灵果实嘅第一种宝贵特质就系爱心。呢种特质有几宝贵？保罗话如果佢冇爱心，“就唔算得系乜嘢”。（哥林多前书13:2）到底爱心系乜嘢？我哋可以点样培养呢种特质？我哋每日可以点样表现爱心？

点样将爱表现出嚟？

虽然好难用一啲字词嚟解释乜嘢系爱，不过圣经描述到爱会有啲乜嘢表现。例如，经文话爱系“有耐心、和蔼仁慈嘅”，又讲到爱“只会因真理而高兴”，同埋爱“能够凡事包容，凡事相信，凡事希望，凡事忍耐”。爱亦都牵涉到对人有深厚嘅感情、真挚嘅关怀，而且希望同对方培养亲密嘅关系。另一方面，缺乏爱心嘅人会表现出妒忌、骄傲、自私、罔顾规矩、心怀怨恨、斤斤计较嘅态度。同呢啲只顾自己嘅态度相反，我哋要培养嘅爱系“唔求自己嘅利益”嘅。（哥林多前书13:4-8）

效法耶和华同耶稣表现爱心

“上帝就系爱。”冇错，爱系耶和华嘅本质。（约翰一书4:8）佢所做嘅一切都系佢爱心嘅明证。佢对人类所表现最伟大嘅爱就系，派耶稣嚟到地上为我哋受苦，为我哋牺牲生命。使徒约翰话：“上帝差佢独生嘅儿子到世人当中，使我哋可以通过佢得生命。凭住呢一点，上帝嘅爱就喺我哋身上显明出嚟。我哋仲未爱上帝，上帝已经爱我哋，差派佢嘅儿子嚟，作为求恩嘅祭牲为我哋除罪。噉样就系爱嘞。”（约翰一书4:9,10）因为上帝嘅爱，我哋可以得到宽恕、希望同生命。

耶稣乐意遵行上帝嘅旨意，证明佢好爱人类。保罗写道：“［耶稣］话：‘我嚟系要遵行你嘅旨意。’……我哋凭住呢个‘旨意’，靠住耶稣基督只系一次献上佢嘅身体，就成圣嘞。”（希伯来书10:9,10）冇任何人可以表现更伟大嘅爱。耶稣话：“人为朋友舍弃生命，人嘅爱心冇比呢个更大㗎嘞。”（约翰福音15:13）我哋不完美嘅人，可唔可以效法耶和华同耶稣表现爱心呢？可以！等我哋嚟思考吓，我哋点样先可以做得到。

“总要凭爱心行事”

保罗劝勉我哋：“我哋既然系蒙爱嘅儿女，就要效法上帝，总要凭爱心行事，正如基督爱我哋，为我哋舍弃咗自己”。（以弗所书5:1,2）我哋“总要凭爱心行事”，就系要喺生活嘅每一方面都表现出呢种特质。我哋除咗用言语，亦都通过行动嚟表现呢种爱。约翰写道：“孩子们，我哋嘅爱，唔好空口讲白话，要有真诚嘅行动。”（约翰一书3:18）例如，我哋爱上帝同其他人，就好想向人传讲“王国嘅好消息”。（马太福音24:14；路加福音10:27）同样，凭爱心行事，我哋就会乐于宽恕人，表现耐心、温和嘅态度。所以，圣经劝勉我哋：“耶和华点样甘心宽恕咗你哋，你哋亦都要点样甘心宽恕人。”（歌罗西书3:13）

表现真挚嘅爱唔等于感情用事。例如，感情用事嘅父母为咗令小朋友唔再扭计，就会即刻应承佢哋所有要求。不过有爱心嘅父母喺必要时会表现出坚定嘅态度。同样，虽然上帝系爱，但系“耶和华所爱嘅，佢都管教”。（希伯来书12:6）如果我哋凭爱心行事，亦都会喺需要嘅时候施行适当嘅管教。（箴言3:11,12）当然要记得，因为我哋唔完美，施行管教嗰阵有时会缺乏爱心。所以，我哋每个人喺表现爱心方面都有改善嘅余地。我哋可以点样做？我哋嚟睇吓三个方法。

点样培养爱心？

第一，求耶和华赐圣灵帮助我哋培养爱心。耶稣讲到耶和华会“将圣灵赐俾恳求佢嘅人”。（路加福音11:13）如果我哋祈求圣灵，尽力“顺应圣灵行事”，噉我哋喺所做嘅事上就会越来越有爱心。（加拉太书5:16）例如，如果你系会众嘅长老，你可以祈求耶和华赐圣灵，帮助你仁慈噉运用圣经嘅原则向其他人提出劝告。如果你为人父母，你可以祈求圣灵帮助你控制怒火，满怀爱心噉管教儿女。

第二，认真谂吓，当有人想激嬲耶稣嘅时候，耶稣点样表现爱心。（彼得前书2:21,23）受到冒犯或者唔公平嘅对待嗰时，我哋更加需要记得基督嘅榜样。喺噉嘅情况下，我哋最好问吓自己：“耶稣会点做呢？”一个叫莉伊嘅姊妹发觉，噉样做可以帮助佢学识三思而后行。佢话：“有一次，一个同事发咗封电子邮件俾其他同事，批评我，话我嘅工作做得唔好。呢件事，伤得我好深。但系，我问自己：‘我可以点样效法耶稣处理同呢个同事嘅关系呢？’我想象吓耶稣喺呢种情况下会点样做，之后我就决定唔追究，当咩事都冇发生过。后来，我知道咗呢个同事原来有严重嘅健康问题，而且面对紧好大嘅压力。我先至意识到佢写嘅嘢好可能唔系佢本意。即使有人想激嬲耶稣，耶稣仲系继续表现爱心。沉思佢嘅榜样，帮助我向同事表现出同样嘅爱。”冇错，如果我哋效法耶稣，就会时刻怀住爱心行事。

第三，培养无私嘅爱，呢种爱系真基督徒嘅标志。（约翰福音13:34,35）喺呢方面，经文鼓励我哋培养耶稣怀有嘅“精神”。基督耶稣从天上嚟到地上，为我哋“彻底舍弃自己”，甚至“服从至死”。（腓立比书2:5-8）如果我哋效法呢种无私嘅爱，思想同感觉就会越来越似基督，亦都受到推动将其他人嘅需要放喺自己嘅需要之上。培养爱心仲可以带嚟边啲益处呢？

表现爱心所带嚟嘅益处

我哋表现爱心，可以带嚟长远嘅益处。睇吓呢两个例子：

• 一个国际弟兄团体：因为我哋彼此相爱，无论我哋去到世界各地边个会众，都会受到弟兄姊妹热情嘅欢迎。得到“世上嘅整个弟兄团体”嘅爱，系几咁大嘅福分啊！（彼得前书5:9）除咗喺上帝嘅大家庭，你仲可以喺边度揾到呢种爱呢？

• 和平：“用爱心彼此包容”使我哋可以享有“用和平维系［嘅］团结”。（以弗所书4:2,3）我哋喺会众聚会、分区大会，同埋区域大会亲身体验到呢种和平。相信你一定会好同意，喺呢个四分五裂嘅世界，呢种和平嘅精神的确与众不同！（诗篇119:165；以赛亚书54:13）我哋努力追求和睦，表明我哋对其他人有深厚嘅爱，亦都会令天父嘅心欢喜。（诗篇133:1-3；马太福音5:9）

“爱心先至能够强化人”

保罗写道：“爱心先至能够强化人。”（哥林多前书8:1）爱心点样强化人呢？哥林多前书系保罗写俾哥林多弟兄姊妹嘅第一封信。呢卷书嘅第13章被称为“爱的诗篇”，因为使徒保罗喺入面解释到爱可以点样强化人。例如，有爱心嘅人会为其他人嘅益处着想。（哥林多前书10:24；13:5）另外，有爱心嘅人会关心体谅人，和蔼仁慈同耐心噉对待人。爱可以建立起温馨嘅家庭，团结嘅会众。（歌罗西书3:14）

我哋有好多方式向其他人表现爱，但系对上帝嘅爱先至最有价值同最能够造益人。呢种爱可以使唔同背景、唔同种族、唔同语言嘅人团结起嚟，喜乐噉“并肩”事奉耶和华。（西番雅书3:9）愿我哋决心，每一日都将圣灵果实嘅呢种宝贵特质表现出嚟。