“愿佢……实现你嘅所有计划”
“你仲要因耶和华而满心喜乐，佢就将你心里面所求嘅赐俾你。”——诗篇37:4
1．年轻人而家就需要为未来做乜嘢？点解佢哋唔需要过度忧虑？（请睇吓课文开头嘅图片）
年轻人，你一定会同意，开始一个旅程之前，先做好计划系最明智嘅。人生就好似一个旅程噉，到底要去边个方向，趁后生嘅时候就应该计划好。当然，做计划未必系容易嘅。一个叫凯蒂嘅女仔话：“而家就要决定自己嘅一生，压力真系好大呀。”唔使惊！耶和华同佢嘅子民讲：“你唔使怕，因为我与你同在。你唔需要四顾张望，因为我系你嘅上帝，我要使你坚强。我一定会帮助你”。（以赛亚书41:10）
2．我哋点知道耶和华想我哋有开心快乐嘅未来？
2 耶和华鼓励你明智噉为你嘅未来做计划。（传道书12:1；马太福音6:20）大自然有迷人嘅风景、悦耳嘅声音、美味嘅食物。耶和华想通过呢一切话俾你知，佢真系好想你开心快乐。再谂吓，耶和华点样关心我哋，点样教导我哋过最好嘅生活。耶和华对嗰啲拒绝接受佢指引嘅人话：“我憎恨嘅事，你哋偏偏去做。……睇吓！我嘅仆人必因内心快乐而欢呼”。（以赛亚书65:12-14）耶和华嘅子民喺生活上做明智嘅选择，就可以荣耀耶和华。（箴言27:11）
开心快乐嘅人生计划
3．耶和华俾咗乜嘢建议你呢？
3 喺计划人生方面，耶和华俾咗乜嘢建议你呢？因为耶和华创造咗人类，佢知道人认识同忠心事奉佢，就可以得到快乐。（诗篇128:1；马太福音5:3）动物就完全唔同，佢哋有嘢食、有水饮、繁衍后代就满足。上帝知道人类唔会净系满足于呢啲需要，佢希望你追求其他目标而得享幸福快乐。你嘅创造主系“仁爱和平嘅上帝”、“快乐嘅上帝”，佢“照自己嘅形像”创造人。（哥林多后书13:11；提摩太前书1:11；创世记1:27）效法仁爱嘅上帝，你就会好喜乐。圣经话俾我哋知一个人生嘅基本真理，就系“施与比接受更快乐”。你系咪都亲身体验过呢个真理？（使徒行传20:35）所以，耶和华期待你为未来做好计划，善用一生向上帝同其他人表现爱心。（请读马太福音22:36-39）
4,5．点解耶稣咁喜乐呢？
4 耶稣基督为年轻人树立完美嘅榜样。佢细个嗰阵时，一定过得好开心。圣经话“有嬉笑嘅时候……有欢跃嘅时候”。（传道书3:4）耶稣通过学习圣经亲近耶和华。佢12岁嘅时候，圣殿里面嘅老师都对耶稣喺属灵方面嘅“悟性同对答诧异不已。”（路加福音2:42,46,47）
5 耶稣长大成人之后，仍然保持喜乐。点解佢咁喜乐呢？佢知道，耶和华想佢“向穷人宣扬好消息……盲眼嘅能复明”。（路加福音4:18）耶稣做耶和华所委派嘅事使自己充满喜乐。诗篇40:8讲出咗耶稣嘅心声：“我嘅上帝啊，我乐于遵行你嘅旨意”。耶稣好钟意教导人认识佢嘅天父。（请读路加福音10:21）有一次，耶稣向一个妇人传道之后，同佢嘅门徒讲：“我嘅食物就系遵行差派我嚟嗰一位嘅旨意，完成佢嘅工作。”（约翰福音4:31-34）向上帝同向人表现爱心，令耶稣深感喜乐。如果效法耶稣，你都会好喜乐㗎！
6．同有经验嘅基督徒倾吓你嘅人生计划，点解对你大有帮助？
6 好多基督徒喺年轻嘅时候就做先驱，亲身体验到真正嘅喜乐。你有冇试过同佢哋倾吓你嘅人生计划呢？“唔先商议，计划失败；集思广益，事必有成。”（箴言15:22）呢啲热心服务嘅弟兄姊妹好可能会话俾你知，参与全时服务可以得到好好嘅训练，使你一生受益。耶稣喺天上一直受到父亲教导，佢嚟到地上之后，通过传道工作学到更多，体会到更多。无论系用好消息打动人心，定系喺考验下保持忠义，佢都从中得到好大嘅喜乐。（请读以赛亚书50:4；希伯来书5:8；12:2）等我哋一齐睇吓，先驱工作点样为你打开服务嘅大门，带嚟更大嘅喜乐。
帮助人成为基督徒系最好嘅工作
7．点解好多年轻嘅弟兄姊妹好钟意帮助人成为基督徒？
7 耶稣话：“你哋要去，使所有国族嘅人做我嘅门徒……教导佢哋”。（马太福音28:19,20）帮助人成为基督徒，系最令人心满意足，又可以荣耀上帝嘅工作。同其他工作一样，提高你嘅技能系需要时间嘅。迪莫西弟兄十几岁就开始做先驱，佢话：“我好钟意全时事奉耶和华，因为呢个系我对耶和华表达爱嘅方式。一开始，我一个圣经学生都冇，但后来搬咗去另一个地区，一个月之内就揾到几个圣经学生，有个学生仲开始参加聚会添。参加咗为期两个月嘅独身弟兄圣经研习班之后，a我收到新委派，喺新嘅地区又揾到四个圣经学生。我好钟意教人圣经，因为我可以睇到圣灵发挥作用，改变佢哋。”（帖撒罗尼迦前书2:19）
8．有啲年轻嘅弟兄姊妹，点样帮助更多人成为基督徒？
8 有啲年轻基督徒学习另一种语言。例如，嚟自北美洲嘅雅各写道：“我七岁嗰时，好多同班同学都系越南人。我好想帮佢哋认识耶和华，所以冇几耐，我就开始学习佢哋嘅语言。我通常都会对照英语同越南语嘅《守望台》嚟学习。我又喺附近一个越南语会众度识到啲新朋友。我喺18岁嗰年开始做先驱。之后，我参加咗独身弟兄圣经研习班。呢个课程对我目前嘅先驱委派好有帮助。喺而家嘅地区，我系越南语小组唯一嘅长老。好多越南人听到我讲佢哋嘅语言就觉得好惊讶，佢哋请我入屋，所以好多时我都有机会同佢哋讨论圣经。有啲人继续进步，后来仲受咗浸添。”（参考使徒行传2:7,8）
9．帮助人成为基督徒点样使你得益不浅？
9 帮助人成为基督徒可以使你得益不浅，例如帮你养成良好嘅工作习惯，改善沟通技巧，培养自信心，同埋识得点样待人接物。（箴言21:5；提摩太后书2:24）另一个益处就系，你会得到特别嘅喜乐。因为你帮助人成为基督徒嘅同时，亦都帮助自己更加深入了解圣经，加强信心。你仲可以学到点样亲近耶和华，同佢一齐并肩工作。（哥林多前书3:9）
10．喺反应冷淡嘅地区，你可以点样得到喜乐？
10 就算喺你嘅地区，大多数人对圣经嘅好消息反应冷淡，你都可以因为传道工作而得到喜乐。帮助人成为基督徒，需要会众所有人互相合作。虽然，最终会受浸嘅人唔多，而揾到佢哋嘅，只系个别弟兄姊妹，不过会众每一个人都可以从中得到喜乐。例如，布兰登喺一个反应冷淡嘅地区，做咗九年先驱。佢话：“我钟意传讲好消息，因为呢个系耶和华叫我哋做嘅。我毕业之后冇几耐，就开始做先驱。我好钟意鼓励会众入面年轻嘅弟兄，亦都好开心睇到佢哋喺属灵上进步。后来，我参加咗独身弟兄圣经研习班，收到一个新嘅先驱委派。虽然咁耐以来，我喺地区冇帮到任何一个人进步到受浸，但系其他弟兄姊妹有。我好高兴自己喺年轻嗰时就做好计划，全心投入传道工作。”（传道书11:6）
计划可以点样引领你
11．有好多年轻人钟意参与边种形式嘅神圣服务？
11 为耶和华服务嘅方式有好多。例如，兴建王国聚会所嘅需求好大，所以好多年轻人都参与志愿建筑工程。兴建王国聚会所系神圣嘅服务，可以荣耀上帝，你自己亦可以从呢个服务得到好大嘅喜乐。就好似其他嘅神圣服务一样，有机会同弟兄姊妹一齐工作系一件非常开心嘅事。参与建筑工作会令人大大得益，可以加强你嘅安全意识，使你更加勤奋，同埋学识点样同监督通力合作。
好多福分等住嗰啲参与全时服务嘅人（请睇第11-13段）
12．先驱工作可以带嚟乜嘢服务机会？
12 一个叫做凯文嘅弟兄话：“我细细个就立定决心，将来要全时为耶和华服务。我19岁嘅时候终于可以做先驱嘞。我用部分时间同一个做建筑嘅弟兄打工嚟维持自己嘅生活。我学识点样安装屋顶同门窗。后来，有两年嘅时间我参加咗飓风救援小组，帮手重建王国聚会所同弟兄姊妹嘅房屋。当我听到南非有建筑需求嗰时，就提交申请，之后受到邀请。喺非洲，每几个星期，我就做完一个王国聚会所工程，跟住又搬去第二度开始另一个。我同建筑队嘅弟兄姊妹一齐生活，一齐讨论圣经，一齐工作，我哋就好似一家人噉。我都好钟意每个星期同当地嘅弟兄姊妹一齐传道。我细个嗰时做嘅决定，使我有意想不到嘅喜乐。”
13．伯特利服务点样使年轻人得到喜乐？
13 有啲人实现咗佢哋全时为耶和华服务嘅目标，而家喺伯特利工作。伯特利服务系一种快乐嘅生活方式，因为你喺嗰度所做嘅每一件事，都系为耶和华而做嘅。伯特利家庭协助供应属灵嘅食物。一个叫做达斯廷嘅伯特利成员话：“我九岁嗰时就将全时服务视为我嘅人生目标，一毕业就开始做先驱。一年半之后，我受到邀请去伯特利，喺嗰度我学识点样操作印刷机，后来又做编写电脑程式嘅工作。喺伯特利，我好开心可以听到关于全球传道工作进展嘅第一手资料。我好钟意呢种服务，因为我哋喺呢度所做嘅，可以帮助人亲近耶和华。”
点样计划你嘅未来？
14．你可以点样为全时服务做准备呢？
14 你可以点样为全时服务做准备呢？最重要嘅系培养属灵嘅特质，呢啲特质可以帮助你更好噉为耶和华服务。所以你而家就要更加努力阅读上帝嘅话语，深入沉思经文嘅含义，喺聚会嗰时揾机会表达你嘅信心。在学期间，你可以参与传道，积累更多经验同埋提高传道技巧。你婉转得体噉向人提出问题，留心听佢哋嘅谂法，就可以慢慢学识关心人。你都可以主动为会众做多啲服务，例如帮手清洁同维修聚会所。耶和华好钟意嗰啲态度谦卑又甘心献出自己嘅人。（请读诗篇110:3；使徒行传6:1-3）使徒保罗邀请提摩太参与特派传道工作，因为“路司得同以哥念嘅弟兄都赞赏佢。”（使徒行传16:1-5）
15．有啲乜嘢方法，可以帮助你做好计划嚟维持生活？
15 先驱一般都要赚钱维持生活。（使徒行传18:2,3）或者你可以计划吓，报读一啲可以帮你喺当地揾到兼职嘅职业培训课程。你做计划嘅时候，可以请教分区监督同本地嘅先驱。问吓佢哋有乜嘢工作既可以维持生活，又可以兼顾先驱工作。圣经都鼓励你，“要将你嘅事交托俾耶和华，你嘅计划就能够成功。”（箴言16:3；20:18）
16．年轻嘅时候就全心事奉耶和华，点样装备你喺未来负起其他责任？
16 你可以肯定，耶和华希望你“紧握”幸福快乐嘅未来。（请读提摩太前书6:18,19）先驱工作使你有更多机会接触其他先驱同工，帮助你成为成熟嘅基督徒。好多人都觉得，年轻嘅时候就全心事奉耶和华，可以使佢哋日后嘅婚姻更加美满。嗰啲喺结婚之前参与先驱工作嘅弟兄姊妹，通常结咗婚之后都会继续一齐做先驱。（罗马书16:3,4）
17,18．点解计划未来嘅人生牵涉到你嘅内心？
17 计划未来嘅人生牵涉到你嘅内心。诗篇20:4话：“愿［耶和华］成全你嘅心愿，实现你嘅所有计划。”所以，要认真谂吓你想点样运用自己嘅一生。要沉思耶和华喺现今点样实现佢嘅旨意，然后，睇吓你自己可以点样参与其中。跟住，计划好你嘅人生，去做令耶和华喜悦嘅事啦。
18 全心事奉耶和华会令你深感满足，因为呢个系荣耀上帝嘅生活方式。冇错，“要因耶和华而满心喜乐，佢就将你心里面所求嘅赐俾你。”（诗篇37:4）
a 已被王国传福音者训练班取代。