喺葡萄牙撒播王国种子

喺波涛汹涌嘅大西洋，一艘船正驶向欧洲。船上嘅一位乘客叫做乔治·扬格，佢回想自己喺巴西嘅传道成果，觉得好满足。a 但系，扬格弟兄而家要谂嘅系佢嘅新委派——喺从来冇听过王国好消息嘅西班牙同葡萄牙开展传道工作。因为卢述福弟兄迟啲会去当地发表演讲，所以扬格弟兄谂住一到步，就着手为之后嘅安排做准备，仲打算分发30万张传单！

1925年春天，扬格弟兄到达里斯本。当时，嗰度局势非常混乱。1910年，葡萄牙发生革命，建立共和国。由于君主制被废除，天主教嘅势力大受打击。平民百姓虽然得到更多自由，但系动乱仍然持续不断。

就喺扬格弟兄为卢述福弟兄嘅演讲做筹备工作嘅时候，葡萄牙政府因为一场政变而实行军事管制。英国及海外圣经公会嘅秘书提醒扬格弟兄，佢一定会遇到好多反对。即使系噉，扬格弟兄仍然申请使用贾梅士中学嘅体育馆，结果获得批准。

卢述福弟兄嘅演讲喺5月3日发表。大家都非常期待嘅呢一日终于嚟到！大厦嘅标语牌同报纸嘅广告上面都宣布咗公众演讲嘅题目——“点样先可以永远生活喺地上”。宗教反对者即刻喺佢哋嘅报章刊登一篇文章，提醒读者小心新嚟嘅“假先知”。佢哋又喺体育馆门口分发成千上万嘅册子，抨击卢述福弟兄嘅教导。

虽然系噉，仲系有好多人想听演讲。大约2000人逼满咗个体育馆，另外，差唔多数目嘅人因为座位唔够而入唔到场。有啲好奇嘅听众就爬上体育馆入面嘅绳梯，而有啲就坐喺体育馆嘅运动设备上面。

不过，演讲期间都有啲阻滞。反对者大吵大闹，又整烂啲凳。但系，卢述福弟兄镇定自若，为咗等大家听到佢嘅声音，就企上张台。卢述福弟兄嘅演讲一直持续到差唔多凌晨十二点。演讲结束之后，有超过1200个感兴趣嘅人留低自己嘅姓名同地址，想得到更多圣经书刊。第二日，当地一家知名嘅报社刊登咗卢述福弟兄嘅演讲内容。

1925年9月，葡萄牙语嘅《守望台》开始喺葡萄牙出版。（更早之前，葡萄牙语嘅《守望台》已经喺巴西出版）大概喺呢个时候，一位曾经同扬格弟兄喺巴西分部共事过，叫做维尔吉利奥·弗格森嘅圣经研究者，打算搬去葡萄牙帮手扩展王国工作。冇几耐之后，佢就同太太莉齐嚟到葡萄牙，再次同扬格弟兄一齐工作。弗格森弟兄嚟得好合时，因为扬格弟兄好快就有另一个新委派，甚至要去到苏联。

后来，葡萄牙又发生咗一场军事政变，当地建立咗一个独裁政权。同时，圣经研究者受到嘅反对越来越犀利。弗格森弟兄坚持自己嘅立场，尽力保护当时人数唔多嘅圣经研究者，同时积极支持传道工作。佢向政府申请，用自己嘅屋企举行定期聚会。1927年10月，佢嘅申请获得批准。

喺独裁统治嘅头一年，葡萄牙大约有450人订阅《守望台》杂志。另外，通过传单同册子，圣经嘅真理传播到安哥拉、亚速尔群岛（亚述群岛）、佛得角（维德角）、东帝汶、果阿、马德拉同莫桑比克，遍及葡萄牙帝国全境。

1920年，一个叫曼努埃尔·德席尔瓦·若尔当嘅人嚟到里斯本，佢系一个谦卑嘅葡萄牙园丁。佢喺巴西嘅时候曾经听过扬格弟兄发表嘅演讲，马上知道自己听到嘅就系真理。为咗帮助弗格森弟兄扩展传道工作，曼努埃尔开始做派书者（现称先驱）。由于印刷同分发圣经书刊嘅工作组织得好好，喺里斯本成立嘅新会众都发展得欣欣向荣。

1934年，弗格森夫妇要返去巴西，不过真理嘅种子已经喺葡萄牙生根发芽。当时欧洲局势发生激烈嘅变化，先后爆发咗西班牙内战同第二次世界大战，但葡萄牙忠贞嘅弟兄姊妹依然保持坚强嘅灵性。有一段时间，佢哋喺艰难嘅环境之下，仍然努力使属灵嘅火种不致熄灭。1947年，基列毕业嘅约翰·库克到达葡萄牙，佢系当地第一个海外传道员。喺佢帮助下，葡萄牙嘅弟兄姊妹重新燃起属灵之火。之后，王国传道员嘅增长势不可挡。耶和华见证人嘅工作虽然喺1962年被当地政府禁止，不过仲系不断发展。1974年12月，耶和华见证人得到法律认可嘅时候，全国已经有超过1万3000个传道员。

今日，喺葡萄牙同几个讲葡萄牙语嘅群岛，包括亚速尔同马德拉，有超过5万个传道员传讲上帝王国嘅好消息。当中有啲传道员，系当年听过卢述福弟兄历史性演讲嘅嗰批人嘅第三代后人。

呢啲早期喺葡萄牙服务嘅弟兄姊妹勇敢无惧，“做基督耶稣嘅公仆，奉派去外邦人当中”，带头开展传道工作。我哋对呢啲忠心嘅弟兄姊妹同耶和华充满感激之情。（罗马书15:15,16）——嚟自葡萄牙分部档案室