馬太福音
5 耶穌見到一大班人，就上咗山。佢坐低之後，啲門徒嚟到佢身邊， 2 然後，耶穌就開始教導大家，佢話：
3 「意識到自己需要上帝指引嘅人*係有福*嘅，因為天上嘅王國係佢哋㗎。
4 「悲傷難過嘅人係有福嘅，因為佢哋會得到安慰。
6 「好想正義得到伸張嘅人係有福嘅，因為呢個願望會實現。
7 「表現憐憫嘅人係有福嘅，因為佢哋會得到憐憫。
10 「做上帝視為啱嘅事而受到迫害嘅人係有福嘅，因為天上嘅王國係佢哋㗎。
11 「你哋為咗我俾人侮辱，俾人迫害，俾人用各種邪惡嘅話中傷，噉就有福嘞。 12 以前啲人都係噉樣迫害啲先知。所以要歡欣快樂，因為你哋喺天上會得到豐富嘅獎賞。
13 「你哋係世界嘅鹽。如果鹽冇咗鹹味，仲可以變返鹹咩？啲鹽冇用嘅話，就唯有揼出去，任人踐踏嘞。
14 「你哋係世界嘅光。一座起喺山上面嘅城，係隱藏唔到㗎。 15 啲人點完燈，會將佢放喺燈台上面，而唔會用個籃*冚住，噉成間屋嘅人都會照到。 16 你哋發出嘅光要俾人睇到，噉人哋見到你哋嘅好行為，就會榮耀你哋嘅天父。
17 「唔好以為我嚟係要廢除法典*同埋先知所寫嘅話。我嚟唔係要廢除，而係要實現。 18 我可以好肯定噉話俾你哋知，就算天地都消逝，法典上面嘅一點一畫*都絕對唔會消逝，反而會完全實現。 19 所以，邊個違反咗誡命當中最細嗰條，又教人噉樣做，就唔可以進入天上嘅王國*。而邊個遵守呢啲誡命，又教人噉樣做嘅，就可以進入天上嘅王國*。 20 我同你哋講，如果你哋嘅正義只不過好似抄經士同埋法利賽派嘅噉，就絕對冇可能進入天上嘅王國。
21 「你哋知道古人都聽過呢句說話，就係：『唔可以殺人。邊個殺咗人，就要被帶到法庭受審。』 22 但係我話俾你哋知：邊個一路對弟兄懷恨在心，就要被帶到法庭受審；邊個用難聽嘅說話侮辱弟兄，就要被帶到最高法庭受審；邊個鬧人係『冇用嘅白痴』，就會被揼入烈火熊熊嘅欣嫩谷*。
23 「所以，當你將禮物帶去祭壇嘅時候，如果諗起有個弟兄對你不滿， 24 就要將禮物留喺祭壇前面，去同個弟兄講和先，返嚟先至獻禮物。
25 「如果有人要告你，你同佢去到法庭之前，就要盡快解決呢件事，唔係嘅話，佢就可能將你交俾審判官，審判官又將你交俾法庭嘅差役，噉你就要坐監嘞。 26 我話俾你知，你一日未還清最後一分錢*，就絕對唔可以離開監獄。
27 「你哋以前都聽過『唔可以通姦。』 28 不過我話俾你哋知，邊個一直眼甘甘望住一個女人，對佢有非分之想，喺心裡面就已經同人通姦嘞。 29 如果你嘅右眼令你失足跌倒，就挖出嚟揼咗佢。你冇咗隻眼，都好過成個人被揼入欣嫩谷*。 30 如果你嘅右手令你失足跌倒，就斬落嚟揼咗佢。你冇咗隻手，點都好過成個人被揼入欣嫩谷。
31 「你哋亦都聽過，『邊個同太太離婚，就要俾離婚嘅文件佢。』 32 不過我話俾你哋知：如果有人要同太太離婚，但係唔係因為太太淫亂*嘅話，就可能導致太太通姦；邊個娶咗呢個離婚嘅女人，就係通姦。
33 「你哋亦都知道，古人聽過呢句說話，『唔可以違背誓言，你向耶和華*發咗誓就要去做。』 34 不過我話俾你哋知，根本就唔好發誓。唔好向天發誓，因為嗰度係上帝嘅寶座； 35 唔好向地發誓，因為呢個係佢嘅腳凳；唔好指向耶路撒冷發誓，因為嗰個係偉大君王嘅城； 36 亦都唔好指向自己嘅頭發誓，因為你冇辦法令一條頭髮變白或者變黑。 37 你哋講說話，係就話『係』，唔係就話『唔係』，再講啲咩多餘嘅說話，就係受撒但*影響嘞。
38 「你哋都聽過呢句說話，『以眼還眼，以牙還牙。』 39 不過我話俾你哋知，如果人哋傷害你，唔好同佢對抗。有人打你右邊面，就俾埋左邊面佢打。 40 有人想告你，想攞走你件內袍，你就連外袍都俾埋佢。 41 掌權嘅人迫你服役，要你行一里*路，你就同佢行夠兩里。 42 有人求你，就俾佢啦；有人想問你借錢*，你唔好走咗去。
43 「你哋都聽過呢句話，『要愛你身邊嘅人*，憎恨你嘅敵人。』 44 不過，我話俾你哋知，要愛*你哋嘅敵人，為迫害你哋嘅人禱告*。 45 噉樣，你哋就表明自己係天父嘅仔女*；因為佢令太陽照耀好人，亦都照耀壞人，落雨俾好人，亦都俾壞人。 46 如果你哋淨係愛嗰啲愛你哋嘅人，會得到咩獎賞呢？收稅人都係噉做㗎。 47 你哋淨係同自己嘅弟兄打招呼，有咩咁好呢？外族人*都係噉樣做㗎。 48 所以，你哋要完美*，就好似你哋嘅天父係完美嘅一樣。」