馬太福音

18 嗰個時候，門徒嚟問耶穌：「喺天上嘅王國入面，到底邊個係最大㗎？」 2 耶穌就叫咗個小朋友嚟，請佢企喺門徒當中， 3 佢話：「我可以好肯定噉同你哋講，如果你哋唔徹底改變態度*，好似小朋友一樣謙卑，就絕對唔能夠進入天上嘅王國。 4 所以，邊個好似呢個小朋友噉樣係謙卑嘅，邊個喺天上嘅王國入面就係最大㗎嘞； 5 邊個為咗我嘅名而接待一個好似呢個小朋友噉樣嘅人，就即係接待我嘞。 6 呢啲卑微嘅人信從我，邊個令佢哋其中一個失足跌倒*嘅話，噉佢不如掛塊大磨石*喺自己條頸度，沉入大海好過嘞。

7 「因為有絆腳石，世人有禍嘞！世上一定會出現絆腳石，但係邊個帶絆腳石嚟令人跌倒，邊個就有禍嘞！ 8 如果你嘅一隻手或者一隻腳令你失足跌倒，就斬落嚟揼咗佢！你傷殘或者跛腳，但係得到生命，點都好過有兩隻手兩隻腳，但係被揼入永恆嘅火*。 9 如果你嘅一隻眼令你失足跌倒，就挖出嚟揼咗佢！你得返一隻眼，但係得到生命，點都好過有兩隻眼，但係被揼入欣嫩谷*嘅火。 10 我話俾你哋知，你哋千祈唔好睇小呢啲卑微嘅人當中嘅一個。因為佢哋嘅天使喺天上，經常同我嘅天父見面*。 11 －－－*

12 「你哋覺得呢？如果有個人有100隻綿羊，其中一隻走失咗，佢實會將99隻留喺山上面，去搵嗰隻走失咗嘅羊㗎，係咪？ 13 我可以好肯定噉同你哋講，如果佢搵到嗰一隻羊，就會好開心，比起有99隻冇走失嘅羊更加開心。 14 同樣，我嘅*天父都唔想呢啲卑微嘅人有一個走失*。

15 「如果你嘅弟兄犯罪，而對你做成損害*，你就要同佢單獨見面，講清楚佢錯喺邊*。如果佢聽你講，噉你就幫到你嘅弟兄做返啱嘅事嘞*。 16 如果佢唔聽，你就帶一兩個人去見佢。噉根據兩三個人嘅口作證*，所有事情都可以清清楚楚。 17 如果佢唔聽佢哋講，就話俾會眾*知。如果佢連會眾都唔聽，就將佢當做外族人同埋收稅人啦。

18 「我可以好肯定噉同你哋講：凡係你哋喺地上會綁住*嘅，上帝喺天上都已經綁住咗；凡係你哋喺地上會解開*嘅，上帝喺天上都已經解開咗*。 19 我又好肯定噉樣同你哋講：如果你哋有兩個人喺地上同心合意噉求一啲重要嘅事，無論係咩事，我嘅天父都會成全你哋。 20 因為喺邊度有兩三個人奉我嘅名聚集埋一齊，邊度就有我喺佢哋當中。」

21 嗰個時候，彼得嚟問耶穌：「主啊，我嘅弟兄得罪咗我，我要寬恕佢幾多次呢？7次夠唔夠呀？」 22 耶穌同佢講：「我話俾你聽，唔係7次，係77次。

23 「所以，天上嘅王國就好似一個王想佢啲奴隸償還債務。 24 當佢開始收取欠債，佢嘅僕人將一個爭咗佢6000萬銀元*嘅人帶入嚟。 25 但係呢個人冇能力還債，於是王下令將佢、佢嘅老婆仔女，仲有佢擁有嘅嘢全部賣晒，用嚟還債。 26 呢個奴隸就跪低向佢下拜，話：『求你俾啲時間我吖，我一定會還返晒俾你㗎。』 27 王可憐佢，就放咗佢，仲將佢嘅債一筆勾銷。 28 呢個奴隸出去之後，遇到*另一個奴隸。嗰個人爭佢100銀元*。佢竟然捉住嗰個人，捻住佢條頸話：『將你爭我嘅通通還返俾我！』 29 嗰個奴隸就跪低求佢，話：『俾啲時間我吖，我一定會還返俾你㗎。』 30 但係佢唔肯，仲搵人韞個奴隸入監，直到佢還清爭落嘅債務為止。 31 其他奴隸見到呢件事，都好唔開心，佢哋就將所有嘢話晒俾王知。 32 王就叫嗰個奴隸嚟，同佢講：『邪惡嘅奴隸，你求我，我就完全唔使你還債。 33 你唔係應該憐憫同你一樣做奴隸嘅人，好似我憐憫你噉樣咩？』 34 王非常之嬲，就交佢俾獄吏韞起佢，直到佢還清所有債務為止。 35 如果你哋唔發自內心原諒弟兄，我嘅天父都會噉樣對待你哋。」