路加福音
20 有一日,耶穌喺聖殿裡面教導民眾,宣揚好消息,祭司長、抄經士同長老一齊嚟, 2 同佢講:「話俾我哋知,你憑乜嘢權力做呢啲事呀?邊個叫你噉做㗎?」 3 耶穌答佢哋:「我都問你哋一個問題,話俾我知: 4 邊個派約翰嚟施浸呢?係天上嘅上帝,定係人呢?」 5 佢哋就商量話:「如果我哋答係『天上嘅上帝』,佢就會話:『既然係噉,你哋點解唔相信約翰呢?』 6 但係如果我哋答『係人』,民眾就會攞石頭打死我哋,因為佢哋深信約翰係先知。」 7 佢哋唯有話唔知邊個派約翰嚟。 8 耶穌就同佢哋講:「噉我都唔話你哋聽我憑乜嘢權力做呢啲事。」
9 耶穌又同民眾講咗個比喻:「有人開墾咗一個葡萄園,然後租俾一啲農戶,就出咗國,仲去咗好耐。 10 到咗收割葡萄嘅季節,佢派一個奴隸去農戶嗰度,收取葡萄園嘅一部分果實。不過,農戶竟然毆打個奴隸,令佢空手而回。 11 葡萄園嘅主人又派另一個奴隸去。農戶亦都打呢個奴隸,羞辱佢,令奴隸空手而回。 12 主人又派第三個奴隸去。佢哋又打傷呢個奴隸,將佢趕走。 13 主人話:『我應該點做呢?等我派我深愛嘅仔去,佢哋會尊重佢嘅。』 14 農戶一見到佢個仔,就商量話:『呢個係繼承人。我哋殺咗佢,噉佢本來會繼承嘅產業就屬於我哋㗎喇。』 15 於是農戶將佢拖出葡萄園殺死。噉葡萄園嘅主人會點樣處置佢哋呢? 16 佢會嚟殺咗呢啲農戶,將葡萄園交俾其他人。」
大家聽到就話:「噉嘅事千祈唔好發生呀!」 17 耶穌望住佢哋話:「聖經講過,『建造嘅人棄絕嘅石頭,成為咗首要嘅房角石*』,呢句說話係咩意思呢? 18 邊個因為呢塊石頭而失足跌倒,就會遍體鱗傷,而邊個俾呢塊石頭擊中,就會粉身碎骨。」
19 抄經士同祭司長睇出呢個比喻係針對佢哋講嘅,就想即刻落手捉耶穌,不過佢哋好驚啲民眾。 20 於是,佢哋為咗將耶穌送官,交俾總督處置*,就密切留意住佢,仲暗中收買一啲人,派呢啲人喺耶穌嘅說話搵把柄。呢啲人都扮到好誠懇*。 21 佢哋問耶穌:「老師,我哋知道你講嘅教嘅都係啱㗎,又唔偏心,你教導人嘅都係關於上帝嘅真理。 22 噉你話,納稅俾凱撒合唔合法呢?」 23 耶穌睇出佢哋嘅奸計,就同佢哋講: 24 「拎一個第納流斯*錢幣嚟睇吓。呢個係邊個嘅頭像,邊個嘅名號呀?」佢哋話:「係凱撒嘅。」 25 耶穌同佢哋講:「所以,屬於凱撒嘅要俾返凱撒,屬於上帝嘅要俾返上帝。」 26 佢哋喺民眾面前,唔能夠喺佢講嘅說話度搵到把柄,反而因為佢嘅回答而覺得驚訝,就無話可說。
27 撒都該派一向都話冇復活,佢哋有幾個人嚟問耶穌: 28 「老師,摩西話:『如果一個人未有仔女就死咗,死者嘅兄弟就應該娶咗佢嘅遺孀,幫死咗嘅兄弟傳宗接代。』 29 呢度曾經有七兄弟,第一個結咗婚,未有仔女就已經死咗嘞。 30 第二個、 31 第三個都娶咗個遺孀。七個都係噉,未有仔女就死咗嘞。 32 最後連嗰個女人都死埋。 33 復活嘅時候,佢係邊一個人嘅太太呢?七個都娶過佢喎。」
34 耶穌同佢哋講:「呢個制度*嘅人又娶又嫁, 35 但係嗰啲配進入未來嘅制度、死而復生嘅人,就唔會娶亦都唔會嫁。 36 佢哋唔能夠再死,而且佢哋會好似天使一樣。佢哋會成為上帝嘅兒女,因為佢哋會被復活。 37 其實死人復活嘅事,摩西喺荊棘叢嘅記載已經講過。摩西將耶和華*稱為『亞伯拉罕嘅上帝,以撒嘅上帝,雅各嘅上帝』。 38 佢唔係死人嘅上帝,而係活人嘅上帝,因為喺佢眼中,佢哋都係活著嘅。」 39 有幾個抄經士回應話:「老師,你講得啱。」 40 佢哋就唔敢再問佢問題嘞。
41 耶穌問返嗰啲人:「啲人點解話基督係大衛嘅子孫呢? 42 大衛曾經喺詩篇講過:『耶和華*同我主講:「你坐喺我嘅右邊, 43 直到我令你嘅敵人成為你嘅腳凳。」』 44 既然大衛稱呼基督做『主』,噉基督又點會係大衛嘅子孫呢?」
45 民眾仲聽緊嘅時候,耶穌同門徒講: 46 「要小心,唔好好似啲抄經士噉,佢哋鍾意著住件長袍行嚟行去,亦都鍾意人哋喺市集廣場度恭敬噉同佢哋打招呼,又鍾意會堂入面最好嘅座位*同埋晚宴當中貴賓嘅座位。 47 佢哋侵吞寡婦嘅屋*,又為咗引人注目而長篇大論噉禱告。呢啲人會比其他人受到更嚴厲*嘅判決。」