馬太福音

19 耶穌講完呢啲說話，就離開加利利，去到約旦河對岸，猶地亞嘅邊界附近。 2 有一大班人跟隨佢，佢就喺嗰度醫好佢哋。

3 法利賽派嘅人想試探耶穌，就去問佢：「一個男人係咪用咩理由同佢嘅老婆離婚，都合法㗎？」 4 耶穌回答：「最初上帝創造男人同女人嘅記載，你哋冇讀過咩？ 5 上帝話：『所以人*要離開父母，同佢太太長相廝守，二人合為一體。』 6 即係話夫妻唔再係兩個人，而係一體。上帝結合嘅*，人就唔可以分開。」 7 佢哋同耶穌講：「噉點解摩西規定，俾份離婚文書老婆，就可以同佢離婚呀？」 8 耶穌同佢哋講：「係因為你哋硬頸，摩西先至容許你哋同太太離婚，但係最初唔係噉㗎。 9 我同你哋講，如果唔係因為太太淫亂*，佢丈夫離婚再娶，就係通姦。」

10 門徒同耶穌講：「如果結婚之後係噉，唔結婚好過喇。」 11 耶穌同佢哋講：「啱啱講嘅唔係個個都做到*㗎，淨係有呢種恩賜嘅人先至做到。 12 有啲人因為天生身體有殘缺*而唔結婚，而有啲人係因為人哋令佢哋身體有殘缺而唔結婚，不過有啲人係為咗天上嘅王國而自願唔結婚。可以做到嘅就做啦*。」

13 嗰個時候有啲人帶小朋友去到耶穌嗰度，請佢將手放喺小朋友身上*，為小朋友禱告，不過門徒就責備嗰啲人。 14 但係耶穌話：「俾啲小朋友嚟我呢度啦，唔好阻止佢哋，因為天上嘅王國係屬於好似佢哋噉樣嘅人。」 15 耶穌就將手放喺佢哋身上。之後，就離開咗嗰度嘞。

16 有個人嚟見耶穌，問佢：「老師，我要點樣表現良善*先能夠得到永遠嘅生命呢？」 17 耶穌同佢講：「你點解問我點樣表現良善呢？只有上帝稱得上係良善。不過，如果你想得到生命，就要繼續遵守上帝嘅誡命。」 18 佢問：「邊啲誡命呢？」耶穌話：「就係唔可以殺人，唔可以通姦，唔可以偷嘢，唔可以作假見證， 19 要孝敬*父母，要愛人如己。」 20 呢個年輕人同佢講：「呢啲我一直都有遵守吖，噉我仲爭咗啲乜嘢呢？*」 21 耶穌同佢講：「如果你想做到完美嘅地步*，就要賣咗啲財物，分俾窮人，噉你就有財寶喺天上嘞。然後你仲要嚟跟隨我。」 22 佢聽到耶穌噉講，就好唔開心噉走咗，因為佢有好多財產。 23 耶穌同門徒講：「我可以好肯定噉話俾你哋知，有錢人要進入天上嘅王國係唔容易㗎。 24 我再話俾你哋知，駱駝穿過針眼，仲容易過有錢嘅人進入上帝嘅王國呀！」

25 門徒聽到，就好驚訝，話：「如果係噉，仲有人可以得救咩？」 26 耶穌就望住佢哋，話：「對人嚟講，呢個係唔可能嘅；但係對上帝嚟講，乜嘢都可能。」

27 於是彼得話：「你睇，我哋已經揼低晒所有嘢跟隨你喇。我哋會得到啲乜嘢呢？」 28 耶穌同佢哋講：「我可以好肯定噉話俾你哋知，當人子坐喺佢榮耀嘅寶座，上帝會更新一切，到時你哋都會坐喺12個寶座，審判以色列12個部族，因為你哋一直跟隨我。 29 任何人為咗做我嘅門徒而揼低房屋、兄弟、姊妹、爸爸、媽媽、仔女或者土地，都會得到一百倍，亦都會得到永遠嘅生命。

30 「不過有好多人，而家係最先嘅，將來係最後嘅；而家係最後嘅，將來係最先嘅。」