馬太福音

4 之後，神聖力量將耶穌帶到去曠野。喺嗰度，耶穌受到魔鬼引誘。 2 佢禁食咗40日40夜，就覺得肚餓嘞。 3 魔鬼嚟引誘佢，同佢講：「如果你係上帝嘅仔，就令呢啲石頭變成食物啦。」 4 耶穌話：「聖經噉樣講：『人生存唔可以淨係靠食物，仲必須靠耶和華*所講嘅每一句說話。』」

5 之後，魔鬼帶佢入咗聖城，令佢企喺聖殿嘅外牆上面*， 6 魔鬼同佢講：「如果你係上帝嘅仔，就跳落去啦，因為聖經話：『佢會命令啲天使幫你』，仲話『佢哋會用手托住你，等你嘅腳唔會撞落石頭度。』」 7 耶穌答佢：「聖經亦都話：『唔可以試探*耶和華*你嘅上帝。』」

8 魔鬼又將耶穌帶到一座非常之高嘅山，將世上所有國家同埋佢哋強大嘅國力展示俾佢睇， 9 之後，魔鬼同耶穌講：「只要你跪低拜一拜我，我就會將呢啲嘢俾晒你。」 10 耶穌同佢講：「撒但，走開！因為聖經話：『要崇拜耶和華*你嘅上帝，淨係可以敬奉佢。』」 11 跟住，魔鬼就走咗，有啲天使嚟服侍耶穌。

12 耶穌聽到約翰俾人拉咗，就返番去加利利。 13 後嚟，佢離開咗拿撒勒，去咗迦百農，住喺嗰度。迦百農係喺西布倫同埋拿弗他利地區入面，近住海邊嘅。 14 呢個應驗咗先知以賽亞所講嘅說話，佢話： 15 「喺西布倫同拿弗他利地區，外族人嘅加利利啊！你喺約旦河嘅對岸*，通往海邊嘅路上面。 16 身處黑暗嘅人，見到明亮嘅光；身處死亡陰影之下嘅人，有光照耀佢哋。」 17 由嗰陣時開始，耶穌就傳道同人講：「你哋要悔改，因為天上嘅王國就快到嘞。」

18 耶穌沿住加利利嘅海邊一路行嘅時候，見到兩兄弟，就係西門同埋安得烈。西門又叫做彼得。佢哋係漁夫，當時喺海度撒網。 19 耶穌同佢哋講：「嚟跟從我啦，我會令你哋成為另一種漁夫。不過，你哋嘅收穫唔係魚，而係人**。」 20 佢哋就即刻揼低漁網，跟從耶穌。 21 耶穌繼續向前行，又見到兩兄弟，就係雅各同埋約翰。佢哋係西庇太嘅仔。嗰時，佢哋同爸爸西庇太一齊喺船上面補緊漁網。耶穌就邀請佢哋跟隨佢。 22 呢兩兄弟就即刻離開漁船同埋爸爸，跟從耶穌嘞。

23 之後，耶穌去勻全個加利利，喺啲會堂入面教導人，傳講王國嘅好消息，幫人醫好各種各樣嘅病。 24 關於佢嘅事傳遍咗成個敘利亞。嗰度嘅人將受到各種疾病同埋痛症折磨嘅人，仲有俾邪靈操縱嘅、患咗癲癇嘅、癱瘓嘅，全部帶去佢嗰度，耶穌就醫好佢哋。 25 於是有一大班人由加利利、德卡波利斯*、耶路撒冷、猶地亞仲有約旦河嘅對岸*嚟跟隨佢。