馬可福音

14 過兩日就係逾越節同埋無酵節。嗰啲祭司長同抄經士諗方法用詭計拘捕耶穌，想殺死佢。 2 不過佢哋話：「唔好喺節期落手，費事引起民眾騷亂。」

3 耶穌喺伯大尼，去咗痲瘋病人西門屋企食飯*，當時有一個女人嚟咗。佢帶住一樽馨香油，係用雪花石樽裝住嘅純正甘松油，非常貴重。佢打爛雪花石樽嘅樽口，將油倒喺耶穌嘅頭上面。 4 有幾個人就好唔高興，佢哋議論話：「點解咁嘥啲馨香油呀？ 5 原本呢樽馨香油可以賣成300幾銀元*，啲錢可以分俾窮人㗎嘛！」佢哋都因為嗰個女人而覺得好激氣*。 6 不過，耶穌話：「唔好阻止佢。何必難為佢呢？佢向我做嘅係美好嘅事呀。 7 你哋身邊幾時都有窮人，想嘅話，隨時都可以向佢哋行善，但係我就唔會一直喺你哋身邊。 8 其實佢係盡力而為，預先將馨香油倒喺我身上，為安葬我做準備。 9 我好肯定噉話俾你知，無論好消息傳到世界邊一個地方，都會有人提到呢個女人做嘅事嚟紀念佢。」

10 十二使徒當中嘅加略人猶大去見嗰啲祭司長，想出賣耶穌，交耶穌俾佢哋。 11 佢哋聽到就好開心，應承會俾錢佢。猶大就開始搵機會出賣耶穌。

12 無酵節嘅第一日，亦即係啲人按照慣例宰殺逾越節祭牲嘅嗰日，門徒問耶穌：「你想我哋去邊度為你準備逾越節嘅晚餐呀？」 13 於是耶穌派咗兩個門徒，同佢哋講：「你哋入咗城，會遇到一個人，拎住一個水瓶，你哋要跟住佢。 14 佢入咗邊間屋，你哋就同嗰間屋嘅主人講：『老師問：「我同門徒一齊食逾越節晚餐嘅客房喺邊度呢？」』 15 佢就會帶你哋去睇樓上一個闊落嘅房間，入面家具齊全，布置整齊。你哋就喺嗰度為我哋準備啦。」 16 門徒就出去，入咗城，發現所有嘢真係同耶穌講嘅一模一樣。佢哋就準備好逾越節嘅晚餐。

17 傍晚時分，耶穌同十二使徒一齊嚟到。 18 佢哋坐低*食飯嘅時候，耶穌話：「我好肯定噉話俾你哋知，你哋當中，同我一齊食飯嘅，有一個會出賣我。」 19 佢哋就憂愁起嚟，個個都同耶穌講：「唔係我啩？」 20 耶穌同佢哋講：「係你哋十二使徒之一，呢個人同緊我一齊將手伸入同一個碗入面。 21 正如聖經所講，人子係會離開你哋㗎，但係出賣人子嘅有禍嘞！嗰個人從來冇出世仲好。」

22 佢哋仲食緊嘢嘅時候，耶穌拎起一塊餅，禱告之後搣開，遞俾佢哋，話：「你哋拎去食啦。呢個指嘅係我嘅身體。」 23 佢拎起個杯，禱告感謝上帝之後遞俾佢哋，佢哋所有人都飲咗。 24 耶穌話：「呢個指嘅係我嘅『立約之血』，係為好多人流出嚟㗎。 25 我好肯定噉話俾你哋聽，我絕對唔會再飲葡萄酒，直到我喺上帝嘅王國入面飲新酒嘅嗰一日。」 26 最後，佢哋唱歌*讚美上帝，然後離開嗰度，去橄欖山。

27 耶穌同佢哋講：「你哋所有人都會離棄我*，因為聖經話：『我會打擊牧人，綿羊就會四散。』 28 但係我復活之後，會早過你哋去到加利利，喺嗰度等你哋。」 29 不過彼得同佢講：「就算其他人個個都離棄你*，我都唔會離棄你呀。」 30 耶穌同彼得講：「我好肯定噉話俾你知，就喺今日，呢一晚，雞叫兩次之前，你會三次唔認我。」 31 彼得好堅決噉話：「就算我一定要同你一齊死，都絕對唔會唔認你。」其他門徒全部都噉樣講。

32 佢哋嚟到一個叫客西馬尼嘅地方。耶穌同門徒講：「你哋坐喺呢度，我去禱告。」 33 佢帶埋彼得、雅各、約翰一齊去。佢非常苦惱，亦都非常難過， 34 就同佢哋講：「我嘅心非常憂愁，幾乎要死。你哋要留喺呢度，不斷守望。」 35 佢行前少少，跪喺度禱告，祈求上帝如果可以嘅話，就令佢唔使經歷嗰個艱難嘅時刻。 36 佢話：「阿爸，父親啊，對你嚟講乜嘢都可能，求你為我拎走呢個杯*。不過唔好照我嘅意思去做，照你嘅意思就得嘞。」 37 佢返到嚟，見到門徒瞓著咗，就同彼得講：「西門，你點解瞓覺呢？你連守望一個鐘都做唔到？ 38 你哋要不斷守望，不斷禱告，噉先可以避免喺引誘下屈服。人嘅心好願意做啱嘅事*，不過肉體就軟弱嘞。」 39 耶穌再一次去禱告，講咗同樣嘅說話。 40 佢第二次返嚟，見到門徒又瞓著咗，門徒攰到眼都擘唔大。佢哋都唔知道點樣回答耶穌先至好。 41 佢第三次返嚟，同佢哋講：「你哋喺呢個時候，仲喺度瞓覺，仲喺度休息！夠嘞！時候到嘞！人子會俾人出賣，落喺罪人手上。 42 起身，我哋走啦。睇吓！出賣我嘅人就快到嘞。」

43 耶穌都仲未講完，突然之間十二使徒之一嘅猶大嚟到。有班人帶住劍同埋棍跟住佢嚟，佢哋係祭司長、抄經士同埋長老派嚟㗎。 44 出賣耶穌嘅嗰個人事先同佢哋講好咗一個暗號，話：「我錫吓邊個，邊個就係你哋想捉嘅人嘞。你哋拘捕佢，押佢走啦。」 45 猶大直接行到耶穌面前，叫佢一聲「老師*」，然後溫柔噉親吻佢。 46 佢哋就捉住耶穌，拘捕咗佢。 47 有個企喺旁邊嘅人掹把劍出嚟，斬向大祭司嘅奴隸，削咗佢一隻耳仔落嚟。 48 耶穌同佢哋講：「唔通我係賊，需要你哋帶埋劍同埋棍嚟捉我咩？ 49 我日日喺聖殿入面教導人，同你哋一齊，又唔見你哋嚟拘捕我。不過，呢個係要應驗聖經嘅話。」

50 門徒全部都揼低佢逃走。 51 有個後生仔，跟喺耶穌後面，當時佢身上只係著住一件上等細麻衣。嗰啲人想捉住佢， 52 佢就揼低細麻衣，冇著衫*走咗。

53 佢哋押咗耶穌去大祭司嗰度，祭司長、長老、抄經士全部都聚集埋一齊。 54 彼得離遠跟住耶穌，一路去到大祭司嘅庭院，佢同啲僕人一齊坐喺火邊取暖。 55 呢個時候，嗰啲祭司長同埋成個公議會，都喺度搵人俾假證供嚟指控耶穌，想處死佢，但係就搵唔到。 56 其實有好多人作偽證誣告佢，不過佢哋嘅證供就各有出入。 57 另外有幾個人企出嚟，作偽證指控佢話： 58 「我哋聽佢講過：『我會拆咗呢座人手所造嘅聖殿，三日之內起過一座唔係人手造嘅殿。』」 59 不過關於呢一點，佢哋嘅證供都係有出入㗎。

60 大祭司喺大家面前企起身，問耶穌：「你冇嘢要回應咩？佢哋作證指控你嘅事，你聽唔到呀？」 61 不過耶穌都係冇出聲，一句都冇回應。大祭司又問佢：「你係咪配受稱頌嗰位嘅仔基督呀？」 62 耶穌話：「我係。你哋會見到人子坐喺大能者嘅右邊，帶住天雲嚟到。」 63 大祭司就撕裂身上嘅衫，話：「我哋仲需要證人咩？ 64 你哋都聽到佢褻瀆上帝啦。大家認為應該點呢？」佢哋全部都認為佢有罪，應該將佢處死。 65 有啲人向佢吐口水，蒙住佢塊面，用拳頭打佢，同佢講：「如果你係先知，話俾我哋知邊個打你吖！」差役帶佢走嗰陣仲摑佢塊面。

66 彼得喺下面嘅庭院嗰度，大祭司嘅一個女僕嚟到， 67 見到彼得喺度取暖，佢望實彼得，話：「你都係同嗰個拿撒勒人耶穌一齊㗎噃。」 68 但係彼得否認話：「我唔識佢㗎，都唔知道你講緊乜。」佢就行咗出外面嘅門廳*。 69 喺嗰度，個女僕見到佢，又同企喺旁邊嘅人講：「呢個人係同佢哋一齊㗎。」 70 彼得再一次否認。過咗一陣，企喺旁邊嘅人又同彼得講：「你肯定係同佢哋一齊嘅，因為你係個加利利人。」 71 彼得就開始發毒誓話：「我唔識你哋講嘅嗰個人哩。」 72 就喺嗰一刻，雞就叫第二次。彼得諗起耶穌同佢講過嘅說話：「雞叫兩次之前，你會三次唔認我。」佢就忍唔住痛哭起嚟。