馬太福音

23 嗰個時候，耶穌對民眾同埋門徒講： 2 「抄經士同法利賽派自以為有同摩西一樣嘅地位。 3 佢哋話俾你哋聽嘅所有嘢，你哋係要遵守嘅，但係唔好學佢哋嘅行為，因為佢哋淨係識講唔識做。 4 佢哋要人守規條就好似將重擔放咗喺人哋嘅膊頭，但係自己連用一隻手指去掂吓都唔肯。 5 佢哋做嘅所有嘢，都係做俾人睇。例如，佢哋將當做護身符嘅經文匣整到大一大，又將衫嘅穗邊加長。 6 佢哋鍾意坐喺晚宴最好嘅地方、會堂最好嘅座位*， 7 又鍾意人哋喺市集廣場嗰度恭敬噉同佢哋打招呼，亦都鍾意人哋稱呼佢哋做『拉比*』。 8 但係，你哋唔好接受『拉比』呢個尊稱，因為你哋嘅『老師』只有一位，你哋全部都係弟兄。 9 你哋亦都唔好尊稱地上任何人做『父』，因為你哋嘅父只有一位，就係天父。 10 你哋亦都唔好接受『領袖』嘅尊稱，因為你哋嘅領袖只有一位，就係『基督』。 11 你哋當中最大嘅，一定要為人服務。 12 邊個抬高自己，就會被貶低；邊個內心謙卑，就會被抬高。

13 「抄經士同法利賽派啊，你哋呢啲虛偽嘅人有禍嘞！因為你哋將天上王國嘅門閂埋，唔俾人入，唔單止自己唔入去，連人哋想入去都唔准。 14 －－－*

15 「抄經士同法利賽派啊，你哋呢啲虛偽嘅人有禍嘞！因為你哋為咗令一個人改信猶太教*，不惜橫越海洋陸地，到佢成為信徒嘞，你哋就令佢比你哋更加有罪，更加應該被揼入欣嫩谷*。

16 「你哋有禍嘞！你哋係盲嘅，但係就為人帶路。你哋同人講：『邊個指住聖殿發誓，可以唔算數；邊個指住聖殿入面嘅黃金發誓，就一定要遵守誓言。』 17 你哋呢啲又盲又蠢嘅人！到底係黃金重要啲吖，定係令黃金成為聖物*嘅聖殿重要啲呢？ 18 你哋仲話：『邊個指住祭壇發誓，可以唔算數；邊個指住祭壇嘅祭物*發誓，就一定要遵守誓言。』 19 你哋呢啲盲嘅人！到底係祭物重要啲吖，定係令祭物成為聖物嘅祭壇重要啲呀？ 20 所以，指住祭壇發誓嘅，其實就係指住祭壇同埋祭壇上面所有嘢發誓； 21 指住聖殿發誓嘅，其實就係指住聖殿同埋住喺聖殿嘅上帝發誓； 22 指住天發誓嘅，其實就係指住上帝嘅寶座，同埋坐喺寶座上面嘅發誓。

23 「抄經士同法利賽派啊，你哋呢啲虛偽嘅人有禍嘞！因為薄荷、刁草、孜然，你哋就奉獻十分之一，但係反而漠視法典上更加重要嘅事，就係公正、憐憫、忠信。奉獻十分之一係需要嘅，但係唔代表噉就可以忽略法典上更重要嘅事。 24 你哋係盲嘅，但係去為人帶路。蚊蟲你哋就隔出嚟，但係駱駝你哋反而吞咗佢！

25 「抄經士同法利賽派啊，你哋呢啲虛偽嘅人有禍嘞！因為你哋洗乾淨杯碟嘅外面，但係入面就裝滿晒貪婪*同埋放縱。 26 盲眼嘅法利賽派啊，洗乾淨杯碟嘅裡面先啦，噉外面都會變得乾淨。

27 「抄經士同法利賽派啊，你哋呢啲虛偽嘅人有禍嘞！因為你哋好似掃咗白灰嘅墳墓，表面好睇，但係入面充滿死人嘅骨頭同埋各種不潔嘅嘢。 28 同樣，喺人眼中你哋睇起嚟係正義嘅，但係其實內心充滿虛偽同埋不法。

29 「抄經士同法利賽派啊，你哋呢啲虛偽嘅人有禍嘞！因為你哋修建先知嘅墳，粉飾正義嘅人嘅墓， 30 仲話：『如果我哋生活喺我哋祖先嘅時代，一定唔會同佢哋一齊殺害先知，分擔佢哋嘅血債。』 31 噉即係話，你哋承認自己係殺害先知嘅人嘅子孫啦。 32 你哋即管做埋你哋祖先未完成嘅惡事啦！

33 「你哋係蛇，係毒蛇嘅子孫，你哋可以逃避判決，唔使被揼入欣嫩谷咩？ 34 由於你哋做咗呢啲壞事，我會派先知、智者、導師*嚟到你哋呢度。有啲你哋會殺死，喺木柱上面處決；有啲你哋會喺會堂入面鞭打，由一座城迫害到另一座城。 35 所以，地上所有正義嘅人被殺嘅血債都要由你哋償還*，由正義嘅亞伯開始，去到巴拉加嘅仔撒迦利亞為止，呢個撒迦利亞就係你哋喺聖殿前面，祭壇附近殺死嘅嗰位。 36 我可以好肯定噉同你哋講，呢一代人要為所有呢啲事承擔責任。

37 「耶路撒冷，耶路撒冷，你殺死先知，又用石頭打死上帝派嚟你呢度嘅人。我一次又一次想聚集你啲仔女，就好似母雞將雞仔聚集去佢對翼下面噉！但係你哋唔願意。 38 所以，上帝會捨棄你哋嘅聖殿*。 39 我話俾你哋知，由而家起，你哋絕對唔會再見到我，直到你哋話：『奉耶和華*嘅名而嚟嘅嗰一位係得到上帝賜福㗎！』」