馬太福音

8 之後，耶穌落咗山，有一大班人跟住佢。 2 就喺呢個時候，有個痲瘋病人走過嚟向佢下拜，佢話：「主啊，我知道只要你願意，就可以令我好返*㗎喇。」 3 耶穌伸手摸佢，然後話：「我好願意！你好返啦。」嗰個痲瘋病人就即刻好返。 4 耶穌就同佢講：「唔好話俾任何人知呀，你要去搵祭司俾佢哋檢查吓，亦都要獻上摩西法典規定嘅禮物，噉就可以向佢哋證明你已經好返*嘞。」

5 耶穌到咗迦百農，有個軍官嚟搵佢，懇求佢， 6 話：「先生，我嘅僕人癱咗呀，佢而家瞓咗喺屋企好痛苦。」 7 耶穌同佢講：「我去到嗰度就會醫好佢㗎嘞。」 8 個軍官回答話：「先生，我邊度配請你嚟我屋企吖。你只要講一句說話，就可以醫返好我嘅僕人嘞。 9 我自己都係受人指揮嘅，手下亦都有士兵。我同呢個講：『去！』佢就去；同另一個講：『過嚟！』佢就會嚟；同我嘅奴隸講：『做呢件事吖！』佢就會去做。」 10 耶穌聽到就覺得好驚訝，同跟隨佢嘅人講：「我老實同你哋講，喺以色列我都未見過咁有信心嘅人。 11 不過，我話俾你哋知：將來會有好多人由東方、西方嚟到，喺天上嘅王國同亞伯拉罕、以撒、雅各一齊享用宴席*； 12 而嗰啲原本可以進入王國嘅人，反而會被揼出去外面嘅黑暗之中。喺嗰度，佢哋會痛哭流淚，咬牙切齒*。」 13 耶穌跟住同個軍官講：「返去啦。既然你咁有信心，就成全你啦。」就喺嗰個時候，軍官嘅僕人就好返嘞。

14 耶穌去到彼得屋企，見到彼得嘅外母發緊燒，瞓咗喺度。 15 耶穌摸一摸佢隻手，佢就退咗燒。跟住佢起身整啲嘢俾耶穌食*。 16 到咗夜晚，有啲人帶咗好多被邪靈操縱嘅人嚟搵耶穌。耶穌只係用一句說話就將啲邪靈趕走，仲將所有病咗嘅人醫返好。 17 呢個係要實現以賽亞先知講過嘅說話：「佢承擔我哋嘅病痛，背負我哋嘅痛苦。」

18 耶穌見有好多人圍住佢，就吩咐門徒過對面岸。 19 有個抄經士走埋嚟，同耶穌講：「老師，無論你去邊度，我都會跟住你。」 20 不過，耶穌同佢講：「狐狸有洞穴可以住，天上嘅雀仔有巢可以棲身，但係人子*就冇屬於自己嘅屋企*。」 21 另一個門徒嚟同耶穌講：「主啊，求你俾我去埋葬爸爸先啦。」 22 耶穌同佢講：「你要不斷跟隨我，等死人埋葬死人啦。」

23 耶穌上咗船，門徒亦都跟住佢。 24 突然間，海面刮起強勁嘅風浪，海浪湧入船裡面，不過，耶穌就喺度瞓緊覺。 25 門徒嚟叫醒耶穌，話：「主啊，救吓我哋吖，我哋就快浸死喇！」 26 耶穌同佢哋講：「點解你哋咁驚呢？你哋嘅信心去咗邊呀？」耶穌就起身制止*風浪，周圍就即刻平靜返嘞。 27 大家見到都好驚訝噉樣講：「佢係咩人嚟㗎？竟然連風同海都聽佢話！」

28 耶穌過咗對岸，去到加大拉人嘅地區，有兩個俾邪靈操縱嘅人由墓地行去耶穌嗰度。呢兩個人極之凶悍，冇人夠膽經過嗰條路。 29 忽然間，佢哋尖叫，然後話：「上帝嘅仔，你嚟呢度做咩呀？*時候都未到，你就嚟呢度懲罰我哋呀？」 30 當時，離遠有一大班豬喺度食緊嘢。 31 啲邪靈就求耶穌，話：「如果你要趕我哋出嚟，就趕我哋去啲豬度啦。」 32 耶穌同佢哋講：「去啦！」佢哋就出嚟，入咗去啲豬嘅身體。於是，啲豬就全部衝落懸崖*，跌落海浸死晒。 33 放豬嘅人就走入城，將成件事，包括嗰兩個俾邪靈操縱嘅人嘅事，都講晒出嚟。 34 跟住，全城嘅人都出嚟見耶穌。一見到佢，就求佢離開佢哋嘅地區。