路加福音

19 耶穌入咗耶利哥，經過呢座城。 2 嗰度有個人叫做撒該，佢係稅務長，非常有錢。 3 佢想睇吓耶穌係個點樣嘅人，不過由於人多，自己又矮，就望唔到耶穌。 4 於是佢跑去前面，爬上一棵無花果樹*想望吓耶穌，因為耶穌就快經過嗰度。 5 耶穌行到去，抬頭一望，同佢講：「撒該，快啲落嚟吖，今日我要去你屋企。」 6 撒該即刻落嚟，好開心噉接待耶穌。 7 大家見到，就細細聲議論話：「佢居然喺罪人屋企留宿。」 8 撒該企起身，同主講：「主啊，我要將我一半嘅財產分俾窮人；我敲詐過邊個，就還返四倍俾佢。」 9 耶穌同佢講：「今日上帝拯救咗呢個人同佢一家*，因為佢都係亞伯拉罕嘅子孫。 10 人子嚟到，係要尋找同拯救迷失嘅人。」

11 門徒聽到呢啲說話嘅時候，耶穌又講咗一個比喻，因為佢就快到耶路撒冷，門徒以為上帝嘅王國即刻就會出現， 12 耶穌話：「有個貴族出身嘅人為咗得到王權*，要去好遠嘅地方接受冊封，然後返嚟。 13 佢叫10個奴隸嚟，將1000銀元*分俾佢哋，同佢哋講：『你哋拎去做生意，直到我返嚟。』 14 不過佢自己國家嘅人好憎佢，派大使團跟住去，同佢講：『我哋唔想你做我哋嘅君王。』

15 「佢得到王權返嚟之後，吩咐嗰啲攞咗銀元嘅奴隸嚟見佢，想知道佢哋做生意賺咗幾多。 16 第一個上前話：『主啊，我用你嗰100銀元賺咗1000。』 17 主人同佢講：『做得好，你真係一個好奴隸！你喺細微嘅事上忠心，我會派你管理10座城。』 18 第二個奴隸嚟到話：『主啊，我用你嗰100銀元賺咗500。』 19 主人亦都同呢個奴隸講：『我都派你管理5座城啦。』 20 仲有一個奴隸嚟到話：『主啊，你嗰100銀元喺度，我一直用布包住，收埋咗！ 21 你知，我不嬲都好驚你，因為你係個苛刻嘅人，冇存入銀行嘅錢你都要攞，冇種嘢又話要收割。』 22 主人同呢個奴隸講：『你呢個邪惡嘅奴隸，就憑你親口講嘅嘢，我要定你罪。你話我係個苛刻嘅人，冇存入銀行嘅錢都要攞，冇種嘢又話要收割，係咪？ 23 噉你點解唔將我啲錢存入銀行呢？我返到嚟嘅時候就可以連本帶利收返嘞。』

24 「主人同企喺側邊嘅人講：『拎走佢嗰100銀元，俾嗰個有1000嘅。』 25 佢哋話：『主啊，佢已經有1000銀元喇喎！』 26 主人話：『我話俾你哋知，邊個有嘅，仲要俾多啲佢；邊個冇嘅，就連佢有嘅，都要攞走埋。 27 至於我嗰啲敵人，即係唔想我做佢哋君王嘅人，將佢哋帶過嚟，喺我面前處死！』」

28 耶穌講完呢一切之後，就繼續向前行，上去耶路撒冷。 29 佢到咗伯法其同埋伯大尼附近，呢兩個地方位於橄欖山。嗰個時候，佢派咗兩個門徒出去， 30 話：「你哋去前面嗰個村莊。入去之後，就會見到一隻驢仔綁咗喺嗰度，係從來冇人騎過嘅。你哋要解開佢拉過嚟。 31 如果有人問你哋：『點解解開佢呀？』你哋就話：『主需要用佢。』」 32 佢哋就去，見到嘅真係同耶穌講嘅一樣。 33 佢哋就解開隻驢仔，驢仔嘅主人就同佢哋講：「你哋點解解開隻驢仔呀？」 34 佢哋話：「主需要用佢。」 35 佢哋將驢仔拉去耶穌嗰度，將外衣鋪喺驢背，俾耶穌坐上去。

36 當耶穌向前行嘅時候，好多人將外衣鋪喺路上面。 37 佢就快到落橄欖山嘅嗰條路，成班門徒因為曾經見過嘅所有奇跡，就非常之歡樂，大聲讚美上帝， 38 佢哋話：「奉耶和華*嘅名而嚟嘅王係有福嘅！願天上有和平，至高之處有榮耀！」 39 人群當中有幾個法利賽派嘅人同耶穌講：「老師，制止*你啲門徒啦。」 40 耶穌回答：「如果佢哋唔出聲，石頭就會出聲*。」

41 就快到耶路撒冷嘅時候，耶穌望住座城，為呢座城哭泣， 42 佢話：「但願你今日睇出點樣做就能夠得到真正嘅平安，不過呢啲事而家係隱藏嘅，係你睇唔見嘅。 43 時候會到，你嘅敵人會用尖柱做圍欄包圍你，四方八面圍困*你。 44 佢哋會消滅你同你境內嘅居民*，唔俾你境內有一塊石頭留喺石頭上面，因為你睇唔出你幾時受到審察。」

45 耶穌入咗聖殿，將賣嘢嘅人趕出去， 46 同佢哋講：「聖經話：『我嘅殿係禱告嘅殿。』你哋竟然令佢成為強盜嘅巢穴。」

47 耶穌每日都喺聖殿裡面教導人。祭司長、抄經士同人民嘅首領都想殺佢， 48 但係搵唔到機會落手，因為民眾全部都寸步不離，想聽佢講嘢。