馬可福音

16 安息日一過，末大拉人馬利亞、雅各嘅媽媽馬利亞同埋撒羅米，就買咗香料，用嚟搽喺耶穌嘅遺體。 2 跟住嗰個星期嘅第一日，一朝早，太陽一出嚟，佢哋就去到墓穴。 3 佢哋互相話：「邊個可以幫我哋移開墓穴門口嘅石頭呀？」 4 但係佢哋岳高頭一望，發現嗰塊巨大嘅石頭已經移開咗。 5 佢哋行入墓穴，見到有個著住白袍嘅年輕人坐喺右邊，就好驚訝。 6 年輕人同佢哋講：「唔使驚訝。我知道你哋想搵喺木柱上被處死嘅拿撒勒人耶穌，佢已經復活咗，唔喺呢度。睇吓，呢個就係佢哋安放佢嘅地方嘞。 7 你哋去同佢嘅門徒同埋彼得講：『佢會早過你哋去到加利利。你哋會喺嗰度見到佢，就好似佢之前同你哋講嘅噉。』」 8 啲婦女好激動，成身震晒，一出咗墓穴就走咗去，咩都冇同任何人講，因為佢哋真係好驚*。