路加福音

10 呢啲事之後，主另外揀咗70個人，派佢哋兩個兩個行先，去到佢之後會去嘅各城各地。 2 主同佢哋講：「要收割嘅農作物*真係好多，但係工人實在太少嘞。所以，你哋要懇求農作物嘅主人，派工人出去收割佢嘅農作物。 3 去啦！我派你哋出去，就好似將羔羊送入狼群入面。 4 唔好帶錢袋，唔好帶糧袋，唔好帶鞋，亦都唔好喺路上面同任何人打招呼*。 5 你哋入去邊一個屋企，都要先講句：『願你一家平安。』 6 如果嗰度有喜愛平安嘅人*，噉佢就會得到你哋求嘅平安。如果唔係，平安就俾返你哋嘞。 7 你哋要住喺嗰間屋，佢哋提供乜嘢飲食，你哋都可以享用，因為工人得到報酬係應該㗎。不過，留咗喺嗰度，就唔好搬嚟搬去嘞。

8 「你哋入去一座城，如果人哋接待你哋，俾乜嘢你哋食，你哋就食乜嘢啦， 9 亦都要醫好嗰度嘅病人，話俾人知：『上帝嘅王國臨近嘞。』 10 你哋入到一座城，如果人哋唔接待你哋，你哋就要去大街嗰度講： 11 『我哋嘅腳黐咗你哋城嘅塵土，連呢啲塵土，我哋都要抹走，以示警告。要記住：上帝嘅王國臨近嘞。』 12 我話俾你哋知，喺嗰一日*，嗰座城遭受嘅懲罰，會比所多瑪遭受嘅更加重。

13 「哥拉遜啊，你有禍嘞！伯賽大啊，你有禍嘞！因為我喺你哋嗰度施行嘅奇跡，如果喺泰爾同埋西頓施行嘅話，嗰度嘅人一早就著起粗布，坐喺灰嗰度悔改嘞。 14 所以喺審判嘅時候，你哋遭受嘅懲罰，會比泰爾同埋西頓嘅更加重。 15 迦百農啊，你會被捧上天咩？其實你會被貶到墳墓呀！

16 「聽從你哋嘅，即係聽從我。漠視你哋嘅，即係漠視我。漠視我嘅，即係漠視派我嚟嘅嗰位。」

17 嗰70個人開開心心噉返嚟，話：「主啊，因為用你嘅名，連邪靈都順服我哋呀。」 18 耶穌同佢哋講：「我見到撒但好似閃電一樣從天上墜落嘞。 19 我賜咗權力俾你哋，令你哋可以將啲蛇同埋蠍子踐踏喺腳下，仲可以戰勝能力強大嘅敵人，絕對冇任何嘢能夠傷害你哋。 20 不過，唔好因為邪靈順服你哋而開心，應該因為你哋嘅名已經記錄喺天上而開心。」 21 就喺嗰個時候，耶穌充滿神聖力量，就非常喜樂，佢話：「爸爸，天地嘅主啊，我公開讚美你，因為你將呢啲事向有智慧、有學問嘅人小心隱藏起嚟，但係就向小朋友揭示出嚟。冇錯，爸爸，因為呢個係你鍾意*嘅做事方式。 22 我爸爸已經將一切都交俾我嘞。除咗爸爸，冇人知道我係邊個；除咗我同埋我願意啟示嘅人，亦都冇人知道爸爸係邊個。」

23 耶穌擰轉身，私下同門徒講：「邊個睇見你哋而家睇見嘅事，就有福嘞*。 24 我話俾你哋聽，好多先知同埋君王，好想睇到你哋而家睇到嘅事，但係都睇唔到，好想聽到你哋而家聽到嘅事，但係都聽唔到。」

25 有一個精通摩西法典嘅人想試探耶穌，企起身話：「老師，我應該做啲乜嘢先可以得到永遠嘅生命呀？」 26 耶穌同佢講：「法典上面點樣寫呢？你讀過嘅，你點樣理解呢？」 27 佢回答話：「你要『全心，全意，全力，用全部生命愛耶和華*你嘅上帝』，亦都要『愛人如己』。」 28 耶穌同佢講：「你答得啱。你繼續噉樣做，就會得到生命。」

29 嗰個人想證明自己係啱嘅，就同耶穌講：「邊啲人係我應該愛嘅呢？」 30 耶穌同佢講：「有一個人由耶路撒冷落去耶利哥，途中俾人打劫。強盜剝咗佢嘅衫，打到佢半死，揼低佢就走咗嘞。 31 咁啱有一個祭司經嗰條路落去，見到佢，就從另一邊走咗。 32 同樣，有個利未族人經過嗰度，見到佢，亦都行另一邊走咗。 33 但係，有一個撒馬利亞人途經嗰度，一見到佢，就好同情佢。 34 呢個人行上前，攞油同埋酒倒喺佢嘅傷口，然後幫佢包紮，又扶佢騎上自己嘅牲畜，帶到客店照顧佢。 35 第二日，撒馬利亞人拎咗兩銀元*俾客店老闆，同佢講：『請照顧佢吖，如果仲有啲乜嘢使費，我返嚟一定會補返俾你。』 36 你覺得呢三個人當中，邊個愛遇劫嗰個人呢？」 37 佢話：「係憐憫佢嘅嗰個人。」耶穌同佢講：「噉你就照住去做啦。」

38 喺路上，耶穌入咗一條村莊。有一個女人叫做馬大，請耶穌去佢屋企食飯。 39 馬大有個妹妹*叫馬利亞，一直坐喺主嘅腳前聽佢嘅教導， 40 而馬大就分心，去準備好多嘢。於是，佢嚟同耶穌講：「主啊，我妹妹*由得我一個人準備晒所有嘢，你覺得冇問題咩？你叫佢嚟幫吓我啦。」 41 主回答話：「馬大，馬大，你為太多事憂慮不安嘞。 42 其實需要嘅唔多，甚至一樣就夠嘞。馬利亞揀咗最好嘅一份，冇人可以喺佢嗰度攞走。」