路加福音
7 耶穌講完想同民眾講嘅嘢之後，去咗迦百農。 2 有一個軍官，佢器重嘅奴隸患咗重病，就快死嘞。 3 佢聽到關於耶穌嘅事，就請猶太人嘅幾個長老去見耶穌，求耶穌嚟醫好佢嘅奴隸。 4 佢哋嚟到耶穌嗰度，懇求話：「佢真係好值得你為佢噉樣做㗎， 5 因為佢愛我哋嘅同胞，又為我哋起會堂。」 6 耶穌就同佢哋一齊過去。就快到軍官屋企嘅時候，軍官託幾個朋友嚟，同耶穌講：「先生，唔好麻煩你嘞。我真係唔配請你嚟我屋企。 7 我自己都覺得唔配嚟見你。其實你只要講一句話，我嘅僕人就可以好返。 8 我都係要聽人指揮嘅，自己手下都有士兵。我同呢個講：『去！』佢就去；同嗰個講：『過嚟！』佢就過嚟；同我嘅奴隸講：『做呢件事！』佢就去做。」 9 耶穌聽到呢番說話，就好驚訝，擰轉身同跟隨佢嘅民眾講：「我話俾你哋知，咁有信心嘅人，連喺以色列我都未見過。」 10 受軍官所託嘅朋友返到去佢屋企，見到嗰個奴隸已經好返嘞。
11 過咗冇耐，耶穌去咗一座叫做拿因嘅城，有一大班人同埋門徒同佢一齊去。 12 耶穌行近城門嘅時候，有一個死人被抬出嚟，呢個人係一個獨生子，而佢嘅媽媽係個寡婦。城入面有一大班人陪住嗰個女人。 13 主一見到佢，就好同情佢，同佢講：「唔好喊嘞。」 14 耶穌上前將手放喺擔架*上面，抬嘅人就停低，企喺度。耶穌話：「年輕人，我吩咐你起身！」 15 嗰個死咗嘅人就坐起身，開口講說話，耶穌將佢交俾佢嘅媽媽。 16 人人都充滿敬畏嘅心，讚美*上帝話：「一位偉大嘅先知喺我哋當中出現呀。」又話：「上帝關注佢嘅子民呀。」 17 關於耶穌嘅呢個消息就傳遍咗猶地亞同埋附近一帶。
18 約翰嘅門徒將呢一切講咗俾約翰聽。 19 約翰就叫兩個門徒嚟，派佢哋去問主：「你係咪我哋等待嘅嗰位*呀？定係我哋要期待另一位呢？」 20 於是佢哋嚟見耶穌，話：「施浸者約翰派我哋嚟問你：『你係咪我哋等待嘅嗰位呀？定係我哋要期待另一位呢？』」 21 嗰時，耶穌醫好好多病人，無論佢哋嘅病係重定係輕，耶穌都醫返好。佢仲醫好俾邪靈附身嘅人，又向盲人施恩，令好多人睇返嘢。 22 於是耶穌回答佢哋：「你哋返去將自己睇到聽到嘅事，講俾約翰知啦：盲嘅睇到嘢，跛嘅行到路，有痲瘋病嘅好返*，聾嘅聽到嘢，死人復活，窮人聽到好消息。 23 冇因為我而失足跌倒嘅人*係有福*嘅。」
24 約翰派嚟嘅人走咗之後，耶穌就同民眾講到約翰，話：「你哋以前喺曠野見到嘅嗰個人係點樣嘅呢？佢係咪好似隨風搖擺嘅蘆葦噉呀？唔係呀！ 25 噉你哋見到嘅嗰個人係點樣嘅呢？佢係咪著得好奢華*嘅呢？都唔係呀！服裝華麗、生活奢侈嘅人係住喺王宮入面㗎。 26 噉佢到底係邊個呢？係咪一個先知？冇錯！我話俾你哋聽，佢係先知，但係唔止先知咁簡單。 27 聖經話：『睇吓！我要派我嘅使者行喺你前面*，佢會喺你前面為你準備道路。』呢句話講嘅就係佢嘞。 28 我話俾你哋知，喺世人當中*，冇一個比約翰大，但係喺上帝嘅王國入面，再渺小嘅都比佢大。」 29 （由於民眾同埋收稅人都接受過約翰嘅浸禮，當佢哋聽到耶穌噉樣講，就宣告上帝係正義嘅。 30 但係法利賽派同精通摩西法典嘅人冇接受約翰嘅浸禮，就漠視上帝俾佢哋嘅指引*。）
31 「噉我應該將呢一代人比喻做乜嘢人呢？佢哋好似邊啲人呢？ 32 佢哋好似一班小朋友坐喺市集廣場度，大聲同同伴講：『我哋為你哋吹笛伴奏，但係你哋唔跳舞；我哋唱哀歌，你哋又唔喊。』 33 類似㗎，施浸者約翰嚟到，唔食飯唔飲酒，你哋就話：『佢俾邪靈附身。』 34 但係人子嚟到，有食嘢有飲酒，你哋就話：『睇吓！呢個人貪食好酒，同收稅人仲有罪人做朋友！』 35 不過，一個人係咪有智慧，睇佢嘅行為*就可以證實*嘞。」
36 有一個法利賽派嘅人再三邀請耶穌食飯，耶穌就去咗佢屋企嘞。 37 有一個女人，係城裡面公認嘅罪人，佢知道耶穌喺呢個法利賽派嘅人屋企食飯*，就帶咗馨香油嚟，係用雪花石造嘅樽裝住嘅。 38 佢行到耶穌後面，喺耶穌嘅腳邊喊。佢用眼淚滴濕耶穌嘅腳，然後用頭髮抹乾，又溫柔噉親吻耶穌嘅腳，仲倒啲馨香油落去。 39 嗰個邀請耶穌嘅法利賽派嘅人見到，心諗：「呢個人如果真係先知，就應該知道摸佢嘅係邊個，係個點樣嘅女人，知道佢係個罪人嚟㗎噃。」 40 耶穌就同佢講：「西門，我有啲嘢想同你講呀。」佢話：「老師，請講！」
41 「有兩個人爭一個債主嘅錢，一個爭咗500銀元*，一個爭咗50銀元。 42 佢哋都冇能力還錢，債主就心甘情願免咗佢哋嘅債。噉你話佢哋邊個會愛佢多啲？」 43 西門回答話：「我諗係欠債多啲嗰個。」耶穌話：「你答得啱。」 44 於是佢擰轉身望向嗰個女人，同西門講：「你睇吓呢個女人，我入嚟你屋企，你冇俾水我洗腳，而呢個女人就用眼淚滴濕我嘅腳，用頭髮抹乾。 45 你冇親吻我，而呢個女人由我入嚟之後，就不斷溫柔噉親吻我嘅腳。 46 你冇將啲油倒喺我嘅頭度，而呢個女人就將馨香油倒落我嘅腳度。 47 所以我話俾你知，就算佢犯過好多罪*，都被赦免嘞，因為*佢愛得多。而嗰個被赦免得比較少嘅人，愛得亦都少。」 48 然後耶穌同嗰個女人講：「你嘅罪都赦免嘞。」 49 同耶穌一齊食飯嘅人就私下議論話：「呢個人係邊個嚟㗎？竟然赦免人嘅罪！」 50 而耶穌就同嗰個女人講：「你嘅信心救咗你。唔使擔心，你平安噉返去啦。」