馬太福音

14 喺嗰個時候，分封侯希律聽到關於耶穌嘅事。 2 佢同僕人講：「佢肯定係施浸者約翰。佢返生嘞，所以先施行到呢啲奇跡。」 3 原來之前希律*為咗令佢哥哥腓力嘅太太希羅底開心，就逮捕約翰，綁起佢，韞佢入監， 4 原因係約翰好多次同希律講：「你娶呢個女人係唔合法㗎。」 5 佢好想殺咗約翰，但係又好怕啲民眾，因為大家都相信約翰係先知。 6 到咗慶祝希律生日嘅時候，希羅底嘅女出嚟跳舞助興，氹到希律好開心， 7 於是希律發誓話，無論希羅底個女想要啲乜嘢，都會俾佢。 8 佢受到媽媽教唆，就話：「將施浸者約翰個頭放落個盤度，送嚟俾我吖。」 9 王好憂愁，無奈自己發咗誓，而宴席嘅賓客又聽到，就唯有叫人噉樣做。 10 佢派人去監獄斬約翰嘅頭落嚟， 11 放喺個盤度，交俾嗰個女仔，個女仔就拎去俾佢媽媽。 12 後嚟約翰嘅門徒嚟到，拎佢嘅屍體去埋葬，之後佢哋去話俾耶穌知呢件事。 13 耶穌聽到呢個消息，就坐船離開嗰度，去咗一個偏僻嘅地方，唔想俾人打擾。一大班嚟自唔同城鎮嘅人，知道耶穌上咗船，就徒步跟住佢。

14 佢上岸之後見到一大班人，就憐憫佢哋，醫好佢哋當中嘅病人。 15 就快天黑嘅時候，門徒嚟同佢講：「時候都唔早嘞，呢個地方又咁偏僻。不如叫啲民眾走，等佢哋入村自己買嘢食啦。」 16 但係耶穌同佢哋講：「唔好叫佢哋走，你哋攞啲嘢俾佢哋食啦。」 17 門徒就話：「我哋呢度乜都冇，得五個餅、兩條魚咋喎。」 18 耶穌話：「你哋拎嚟俾我吖。」 19 跟住佢叫民眾坐喺草地，然後拎起五個餅、兩條魚，望向天，禱完告，就搣開啲餅，交俾門徒，門徒再俾民眾。 20 每個人都食，而且食到飽。佢哋將淨低嘅餅收拾好，裝滿咗12個籃。 21 食嘢嘅人，男人大約有5000人，另外仲有女人同埋小朋友。 22 之後耶穌即刻叫門徒上船，過去對面岸先，而自己就留低送民眾離開。

23 民眾走晒之後，耶穌就自己一個人上山禱告。入夜之後，佢仍然一個人喺嗰度。 24 當時門徒坐嘅船已經離岸好遠*嘞，由於逆風航行，海浪又好大，佢哋好難控制隻船。 25 就快天光*嗰陣，耶穌喺海上面行，行去門徒嗰度。 26 門徒一見到佢喺海上面行，就好驚，佢哋話：「係幻覺呀！」佢哋驚到嗌咗出嚟。 27 耶穌就即刻同佢哋講：「放心！*係我呀，唔使驚。」 28 彼得就話：「主啊，如果真係你，俾我可以喺海上面行去你度吖。」 29 耶穌話：「過嚟吖！」彼得就落船，喺水上面行，行去耶穌嗰度。 30 但係，彼得見到風暴，就好驚，開始向下沉，佢大嗌：「主啊，救我呀！」 31 耶穌即刻伸隻手出嚟捉住佢，同佢講：「你信心唔夠呀，點解要懷疑呢？」 32 佢哋上咗船之後，風暴就停咗嘞。 33 船上嘅人就向耶穌下拜，話：「你真係上帝嘅仔呀！」 34 佢哋過咗對面岸，喺革尼撒勒落船。

35 嗰度嘅人一認出係耶穌，就通知嗰一帶嘅人，於是大家都帶啲病人去見耶穌。 36 佢哋懇求耶穌，話只係想掂一掂佢外衣嘅穗邊。所有掂到嘅人都好返晒。