路加福音

9 耶穌召集十二使徒，賜力量同埋權力俾佢哋，能夠制伏所有邪靈，又能夠醫治各種疾病。 2 佢派佢哋去傳講上帝嘅王國，醫治病人。 3 耶穌同佢哋講：「唔好帶啲咩上路，唔好帶手杖，唔好帶糧袋，唔好帶食物，唔好帶錢*，亦都唔好額外帶多件衫*。 4 無論你哋入去邊個屋企，都要住喺嗰度，直到離開。 5 邊座城嘅人唔接待你哋，你哋離開嗰陣，就要扽走腳上面嘅塵土，表明佢哋已經受到警告*。」 6 佢哋就起程，去勻境內嘅每個村鎮，四圍去宣揚好消息，幫人醫病。

7 分封侯希律*聽到呢啲事，就好疑惑，因為有人話約翰死而復生嘞， 8 又有人話以利亞出現嘞，仲有人話古代嘅一個先知復活咗。 9 希律話：「約翰已經俾我斬咗頭啦，噉呢個人係邊個嚟㗎？我聽到好多關於佢嘅事。」於是，佢就好想見吓耶穌。

10 使徒返嚟之後，將做過嘅事都報告俾耶穌聽。耶穌就帶住佢哋離開人群，去一座叫做伯賽大嘅城。 11 民眾知道咗，就跟住佢。耶穌歡迎佢哋，向佢哋傳講上帝嘅王國，醫好病咗嘅人。 12 就快日落嘞，十二使徒嚟同耶穌講：「不如叫啲民眾走啦，等佢哋去附近嘅鄉村搵地方住同埋搵嘢食，因為呢度好偏僻呀。」 13 耶穌同佢哋講：「你哋拎啲嘢俾佢哋食吖。」佢哋話：「我哋淨係得五個餅、兩條魚，冇其他嘢嘞喎，除非我哋幫呢度所有人買嘢食啦。」 14 當時大約有5000個男人。耶穌同門徒講：「叫佢哋一組一組噉坐低，每組大概50人。」 15 佢哋就噉樣做，叫所有人坐低先。 16 然後耶穌拎起五個餅、兩條魚，抬頭望天，禱完告，將餅搣開，又將餅同魚交俾門徒，門徒就擺喺民眾面前。 17 人人都食，而且食飽。佢哋將食淨嘅收拾好，裝咗12個籃。

18 耶穌一個人禱告嘅時候，門徒嚟見佢，佢問門徒：「民眾話我係邊個呢？」 19 佢哋回答：「有啲話係施浸者約翰，有啲話係以利亞，仲有啲話係古代一個先知復活咗。」 20 耶穌問佢哋：「你哋呢？你哋話我係邊個？」彼得回答話：「你係上帝揀選嘅基督。」 21 耶穌就鄭重噉吩咐佢哋，唔好將呢件事講俾人知， 22 又話：「人子一定會受好多苦，俾長老、祭司長、抄經士棄絕，俾人殺死，第三日復活。」

23 耶穌又同所有人講：「邊個想嚟跟從我，就唔好再為自己而活，要每日孭起自己嘅苦刑柱*，一直跟隨我。 24 邊個想救自己嘅生命，就會失去生命；邊個為我失去生命，就可以救自己嘅生命。 25 人就算賺到全世界，但係冇咗生命或者自毀一生，又有乜嘢益處呢？ 26 邊個因為我同埋我嘅說話而覺得羞恥，噉人子喺佢自己、佢爸爸同埋聖天使嘅榮耀裡面嚟到嘅時候，都會以呢個人為恥。 27 我可以好肯定噉話俾你哋知，呢度在場嘅人當中，有啲仲未試過死亡嘅滋味，就會見到上帝嘅王國。」

28 講完呢啲說話之後，大約過咗八日，耶穌帶住彼得、約翰、雅各上山禱告。 29 佢禱告嘅時候，面貌就改變咗，身上嘅衫都變得光潔雪白。 30 突然之間，有兩個人出現咗，同耶穌傾偈。呢兩個人就係摩西同埋以利亞。 31 佢哋帶住榮耀出現，講到關於耶穌離世嘅事，即係佢喺耶路撒冷將會成就嘅事。 32 當時彼得同埋啲同伴都昏昏欲睡。佢哋清醒之後，就見到耶穌嘅榮耀同埋企喺佢身邊嗰兩個人。 33 嗰兩個人就快離開耶穌嘞，彼得就同耶穌講：「老師，我哋喺度真係好呀，等我哋搭三個帳幕，一個俾你，一個俾摩西，一個俾以利亞吖。」其實佢根本唔知道自己講緊啲乜嘢。 34 彼得仲講緊嘢嘅時候，有一嚿雲出現，籠罩佢哋。喺雲裡面，佢哋覺得好驚。 35 雲裡面有聲音發出話：「呢個係我嘅仔，係我揀選㗎。你哋要聽從佢。」 36 佢哋聽到呢個聲音嘅時候，淨係見到耶穌一個人喺嗰度。喺嗰段時期，佢哋守口如瓶，冇將見到嘅事講俾人知。

37 第二日，佢哋落山嘅時候，耶穌見到一大班人。 38 突然間，人群當中有個人大嗌話：「老師，求你睇吓我個仔吖，我得呢一個仔㗎咋。 39 邪靈成日捉住佢，令到佢突然間大嗌，又令佢痙攣，嘔白泡，傷害完佢之後都唔肯罷休呀。 40 我求過你啲門徒趕邪靈出去，但係佢哋都做唔到。」 41 耶穌回應話：「呢一代又不信又歪邪嘅人啊，我要同你哋一齊到幾時呢？要容忍你哋幾耐呢？帶你個仔嚟呢度啦。」 42 個男仔上前嘅時候，邪靈竟然又將佢撻喺地，令佢痙攣得好犀利。耶穌斥責邪靈*，醫好個男仔，交俾佢爸爸。 43 人人都對上帝偉大嘅力量非常之驚訝。

當大家仲因為耶穌所做嘅一切而覺得驚訝嘅時候，耶穌同門徒講： 44 「你哋要留心聽，謹記我嘅說話：人子會俾人出賣，落喺敵人手上。」 45 不過佢哋唔理解耶穌講嘅嘢，因為呢句說話嘅含意係隱藏起嚟，唔俾佢哋明白嘅，而佢哋亦都唔敢問耶穌呢句話究竟係咩嘢意思。

46 有一次，佢哋爭拗邊個最大。 47 耶穌知道佢哋心入面諗緊啲乜嘢，就帶咗一個小朋友嚟，叫佢企喺自己側邊， 48 同佢哋講：「邊個因為我嘅名接待呢個小朋友，即係接待我；邊個接待我，即係接待派我嚟嘅嗰位。喺你哋當中，邊個好似最卑微*嘅人噉樣為人處事，邊個就係最大嘅。」

49 約翰就同耶穌講：「老師，我哋見到有個人用你嘅名驅逐邪靈，我哋就去阻止佢，因為佢都唔係同我哋一齊跟從你嘅。」 50 耶穌同佢講：「唔好阻止佢，因為唔反對你哋嘅，即係支持你哋㗎嘞。」

51 耶穌被接上天嘅日子就快到嘞。佢心意堅定，要去耶路撒冷。 52 佢派一啲門徒行先，佢哋就去到撒馬利亞人嘅一個村莊，要為佢做準備。 53 嗰度嘅人見佢咁決心要去耶路撒冷，就唔接待佢。 54 門徒雅各同埋約翰見到，就話：「主啊，你使唔使我哋叫啲火從天而降，消滅晒佢哋呀？」 55 耶穌擰轉身，斥責佢哋兩個。 56 大家就去咗其他村莊嘞。

57 喺路上，有人同耶穌講：「無論你去邊度，我都會跟隨你。」 58 耶穌同佢講：「狐狸有洞穴可以住，天上嘅雀仔有巢可以棲身，但係人子連屬於自己，用嚟瞓覺嘅地方都冇*。」 59 耶穌同另一個人講：「嚟跟隨我啦！」嗰個人話：「主啊，請你俾我去埋葬爸爸先啦。」 60 耶穌同佢講：「等死人埋葬死人啦。你即管去，宣揚上帝嘅王國。」 61 仲有一個人話：「主啊，我會跟隨你，但係俾我同屋企人道別先啦。」 62 耶穌同佢講：「一個人喺田度犁地而又向後望，絕對唔適合進入上帝嘅王國。」