路加福音

24 跟住嗰個星期嘅第一日，啲婦女一朝早就帶住準備好嘅香料去墓穴。 2 佢哋見到墓穴嘅石頭已經移開咗， 3 入到去，竟然見唔到主耶穌嘅遺體。 4 佢哋仲迷惘緊嘅時候，突然有兩個人企喺佢哋身邊，身上嘅衫閃閃發光。 5 佢哋好驚，一直唔敢岳高頭。嗰兩個人同佢哋講：「你哋點解喺墳墓入面*搵嗰個活著嘅人呢？ 6 佢唔喺呢度，已經復活咗嘞。諗返佢喺加利利同你哋講過啲咩吖。 7 佢話人子一定會交喺罪人嘅手，喺木柱度被處死，第三日復活。」 8 噉佢哋先至諗起耶穌嘅說話， 9 就離開墓穴返去，向嗰11個使徒同其餘嘅人報告一切。 10 嗰啲婦女包括末大拉人馬利亞、約亞拿，雅各嘅媽媽馬利亞，同埋其餘嘅婦女，佢哋都將呢啲事話俾使徒知。 11 但係使徒認為呢啲婦女亂咁講，就唔肯相信。

12 彼得出發，跑去墓穴，烏低身望入去，見到嗰度淨係得返啲細麻布，就離開，心裡面不斷喺度諗發生咗咩事。

13 就喺嗰一日，門徒當中有兩個人去一個叫以馬烏斯嘅村莊。嗰個村莊距離耶路撒冷大約11公里*。 14 佢哋喺度討論發生咗嘅所有事。

15 嗰兩個人討論緊嘅時候，耶穌走過去，同佢哋一齊行。 16 佢哋見到耶穌，但係認唔出佢係邊個。 17 耶穌同佢哋講：「你哋兩個一路行，一路熱烈討論緊咩呢？」佢哋就停低，滿面愁容。 18 叫做革流巴嗰個門徒話：「你係咪喺外地嚟，一個人住喺耶路撒冷㗎？你唔知呢段時間城裡面發生咩事咩？*」 19 耶穌問佢哋：「發生咗咩事呀？」佢哋話：「係拿撒勒人耶穌嘅事。佢係先知嚟㗎，喺上帝同所有人面前，講說話同做事都大有能力。 20 但係我哋嘅祭司長同首領居然將佢送官，判佢死刑，釘喺木柱度， 21 而我哋一直希望佢就係拯救以色列嘅嗰個人。仲有呀，發生呢啲事到而家已經第三日嘞。 22 我哋當中有啲婦女講嘅嘢都令我哋好驚訝，因為佢哋一早去到墓穴， 23 但係見唔到耶穌嘅遺體，返嚟報告話，佢哋竟然見到天使出現，而天使話耶穌已經復活嘞。 24 我哋有幾個人都去咗墓穴，發現情形就同嗰啲婦女講嘅一樣，不過都見唔到耶穌。」

25 耶穌同佢哋講：「不明事理嘅人啊，點解你哋嘅心仲係遲遲唔肯相信先知所講嘅一切？ 26 基督唔係一定要經歷呢一切苦難先至得到榮耀咩？」 27 佢就由摩西同先知嘅書開始，將聖經入面關於佢嘅說話，都解釋清楚俾佢哋聽。

28 佢哋就快去到嗰個村莊，耶穌睇嚟仲想繼續向前行。 29 佢哋就極力請耶穌留低，話：「時候唔早嘞，就快天黑，同我哋一齊喺呢度留宿啦。」耶穌就入屋，一齊喺嗰度過夜。 30 佢哋食飯嘅時候，耶穌拎起餅，禱完告，搣開，遞俾佢哋。 31 嗰一刻，佢哋就完全睇出呢個人係耶穌*，認到佢嘞。不過耶穌就喺佢哋面前消失咗。 32 佢哋都話：「佢喺路上同我哋講說話，向我哋清楚解釋聖經嗰陣，我哋嘅心唔係好似火一樣燃燒咩？」 33 佢哋即刻起程，返耶路撒冷。佢哋見到嗰11個使徒同其他門徒聚集埋一齊， 34 聽到佢哋話：「主真係復活咗，向西門顯現呀！」 35 於是，嗰兩個人將路上發生咗嘅事話俾大家知，亦都同大家講，佢哋見到耶穌搣餅先至認到佢。

36 佢哋仲講緊呢啲事嘅時候，耶穌企喺佢哋當中，同佢哋講：「願你哋平安。」 37 佢哋好驚，以為見到嘅係靈體。 38 於是耶穌話：「點解你哋咁不安？點解要懷疑呢？ 39 睇吓我嘅手同埋腳，係我呀。摸吓，靈體冇肉冇骨，但係你哋睇，我有㗎。」 40 佢一邊講一邊俾手腳佢哋睇。 41 佢哋又驚又喜，不過都係唔敢相信。耶穌同佢哋講：「你哋呢度有冇嘢食呀？」 42 佢哋遞咗塊烤魚俾佢。 43 佢就接住，喺佢哋面前食。

44 耶穌同佢哋講：「我仲同你哋一齊嘅時候，已經同你哋講過，所有寫喺摩西法典、先知書同埋詩篇入面關於我嘅說話，都一定應驗。」 45 耶穌就激發佢哋思考*，令佢哋完全明白聖經嘅意思， 46 仲同佢哋講：「聖經話：基督會經歷苦難，第三日死而復生； 47 亦都會有人奉佢嘅名，由耶路撒冷開始，向所有國族傳講信息，叫人悔改，令罪得到寬恕。 48 你哋要做呢啲事嘅見證人。 49 睇吓！我要將我爸爸承諾過嘅降喺你哋身上。你哋要留喺城入面，直到你哋得到從高天嚟嘅力量。」

50 耶穌帶佢哋去伯大尼，張開雙手祝福佢哋。 51 祝福緊嘅時候，耶穌離開佢哋，被接到天上。 52 佢哋就向耶穌下拜，開開心心噉返耶路撒冷， 53 經常喺聖殿入面讚美上帝。