馬太福音

22 耶穌又用比喻同佢哋講說話，佢話： 2 「天上嘅王國就好似一個王為佢嘅仔預備婚宴。 3 佢派奴隸出去，叫嗰啲受邀請嘅人嚟參加婚宴，但係嗰啲人唔肯嚟。 4 佢再派其他奴隸出去，同佢哋講：『話俾受邀請嘅人知：「我嘅宴會已經準備好嘞，公牛同埋肥美嘅牲畜都劏好晒，萬事俱備。嚟參加婚宴吖。」』 5 但係嗰啲人一啲都唔在乎，走咗去做其他嘢，一個去咗自己塊田，另一個走咗去做生意。 6 其他人就捉住王嘅奴隸，虐待佢哋，殺死佢哋。

7 「王就非常之嬲，派軍隊殺咗嗰啲殺人凶手，燒咗佢哋嘅城。 8 跟住王同奴隸講：『婚宴已經準備好嘞，但係嗰啲受邀請嘅人唔配嚟參加。 9 所以，你哋要去嗰啲出城嘅大路，見到邊個，就邀請邊個嚟參加婚宴啦。』 10 於是嗰啲奴隸就出去，叫晒所有喺大路遇到嘅人嚟，有邪惡嘅人，亦都有良善嘅人。舉行婚禮嘅場地就坐滿賓客。

11 「王入嚟睇吓啲賓客，見到有個人冇著到婚宴嘅禮服。 12 王就問佢：『朋友，點解你入嚟唔著婚宴嘅禮服呀？』嗰個人無言以對。 13 跟住王同啲僕人講：『綁起佢嘅手腳，將佢揼去外面嘅黑暗之中啦。喺嗰度，佢就會痛哭流淚，咬牙切齒*嘞。』

14 「受上帝邀請嘅人多，但係佢揀選嘅人少。」

15 嗰個時候法利賽派嘅人離開，商量點樣喺耶穌講嘅說話嗰度搵把柄陷害佢。 16 於是，佢哋派自己嘅門徒，同希律黨徒一齊去搵耶穌，話：「老師，我哋知道你唔講大話，又教導人關於上帝嘅真理。你唔會去討好人，仲對人一視同仁*添。 17 所以，請話俾我哋聽，你覺得點吖？納人頭稅俾凱撒，啱唔啱*嘅呢？」 18 耶穌知道佢哋不懷好意，就話：「虛偽嘅人，你哋點解試探我呢？ 19 拎個用嚟交稅嘅錢幣嚟吖。」佢哋就攞咗個第納流斯*錢幣俾佢。 20 耶穌問佢哋：「呢個係邊個嘅頭像，邊個嘅名號呀？」 21 佢哋答：「係凱撒囉。」於是耶穌同佢哋講：「所以，屬於凱撒嘅要俾返凱撒，屬於上帝嘅要俾返上帝。」 22 佢哋聽到覺得好驚訝，於是就轉身離開。

23 撒都該派係唔相信復活㗎。喺嗰一日佢哋嚟搵耶穌，問佢： 24 「老師，摩西話：『如果一個人未有仔女就死咗，佢嘅兄弟就一定要娶咗個遺孀，幫死咗嘅兄弟傳宗接代。』 25 我哋呢度曾經有七兄弟，第一個結咗婚，未有仔女就已經死咗嘞，噉佢嘅一個兄弟就娶咗佢嘅老婆。 26 而呢個兄弟都係未有仔女就死咗嘞，同樣嘅事都發生喺第三個，至到第七個身上。 27 最後連嗰個女人都死埋。 28 噉復活嗰陣，佢係七個人當中邊個嘅老婆呢？佢哋個個都娶過佢噃。」

29 耶穌答佢哋：「你哋錯嘞，因為你哋唔明白聖經，亦都唔明白上帝嘅力量幾咁強大。 30 復活嘅時候，人唔娶亦都唔嫁，就好似天使噉。 31 上帝講過俾你哋知死人係會復活㗎，你哋冇讀過咩？佢話： 32 『我係亞伯拉罕嘅上帝，以撒嘅上帝，雅各嘅上帝。』佢唔係死人嘅上帝，而係活人嘅上帝。」 33 聽到耶穌嘅教導，民眾都覺得好驚訝。

34 法利賽派嘅人聽講耶穌令撒都該派啞口無言，就一齊嚟搵耶穌。 35 佢哋當中有一個精通摩西法典嘅人想試探耶穌，就問佢： 36 「老師，法典入面邊條誡命係最大嘅呢？」 37 耶穌答佢：「『你要全心，全意，用全部生命愛耶和華*你嘅上帝。』 38 呢個係最大、最重要嘅誡命。 39 第二條誡命都相關㗎，就係『要愛人如己』。 40 成套法典同埋先知書嘅說話都基於*呢兩條誡命。」

41 法利賽派嘅人仲喺嗰度嘅時候，耶穌問佢哋： 42 「你哋對基督有乜嘢睇法呢？佢係邊個嘅子孫呀？」佢哋答：「係大衛嘅子孫囉。」 43 耶穌問佢哋：「噉點解大衛喺神聖力量指引下稱呼佢做『主』呢？大衛話： 44 『耶和華*同我主講：「你坐喺我嘅右邊，直到我將你嘅敵人放喺你嘅腳下*。」』 45 既然大衛稱呼基督做『主』，噉點解基督又會係大衛嘅子孫呢？」 46 法利賽派嘅人一句說話都答唔到耶穌。由嗰一日起，冇人再敢質問耶穌啲乜嘢。