馬太福音

10 耶穌召集12個門徒，賜權力俾佢哋驅逐邪靈*，同埋醫好人各種各樣嘅病。

2 以下係12個使徒*嘅名：首先係叫做彼得嘅西門同埋佢嘅兄弟安得烈，西庇太嘅仔雅各同埋佢嘅兄弟約翰， 3 腓力同埋巴多羅買，多馬同埋收稅人馬太，亞勒腓嘅仔雅各，仲有達太， 4 熱心人西門，同埋加略人猶大。猶大就係後嚟出賣耶穌嘅嗰個人。

5 耶穌派呢12個人出去，仲俾咗啲指示佢哋話：「你哋唔好去外族人嘅地方*，唔好入撒馬利亞人嘅城； 6 反而要繼續去以色列民族嗰度搵走失嘅綿羊。 7 你哋要一路行一路傳道，同人講：『天上嘅王國就快到嘞。』 8 要醫好病人，復活死人，令痲瘋病人潔淨，驅逐邪靈。你哋免費噉得到，亦都要不求回報噉施與。 9 你哋唔使放金、銀或者銅幣落裝錢嘅腰帶， 10 亦都唔使為旅途準備食物*，因為工人得到食物，係應該㗎。你哋亦都唔使額外帶多件衫*、鞋或者手杖。

11 「無論你哋入邊一座城、邊一條村，都要搵樂意聽呢個信息嘅人出嚟，住喺佢哋嗰度，直到離開。 12 你哋入咗邊間屋，就要問候嗰家人*。 13 如果佢哋樂意接受呢個信息，噉佢哋就有平安*嘞；如果佢哋唔接受，噉你哋求嘅平安就屬於你哋嘞。 14 無論邊個唔接待你哋，唔聽你哋講，你哋離開嗰間屋，嗰座城嘅時候，都要扽走腳上面嘅塵土*。 15 我可以好肯定噉同你哋講，喺審判日，所多瑪同埋蛾摩拉經歷嘅，都比嗰座城容易呀。

16 「而家我派你哋出去，噉你哋就好似綿羊入咗去狼群當中。所以你哋要好似蛇一樣謹慎，好似鴿子一樣清白無邪。 17 你哋要警惕*，因為啲人會將你哋交俾地方法庭，仲會喺佢哋嘅會堂鞭打你哋。 18 你哋會因為我被帶去總督同埋君王面前，向佢哋仲有呢個世界嘅人作見證。 19 不過佢哋送你哋去受審嗰陣，唔使擔心要講啲乜嘢或者點樣講。到時，你哋就會知道應該講啲乜嘢*， 20 因為講說話嘅，其實唔係你哋自己，而係你哋天父嘅神聖力量通過你哋講說話。 21 兄弟會交兄弟出嚟，爸爸會交仔女出嚟，令到佢哋俾人殺死；仔女會同父母作對，害死佢哋。 22 你哋會因為我嘅名俾所有人憎恨，但係忍耐到底嘅人一定會得救。 23 佢哋喺一座城迫害你哋嘅話，你哋就走去另一座城。我可以好肯定噉同你哋講，喺人子嚟到之前，你哋一定去唔晒以色列所有城。

24 「啲人對待學生唔會好過老師，對待奴隸唔會好過主人。 25 啲人點樣對待老師就會點樣對待學生，點樣對待主人就會點樣對待奴隸*。家主都俾人叫做魔鬼*嘅話，噉更何況佢屋企裡面嘅人呢？ 26 所以，唔好驚佢哋。因為隱藏嘅事一定會顯露出嚟，祕密亦都一定會俾人知道。 27 我私下話俾你哋聽嘅，你哋要公開同人講；我細細聲話俾你哋知嘅，你哋要喺屋頂廣傳開去。 28 嗰啲可以殺死你，但係阻止唔到你喺將來有返生命*嘅，你哋唔使驚；能夠令到你喺欣嫩谷*被毀滅嘅嗰一位，你哋先要驚。 29 兩隻麻雀唔係賣一個小錢*咩？但係，就算其中一隻跌咗落地下*，你哋嘅爸爸都一定知道。 30 其實，佢連你哋嘅頭髮都全部數過晒。 31 所以唔使驚，比起啲麻雀，你哋貴重好多！

32 「邊個公開承認佢係我嘅門徒，我都會喺天父面前承認佢係我嘅門徒。 33 但係邊個喺人面前唔認我，我都會喺天父面前唔認佢。 34 唔好以為我嚟係要為大地帶嚟和平*；我嚟唔係要帶嚟和平，而係要帶嚟刀劍。 35 我嚟係要引起分裂：仔要對抗爸爸，女要對抗媽媽，心抱要對抗奶奶。 36 敵人會係自己屋企嘅人。 37 邊個對父母同仔女嘅感情深過對我嘅感情，就唔配做我嘅門徒。 38 邊個唔願意背負自己嘅苦刑柱嚟跟隨我，就唔配做我嘅門徒。 39 邊個想得到生命，就會失去生命；邊個為咗我失去生命，就會得到生命。

40 「邊個接待你哋，就等於接待我；邊個接待我，就即係接待派我嚟嘅嗰一位。 41 上帝會獎賞先知同埋代表上帝嘅人*，邊個由於佢哋係上帝嘅僕人而接待佢哋，都會得到同佢哋一樣嘅獎賞。 42 我好肯定噉話俾你哋知，邊個善待我嘅門徒當中一個平凡嘅人*，就算只係俾一杯清涼嘅水佢飲，呢個人都一定會得到獎賞*。」